Read obolo Itọn̄ 57 Bible Online

Itọn̄ 57 - obolo bible

Itọn̄ 57

¹Ìkup inyi ogwu òjeen̄ okwa: Igọọk me lek Kajijaka. Okwa Debit okọtbe me emen ǹkororok mgbọ îlibibe inwọnọ Sọọlu. Ekikọt ususuk. Rọ emi nsan; jei Awaji, rọ emi nsan, mije ǹtoon̄ ejit me lek kwun̄; ǹlet lek n̄a ikup me irak uwop kwun̄ mege ufialek òkitoon̄ emi môtabe.

²Ntaan̄ ukpo igwen Awaji Ogwu Òbebene Ichit; ngwen Awaji ogwu òkirọ nkeek kan̄ iso inyi emi.

³Môkup me emen inyọn̄ inyan̄a emi; môsa esip itet ebi ìkitutuku emi; Awaji môjeen̄ emi imumechieen̄ kan̄ mgbọ geelek, mè ijeen̄ emi atikọ kan̄ si.

⁴Ebi ochicha ekakana emi okokop, ema ekup kubọk egbe àtat ukan̄ okisak me chieen̄; ejeek kiban̄ ìsọọk kubọk otu otunwa mè otu oraan̄; otu alọm kiban̄ ìreke kubọk oge akọn̄.

⁵Jei Awaji, owu omin enenen me akpabin inyọn̄; ikeya si, umin kwun̄ îso otutuuk linyọn̄.

⁶Ebi ochicha n̄a mîtip ufe inyi emi; ejit îfieek emi, ekwukwu n̄a îwọ; ema mîrọkọ udọn̄ me oniin̄ nkije; ire, ema me lek kiban̄ gaalek eyaka irọn̄ inin̄ emen.

⁷Mbieen̄ ejit inye me lek kwun̄, jei Awaji; iin̄, mbieen̄ ejit inye; mâkọt okwa isa itọn̄ owu.

⁸Ibot ejit n̄a, nan̄a keke! Uneen̄ ile n̄a mè uneen̄ ija n̄a, ìnan̄a ìkeke! Mânan̄a ikeke ikwak uneen̄ sabum egwe ònowele.

⁹Jei Ogwukaan̄-ene, mâtọn̄ owu me isi ebi ido geelek; mâkọt okwa inyi owu me etete ebilene geelek.

¹⁰Mije, imumechieen̄ okikaan̄ me lek ene mgbọ geelek îmin enenen ire akpabin; atikọ kwun̄ îmin enenen ire lek oduku inyọn̄.

¹¹Jei Awaji, owu omin enenen isaba iraka akpabin inyọn̄; ikeya si, umin kwun̄ îso otutuuk linyọn̄.