Read obolo Itọn̄ 63 Bible Online

Itọn̄ 63 - obolo bible

Itọn̄ 63

¹Okwa kè Debit mgbọ îkupbe me èwê agan̄ Juda. Jei Awaji, owu ore Awaji n̄a; owu olọk emi enenen; lek îwọ emi inyi iweweek owu; ǹkiweek owu kubọk ebi ene ekiweek mun̄ me mgbọ ura.

²Ntaak chieen̄ me Uwu Mbuban, mè imun̄ ibe ke owu ìre ogwu unye, mè ogwu òmimin.

³Imumechieen̄ kwun̄ òkikup ire mgbọ geelek înwọn igak igagat ugwem; eya orọ nkisa otu n̄a itọn̄ owu.

⁴Mâbe owu onirọ otutuuk usen ugwem n̄a; mâbene ubọk iriaak uriaak ikigwen erieen̄ kwun̄.

⁵Owu onyi emi atalek inorie ijọk eyi òsoso emi; eya orọ nkikọt okwa ibele ejit itọn̄ owu.

⁶Nsilaak me inyọn̄ mkpilaak, ǹkakitele ikekeek inu ofolek kwun̄; otutuuk eririeen̄ owu okikup emi me ejit,

⁷bak me lek, îre owu okitap ubọk inyi emi mgbọ geelek; eya orọ nkupbe me irak uwop kwun̄ ikinwọọn̄ unwọọn̄.

⁸Ǹgọgọbọ owu ikam; ubọk ulom kwun̄ si otetet emi inye.

⁹Ebi geelek ìkiweek isasan̄a ugwem n̄a mêfon udọn̄-ufuun̄, ere ebi ìkwakwaan̄ ekifon.

¹⁰Ema mênin̄ me akọn̄; ibo oron afa môtaka nkwukwu kiban̄.

¹¹Ire, ogwu ubọọn̄ mônwọọn̄ unwọọn̄ mije inu Awaji orọbe; otutuuk ebi ìsa Awaji inyan̄a ibot mêtọn̄ Awaji, mije, ọmọ môrọ otu ebi ataak ichit.