Read obolo Itọn̄ 55 Bible Online

Itọn̄ 55 - obolo bible

Itọn̄ 55

¹Ìkup inyi ogwu òjeen̄ okwa: Mêsa nkwukwak echi olik ikwak. Ijeen̄-inu kè Debit. Jei Awaji, soso, nọ uriaak n̄a, mè kada utọn̄ ìsan̄a me lek mbeek n̄a!

²Nọ emi ida, mè rọ inu nkido owu; ekiket mônikpan̄ emi; ejit n̄a ìkare ijọn̄,

³bak me lek ida ukpo ebi ochicha n̄a ekitaan̄ inin̄ emi lek, mè ebi ikpak ìsasa akọn̄ inu emi lek; ema ekirọ emi nnaan̄, mè isa unaan̄-ejit irọ emi ikan̄.

⁴Ejit n̄a ìkare ijọn̄ mije ukpook; ufieek-owot mkpa înin̄ inwaan̄ emi emen.

⁵Ukpook òkitet emi, mè ikiran emi lek; uga ukpook mônikeme emi ikpan̄.

⁶Jei, mebe nkaan̄ uwop kubọk ekerekwukwu, kè mwulu nnan̄a ǹsi ǹsiki efuuk.

⁷Iin̄, kè mwulu ǹjọn̄ọ ere, mè mfo emen èwê ere ònọnọọn̄ ǹsi ǹkup.

⁸Kè magwagwat lek isi iweek ere maletbe lek, mè inan̄a me isi unye efet mè egwijo.

⁹Jei Ogwukaan̄-ene, tap wọlọwọlọ me etete kiban̄; kachieek ibe ema ekaan̄ otu ge, mije, inu afa mè ibaak ìgagak emen ama.

¹⁰Eririeen̄ mè ikarek, ebi ijo ife ekinween̄ lek ijijen̄e ikana me inyọn̄ mgban ama, mè ikitap ufialek mè inu ikpak igak emen ama.

¹¹Ema ekpọkpọ ikifiat inu igwook me otutuuk ere me emen ama, mè ikirọ ikeme ene; mfeen̄ ìkpota me oyet ile ama ya.

¹²Ibe more ogwu ochicha orọ emi ochak, kè m̀me; ibe more si ogwu oriara okpọ emi isiki chieen̄, kè nje agba agba me lek.

¹³Eyi, ìyaka inire owu, ogwu ogbo n̄a, ogwu melek n̄a ekigbaan̄ ije, owu ogwu melek n̄a erebe otu unọn mè ijọn̄.

¹⁴Eji mîkigbaan̄ ikpa ata utop utop ukpatu, mè ikigbaan̄ ije me urum ene inin̄ Uwu Mbuban.

¹⁵Tele kè ema ekwaan̄ mkpa uwuuk-lek; tele kè ema eje ukot ukot efon awaji; mije ijo inu ìjojot emen uwu kiban̄, mè ijot emen ejit kiban̄ si.

¹⁶Ire emi, Awaji ke nkigwen; Okumugwem okekinyan̄a emi.

¹⁷Ewelegwe mè ikarek mè ikakwun̄, ǹkitaan̄ ukpo ufialek n̄a inyi ọmọ; ọmọ okekinọ emi ida.

¹⁸Îkinyan̄a emi me ubọk akọn̄ òkinu emi lek; ubọk geelek ebi ìkisa akọn̄ inu ewabe enenen.

¹⁹Awaji, ogwu ubọọn̄ òkup bene me karake akat, mônọ emi ida; môjijaka ema, mije, ema kpekinwene ejit igọọk Awaji; kpekitet si ukpook me lek Awaji.

²⁰Ema mîbene akọn̄ me lek ebi ìkup me esuuk melek kiban̄, mè ichaka inyan̄a-ibot ema egbaan̄be inyan̄a.

²¹Ikọ kiban̄ ìkikup eriook eriook, ire, ochicha îwuwọ emen ejit kiban̄ isan̄a; usem kiban̄ si, ìre mmemem mmemem kubọk aran̄, ire, oge akọn̄ ke ema ewọọk ikaan̄ me ubọk.

²²Bene uyọrọlek kwun̄ tap me ubọk Okumugwem; môkpọ owu chieen̄ me lek; ọmọ ìkpochieek ibe akọn̄ ifieek ebi ata irọrọ, mege ire mgbọ ikakaan̄ge itata.

²³Ire, owu Awaji môda ebi ìkpan̄ ene mè ebi ataak itap me udọn̄; ema kpebeluk ire ìkike iba ugwem kiban̄. Ire, eyi n̄a, owu ke ntoon̄ ejit me lek.