Read obolo Itọn̄ 66 Bible Online

Itọn̄ 66 - obolo bible

Itọn̄ 66

¹Ìkup inyi ogwu òjeen̄ okwa. Okwa. Ebekikọkọt. Enyi otutuuk ebi linyọn̄, ìsa me unwọọn̄ ìtaan̄ ukpo ìtọn̄ Awaji!

²Ìkọt okwa ìsa ìmin erieen̄ kan̄; ìtọn̄ ọmọ ibe ke ọmọ mimin.

³Ìtumu ìnyi Awaji ibe, “Inu owu okirọ ìkup uyeke uyeke; unye kwun̄ îmin enenen; ebi ochicha kwun̄ ekigele igwook me isi kwun̄, bak me lek ukpook kwun̄.

⁴Otutuuk ebi linyọn̄ ekitọbọ ebum inyi owu; ema ekikọt okwa itọn̄ owu; ekikọt okwa itọn̄ erieen̄ kwun̄.”

⁵Ìna, ìnikpọ inu Awaji orọbe; inu îrọbe inyi bọn ebilene ìkup uyeke uyeke.

⁶Îrọ okwaan̄ ikana nchat ijọn̄, ebi nte nte kiji ejeje ukot ukot isaba; ere ya ke eji enwọọn̄ unwọọn̄ bak me lek inu îrọbe.

⁷Ìkisa unye kan̄ ikpulu ire mgbọ geelek, mè ikiruk chieen̄ ikpọ ebi ido geelek, inyi ebi ìfefieek inan̄a me lek kan̄ ekagumu lek.

⁸Ebi ido geelek, ìtọn̄ Awaji kiji; ìtọn̄ ọmọ mè ebi ene enọ.

⁹Ọmọ osun̄ eji me ògat ugwem; ìkachieek ibe eji ekwaak erọn̄.

¹⁰Awaji, owu oroon̄ eji ikpọ; owu okala eji kubọk alata okuket ewọpbe iren̄e me ukan̄.

¹¹Owu otele ibe eji erọn̄ ufe, mè iben akpan òlolobo ikeme eji me ibot.

¹²Owu otele ibe ebi ochicha kiji eje me inyọn̄ kiji; eji mîje itibi emen ukan̄ mè emen mun̄ ile; ire, owu osa eji inito me ere inu geelek ojotbe.

¹³Mâsa ngwugwa ewọwọp inu me uwu kwun̄; mâninyi owu inu nchieekbe use.

¹⁴Mânyi owu inu cha echi ntumube me otu, mè echi nchieekbe use mgbọ uyọrọlek otetbe emi.

¹⁵Anam òmimiin̄ ufuk ke mbasa igwa ngwugwa ewọwọp iriọk inyi owu; mâsa owuwa orie eriembuuk mè orie ebot igwa ngwugwa utop olu inyi owu.

¹⁶Otutuuk kinyi ebi ìkitet ukpook Awaji, ìna ìnigban̄, inyi m̀kpa inu Awaji orọbe inyi emi ǹnyi enyi.

¹⁷Ntaan̄ ukpo igwen ọmọ ibe itap ubọk inyi emi, mè isa otu alọm n̄a igolo okwa itọn̄ ọmọ.

¹⁸Mebe nkaan̄ ekiket ijo inu me emen ejit n̄a, Okumugwem kpomogban̄ uriaak n̄a.

¹⁹Ire, me atikọ, Awaji înọ ida n̄a, mè igban̄ uriaak n̄a.

²⁰Mâtọn̄ Awaji, bak me lek, ìkajit uriaak n̄a; ìkatele si imumun̄ emi me chieen̄ mgbọ geelek.