Read obolo Itọn̄ 48 Bible Online

Itọn̄ 48 - obolo bible

Itọn̄ 48

¹Okwa. Okwa itọn̄ bọn kè Kora. Okumugwem mimin; îgbe ibe etọn̄ ọmọ ikpele ikpele me emen ama Awaji kiji; me inyọn̄ ogoon̄ kan̄ òkup me mbuban.

²Ogoon̄ yi îjaan̄ me ubene kan̄; ọmọ ore unwọọn̄ otutuuk ebi linyọn̄; ọmọ ore ogoon̄ Sayọn òkup me agan̄ inyọn̄ me Juda; ọmọ ore ama ogwu ubọọn̄ ilile.

³Awaji me emen ama ya okupbe; ọmọ îjeen̄ ibe ke ọmọ ore uwu mgban akọn̄ ebi ama ya.

⁴Kpọ, ebi ubọọn̄ ofifi ido mîgbaan̄ lek ibọp, mè igbaan̄ ijibi akọn̄ inu me ama ya.

⁵Ire, mgbọ ema etoon̄be chieen̄ me lek ama ya, ema eririki inyinya, mè igwu ikom ililiin̄ ifon.

⁶Ukpook înin̄ igak ema me emen; ukwook otetet ema kubọk enenwaan̄ uman okifiak.

⁷Owu okpukpuku ema, kubọk okisa efet agan̄ mbum-ura ikpukpuku uji ile òkisi ama Tasis.

⁸Eji mînọ me utọn̄, mè isa chieen̄ imun̄ inu òrọrọ me ama Okumugwem Ogwukaan̄ Inyọn̄ mè Ijọn̄; me emen ama Awaji kiji, eji mînọ ibe ke Awaji môrọ ama ya ikeke inye ire mgbọ geelek.

⁹Jei, Awaji, eji ekup me Uwu Mbuban kwun̄ ikikeek imumechieen̄ mgbọ geelek kwun̄.

¹⁰Jei Okumugwem, ike erieen̄ kwun̄ otaan̄be etip, ikeya si ke itọn̄ kwun̄ otaan̄ etip ire okputut linyọn̄; mkpulu kwun̄ ìre eyi ata irọrọ.

¹¹Ebi ìluk me ogoon̄ Sayọn mêkibele ejit; ebi ido Juda mêkinwọọn̄ unwọọn̄, mije unen oyerebet owu okisibi.

¹²Ebi eyi Awaji, ìje-nu ìkana Sayọn; ìje ìtibi emen kan̄, mè ìfuk otutuuk uwu-oket kan̄.

¹³Ìriọọn̄ ubọk ìkpọ mgban kan̄, mè ìjijen̄e ìkana emen uwu mgban akọn̄ òkup me ama ya, inyi enyi eriọọn̄ inu enyi mêkpabe inyi nsabọn ebi ukot òkinu me isi ofolek ama ya.

¹⁴Mije, Awaji keyi, ogwu òkaan̄ unye ikeyi, ọmọ ore Awaji kiji ire mgbọ geelek, mgbọ geelek; îre ọmọ obokijeen̄ eji oniin̄ mege ire mgbọ mkpa kiji.