Read obolo Itọn̄ 50 Bible Online

Itọn̄ 50 - obolo bible

Itọn̄ 50

¹Okwa kè Asafu. Okumugwem, Awaji otutuuk awaji geelek, îsan̄a amọn, mè igween̄ otutuuk ebi linyọn̄; ibene me agan̄ mbum-ura isi ire agan̄ ichep-ura.

²Awaji îtoon̄ kubọk ura inan̄a isibi me Sayọn; ama ya òjajaan̄ kpunu itap otu.

³Awaji kiji òkinu; ìkarariaan̄ ere ìkinu; alọm ukan̄ òkitaka inu iriọk okisak me isi kan̄; uga egwijo okekijibi ikana ọmọ okokop.

⁴Ọmọ îgween̄ inu òkup me akpabin inyọn̄, mè igween̄ echi òkup me linyọn̄, ibe enekup ekpọ ike ọmọ obosibi oyerebet inyi ebi kan̄.

⁵Awaji ìbe, “Ìtitiin̄ ebi n̄a, ebi ata irọrọ, ìnyi emi; ema ebi ìgwagwa ngwugwa isa inyan̄a ibot melek n̄a.”

⁶Akpabin inyọn̄ ìkijeen̄ ibe Awaji ìre ogwu ata irọrọ, mije Awaji me lek kan̄ ìre ogwu ibot oyerebet.

⁷“Ebi n̄a, ìgban̄, ke mâtumu ikọ; ebi Ijeren, ìgban̄, ke mâkeke ata-ikọ ikeme enyi; emi nre Awaji, òrere Awaji kinyi.

⁸Ǹkagana ikọ ìnyi enyi bak me lek ngwugwa kinyi, mè ìre ngwugwa ewọwọp enyi ekinyi emi mgbọ geelek.

⁹Ǹkado eriembuuk geege ònan̄a me uwu kinyi, mè ìre ebot ònan̄a me lek urum ebot kinyi,

¹⁰mije anam geelek òkup me oron ìre eyi n̄a; otutuuk eriembuuk òkup me inyọn̄ obop ogoon̄, îre emi nkaan̄.

¹¹Nriọọn̄ isi unọn geelek òluk me inyọn̄ ogoon̄; otutuuk inu òluk me emen oron ìre echi n̄a.

¹²Ire uraafiọọn̄ itaka emi, ǹkabado enyi inorie, mije linyọn̄ mè inu geelek òkup me emen kan̄ ìre eyi n̄a.

¹³Ìre ǹkitaka ufuk orie eriembuuk, sà ìre ǹkinwọ eje orie ebot ni?

¹⁴Ngwugwa kinyi ìbokire inyinyi Awaji itọn̄, mè irọrọ inu geelek enyi echieekbe Ogwu Òbebene Ichit use ibe enyi mêrọ.

¹⁵Enyi isikirọ ikeya, ìgwen emi me usen uyọrọlek, ke mânyan̄a enyi, enyi mêtọtọn̄ emi.”

¹⁶Ire, Awaji ìtumu inyi ebi òkpaka ibot ibe, “Enyi ejeje ikichak otu me lek ikan n̄a? Enyi ejeje ikitumu ikọ ibak inyan̄a-ibot n̄a?

¹⁷Enyi kpema nteme, enyi ekitọtọp ikọ n̄a ifiin̄.

¹⁸Ogwu inọ geelek enyi emun̄be ìre unene kinyi; enyi ekigọọk ebi ìkigan nwa ene igbaan̄ ije.

¹⁹Otu kinyi ìbobook itutumu ijo usem; ataak ìkakinan enyi me otu alọm.

²⁰Enyi ekitumu ikọ ikeme ebi ngwan̄ kinyi, mè ikifiat bọn nga kinyi me udun̄.

²¹Inu chi geelek enyi erọbe, ǹkasan̄a amọn; enyi ekekikeek ibe ke emi ǹkup kire enyi. Ire, mgbọ keyi, mâgana ikọ inyi enyi, mè isan̄a ikọ nkaan̄be ikeme enyi isibi ito enyi me isi.

²²“Enyi ebi ìwuwuuk emi, Awaji, ìgban̄ utọn̄; ire ìkare ikeya, mâgwak enyi iche; kpunu ogwu òbonyan̄a enyi isibi me ubọk n̄a.

²³Ogwu òbebe emi ‘Onirọ’, ene ya ìgwa ngwugwa òkinyi emi umin; ene ya si ìkinen̄e oniin̄ kan̄ isun̄, inyi mâjeen̄be ọmọ ubọk emi Awaji nkinyan̄a ene.”