Read obolo Itọn̄ 60 Bible Online

Itọn̄ 60 - obolo bible

Itọn̄ 60

¹Nteme òkup inyi ogwu òjeen̄ okwa: Mêkọt ikpọ me ida okwa “Lili eyi Inyan̄a-ibot”. Okwa kè Debit, isasa inyi nteme. Mgbọ îtimbe akọn̄ me lek ama Aram Nayarayim mè ama Aram Soba, melek si mgbọ Jowabu okpan̄be akọp mè obop ene iba ebi Edọm me iteke Uchi mè ika. Ekikọt ususuk. Awaji, owu otọp eji ito, mè iyiyala eji; owu onaan̄ ejit ikeme eji; soso, kpọk gwen eji tap.

²Owu orọ ijọn̄ isisik, mè irọ ibe itọbọ ibak; soso, chit ere òtọtọọn̄ ibak cha, mè rọ inyi ikayaka ìsisik.

³Owu orọ ibe ebi eyi kwun̄ eje etibi ujaralek; owu onyi eji miin̄ enwọ esa, mè ekeje gbegbegbe ekana.

⁴Owu osa egop inyi ebi ìkimin owu, ibe ebene efo inyọn̄ esa elibi enwọnọ me otu oraan̄.

⁵Sa ubọk ulom kwun̄ nyan̄a eji sibi, mè nọ uriaak kiji, ufuna ebi owu omun̄be me chieen̄ enwọnọ.

⁶Awaji ìkup me Uwu Mbuban kan̄ itumu ibe, “Ntim ikpan̄ ebi Sekem mè ebi Sukot; mâche ama Sekem, mè idọmọ iteke ijọn̄ Sukot inyi ebi n̄a.

⁷Ijọn̄ Giliadi ìre eyi n̄a; ijọn̄ ebi Manasi ìre si eyi n̄a; ebi Iferem ebekire ebi akọn̄ n̄a; îre me Juda ke ogwu ubọọn̄ ngobobe obonan̄a isibi.

⁸Ebi Mowabu ebekisi ikwaan̄ inyi emi; ebi Edọm ebekire ebi usun̄ inyi emi; ire ebi Filisia, ǹtitim ema ikpan̄, mè ikitaan̄ ukpo iwulu òkô.”

⁹Jei Awaji, ekene obosa emi isi akọn̄ me Edọm? Ekene obosa emi isi, inyi ǹsi ǹtim m̀kpan̄ Edọm, ama unye ya mgban okanabe?

¹⁰Jei Awaji, ìre òjijit eji itele ni? Ìre owu òkpofat igọọk urum akọn̄ kiji isibi isi akọn̄ ni?

¹¹Tap ubọk nyi eji me lek ogwu ochicha kiji, mije itatap ubọk ogwu ebilene okitap ìre inu ikike.

¹²Eyi Awaji okekeke me agan̄ kiji, eji mêtim ikpan̄ ikpele ikpele, mije ọmọ môjak ibot ebi ochicha kiji ikpukpuku.