Read obolo Itọn̄ 58 Bible Online

Itọn̄ 58 - obolo bible

Itọn̄ 58

¹Ìkup inyi ogwu òjeen̄ okwa: Igọọk me ida Kajijaka. Okwa kè Debit. Ekikọt ususuk. Enyi ebi ibot mkpulu, ìre enyi mîkifieek ikọ òtatat? Ìre enyi mîkisibi oyerebet ònenen inyi bọn ebilene?

²In̄-in̄, irọrọ ijo inu ke enyi ekikeek, mè ikirọ inu afa me lek ijọn̄.

³Ebi ijo irọrọ ebene karake mgbọ ema ekupbe me emen owot ije ilọ; ema ebene me usen emanbe ema ikirọ ilọ, mè ikikan̄ ataak.

⁴Ikọ otu kiban̄ ìkup kubọk iwot ulu ibot iba; ubọk ulu ibot iba ìkakinọ ikọ, ikeya si, utọn̄ ife chi ìchichit.

⁵Ulu ibot iba ìkakinọ ugwun̄ ebi ifit ulu me lek; ubọk geelek ebi ifit ulu eriọọn̄be ugwun̄ ire, kpekikọt irọ inyi ulu ibot iba igban̄ utọn̄ inyi ema.

⁶Jei Awaji, faan̄ ema ejeek san̄a me otu; soso, Okumugwem, gọ ejeek bọn egbe àtat cha ekisa iriak ìre gwook.

⁷Tele ema eniniin̄ echieen̄ kubọk mun̄ okininiin̄ ichep me ijọn̄; faan̄ oraan̄ geelek ema esookbe fiin̄.

⁸Rọ ema egwat lek ekwaan̄ kubọk egwuuk òtọtọk ikana nkọọk; rọ ema ekamun̄ utoon̄ ura, kubọk gwun̄ aya emanbe nkwukwu.

⁹Ike iye ukpak okigwat lek itaka ita sabum otin̄ oyok, ikeya si, gwat lek kwọkọ ema san̄a kpai.

¹⁰Ebi ata irọrọ mêbele ejit mgbọ ema isimun̄ Awaji okikpe ebi ijo ife useen̄ inu ema erọbe; ebi ata irọrọ mêwook me emen eje ebi òkpaka ibot.

¹¹Ebi ene mêtumu ibe, “Me atikọ, mkpukpe ọmọ òwa inyi ebi ata irọrọ; îsibi utoon̄ ibe ke Awaji ogwu òkisibi oyerebet inyi linyọn̄ ọmọ òwa.”