Read obolo Itọn̄ 49 Bible Online

Itọn̄ 49 - obolo bible

Itọn̄ 49

¹Ìkup inyi ogwu òjeen̄ okwa. Okwa bọn kè Kora. Ebi otutuuk ido geelek, ìgban̄ eyiyi; enyi ebi ìluk me linyọn̄, ìgban̄ utọn̄!

²Ebi ilile, mè ebi ijija, ebi ubọọn̄ mè ebi ugbọọn̄, ìgban̄!

³Ikọ ònan̄a emi me otu mônyi ene iriọọn̄-inu; usem ònan̄a emi me ejit mônyi ene ifuk-ibot.

⁴Mâgwu ikom ifo lek itoto urọk, mè ikifit uneen̄ isa ikibak ibot urọk n̄a.

⁵Keke môrọ ibe m̀fieek owot mgbọ uyọrọlek otetbe emi, mè mgbọ ebi ochicha ekanabe emi okokop?

⁶Ife chi ekisa inu ubọọn̄ kiban̄ itoon̄ ejit, mè ikigugo lek ikpele ubọọn̄ ema ebọọn̄be.

⁷Kpunu ene geege òbokọt ifaka ogwu ngwan̄ isibi; kpunu si ogwu òbokọt ikpe ewe ebek ugwem ngwan̄ kan̄ inyi Awaji.

⁸Mije, ikpekpe ewe ebek ugwem ene minye ewe; inu geelek mêkpebe, ìkaboso;

⁹ìkabokọt irọ ibe ene ya iluk ire mgbọ geelek, mè ikakwu ìnin̄ udọn̄.

¹⁰Ene geelek îriọọn̄ ibe ke ebi ìriọọn̄ inu ekikwakwaan̄; ebi burubut mè ebi welewele si, ubọk yaage; ema ekitetele inu ubọọn̄ kiban̄ inyi ebi ofifi ife.

¹¹Ubọk geelek ema ekaan̄be ijọn̄ ichit ere gboi, udọn̄-ufuun̄ kiban̄ ore uwu kiban̄ ire mgbọ geelek; ere ema ebeluk ire eya me ukot me ukot.

¹²Ene ìkabobia me irek umin kan̄; môkwu kubọk ebi kè anam ekikwaan̄.

¹³Eyi ore inu òkup inyi ebi ìtoon̄ ejit me lek kiban̄ gaalek, mè ebi ìkigọọk oniin̄ kiban̄, mè ikichieek me lek ikọ kiban̄.

¹⁴Ubọk arọọn̄ okikwu, ikeya si ke ema ebekwaan̄ inin̄ udọn̄-ufuun̄; ema ekup me irak ubọk mkpa; ebi ata irọrọ mêtim ikpan̄ ema me mgbọ egwe isiwele; akpalek kiban̄ môjọjọ ita me emen udọn̄ ijọn̄ọ ere me lek uwu kiban̄.

¹⁵Ire, Awaji môtaba emi isibi me ubọk mkpa; ọmọ môbọkọ emi itap.

¹⁶Kasisaak lek kwun̄ mgbọ ene okibọọn̄ ubọọn̄; mgbọ inu ubọọn̄ okinin̄ uwu kan̄ kubọk mun̄.

¹⁷Mije, mgbọ ọmọ isikwu, kpunu eyi îbosa ikaan̄ me ubọk ije; inu ubọọn̄ kan̄ ìkpogọọk ọmọ inin̄ udọn̄.

¹⁸Ubọk geelek ibe ke mgbọ ọmọ okupbe me ògat ugwem, ke ọmọ ìmọnọ lek kan̄ ibe ke ọmọ ìre ogwu egbanabe, ebi ene si ekekitọn̄ ọmọ ibe ke inu îje ijaan̄ me lek kan̄;

¹⁹ọmọ môfo igọọk ebi nte nte kan̄, me ere ema kpebekimun̄ chieen̄ me lek utoon̄ ire mgbọ geelek.

²⁰Ene ogwu òkaan̄ umin, ire, ìkagobo inu geege ìtet, ene ya ìbokwu kubọk anam okikwu.