Read obolo Itọn̄ 64 Bible Online

Itọn̄ 64 - obolo bible

Itọn̄ 64

¹Ìkup inyi ogwu òjeen̄ okwa. Okwa kè Debit. Jei Awaji, gban̄ uyọrọlek n̄a nkikpa inyi owu; owot mifieek emi me lek ebi ochicha n̄a; soso, bem emi.

²Let emi san̄a me lek otitọt ebi ikpak ekilet itọt ibak emi, mè ijo ekiket urum ebi ijo irọrọ ekikeek ofolek n̄a.

³Ikọ otu kiban̄ ìkikpan̄ ene kubọk oge akọn̄; usem kiban̄ ìkiriak inin̄ ene lek kubọk oraan̄ ugwun̄ okupbe me otu.

⁴Ema ekilileek isook ebi ata ife me uwuuk-lek; kpetet ukpook.

⁵Ge ìkirọ ge inye irọrọ ijo inu ema etọtbe; ema ekikpa ubọk mênween̄be lek ikọọk ufe kiban̄; ema ekibe, “Ìre ekene obomun̄ eji?”

⁶Ema ekitọt ijo otitọt mè ikibe, “Eji mîra itọt otitọt òtetet mun̄.” Ekiket mè emen ejit ebilene midọk.

⁷Ire, Awaji môsa oraan̄ eyi kan̄ isook ema me uwuuk-lek, mè isak ema unan me ekakpọge chieen̄.

⁸Môsa otu alọm kiban̄ gaalek itap ema me ichep; ebi geelek ìmumun̄ ema mêkekitọp ibot.

⁹Mgbọ ya, ebi ene mêkaan̄ ukpook; ema mêkikpa ikwaan̄ Awaji osibe, mè ikikeek inu îrọbe.

¹⁰Ebi ata irọrọ, mênwọọn̄ unwọọn̄, bak me lek inu Okumugwem orọbe; ema mêtoon̄ ejit me lek kan̄; ebi ata ife, mêtọn̄ ọmọ.