Read obolo Itọn̄ 5 Bible Online

Itọn̄ 5 - obolo bible

Itọn̄ 5

¹Nteme òkup inyi ogwu òjeen̄ okwa: Ebesa òja ikọt. Okwa kè Debit. Gban̄ ikọ nkitumu, jei Okumugwem, mè nọ mfi nkito!

²Nọ ida n̄a mgbọ nkito lek inyi owu, jei ogwu Ubọọn̄ n̄a mè Awaji n̄a; mije owu ke nkiriaak uriaak ikpọ isi.

³Jei Okumugwem, owu mônọ ida n̄a me ewelegwe; ewelegwe ke mbasa mbeek n̄a inito me isi kwun̄, mè ikweek ikikpọ owu chieen̄.

⁴Owu òkare Awaji inu ikpak okitop me lek; ijo inu ìkabokup me ere owu okupbe.

⁵Ebi ugumulek, owu òkposa chieen̄ irieen̄ me lek; ebi ìkirọ ijo inu, owu òchacha.

⁶Owu môjijaka ebi ataak, mè igwen ebi ìkpan̄ ene mè ebi ofiaan̄ urieek.

⁷Ire emi, mânin̄ inu me emen uwu kwun̄, sa me imumechieen̄ okikaan̄ mgbọ geelek; emi mâsa me ulibi itọbọ ebum inyi owu me Uwu Mbuban kwun̄.

⁸Okumugwem, mije ebi ochicha n̄a, sa emi je me oniin̄ eyi kwun̄, òrere oniin̄ eyi ata irọrọ; rọ oniin̄ kwun̄ irọt inyi emi ǹgọọk.

⁹Ikọ otu ebi ochicha n̄a ìkakikaan̄ ebon; inu òkup ema me ejit ìre ifafiat ene; emen ebek kiban̄ ìre udọn̄-ufuun̄ òbobook otu; mkpa okup ema me emen ebek; otu alọm kiban̄ ìre uchọk, ìkileleke ene ifiin̄.

¹⁰Jei Awaji, tip ema oyerebet; yaka ijo otitọt kiban̄ kwaan̄ ema me ibot; rieen̄ ema san̄a me isi kwun̄, mije ogbogbo ijo inu ema erọbe, bak me lek ema efieekbe inan̄a owu me lek.

¹¹Ire, tele inyi otutuuk ebi ìtoon̄ owu ejit me lek enwọọn̄ unwọọn̄; tele mè ema ekọt okwa ebele ejit mgbọ geelek. Bem ebi ìmama owu; inyi ebi ìmama erieen̄ kwun̄ enwọọn̄ unwọọn̄.

¹²Okumugwem, owu okigbana ebi ata irọrọ, mè ikisa nnwọn kwun̄ ikput ema lek kubọk uga agbọ.