Read obolo Itọn̄ 65 Bible Online

Itọn̄ 65 - obolo bible

Itọn̄ 65

¹Ìkup inyi ogwu òjeen̄ okwa. Okwa kè Debit. Ebekikọkọt. Jei Awaji, îgbe ibe etọn̄ owu me ama Sayọn, mè erọ use echieekbe owu eso.

²Otutuuk ebilene mênu me lek kwun̄, bak me lek, owu okinọ uriaak.

³Mgbọ ijo inu kiji isitiik ibene eji me ibot, îre owu okitele inyi eji.

⁴Kpọ uga ubelejit òkup inyi ebi owu ogobobe, mè itaba iriaak ibe eneluk me emen Uwu Mbuban kwun̄; ata inu òkinan̄a me uwu kwun̄ môjot eji owot.

⁵Owu onọ ida kiji, mè isi ikwaan̄ ukpook isa inyan̄a eji; Awaji ogwu òkinyan̄a eji, ebi ìluk me ntutun̄ ere geelek me linyọn̄, mè ebi ìluk me isi okwaan̄ òkup me ujọn̄ọ ere, etoon̄ owu ejit me lek.

⁶Owu osa unye kwun̄ isun̄ ebi kè ogoon̄ me irek kiban̄, ikisa ijeen̄ ibe ke owu okaan̄ unye.

⁷Owu orọ ogbururu isibi me okwaan̄, mè irọ ekoon̄ kan̄ iwọ, mè isiki si okput ebi ido geelek me linyọn̄ ekitap.

⁸Ebi ìluk me ntutun̄ ere geelek me linyọn̄ ekup me ukpook bak me lek ikpele uyeke inu echi orọbe; bene me agan̄ mbum-ura si re agan̄ ichep-ura, inu orọbe îrọ ebi ene etaan̄ ukpo enwọọn̄ unwọọn̄.

⁹Owu okikpọ linyọn̄ chieen̄ me lek sa me ikekirọ ibot irep igwook me ijọn̄; owu okirọ ijọn̄ inwọn isasa iwop inu; mun̄ òjojot okwaan̄ kwun̄ okirọ ijọn̄ itibi mfut; ikeya ke owu odọmọ isun̄ ibe ikup.

¹⁰Owu okirọ ibot irep igwook me uko, mè inisiki ijọn̄; owu okisa unye otu ibot irọ ijọn̄ imem, mè igbana mfut, ibe itibi.

¹¹Bak me lek ke owu onwọn, owu okirọ irọrọkọ uko me acha geelek inwọn; ere geelek ukot kwun̄ ojakbe, inu ìkpọkpọ ikisibi.

¹²Mbubet îgwook ichit emen èwê inyi anam ikitaka; unwọọn̄ ìjojot agba ogoon̄ geelek.

¹³Ebi kè arọọn̄ mîgwook ichit inyọn̄ mbubet gbak; akpa îtibi ijot emen iteke gboi; inu geelek ìnikitataan̄ ukpo ikọt okwa itọn̄ Awaji, mè ikinwọọn̄ unwọọn̄.