Read obolo Itọn̄ 68 Bible Online

Itọn̄ 68 - obolo bible

Itọn̄ 68

¹Ìkup inyi ogwu òjeen̄ okwa. Okwa kè Debit. Ebekikọkọt. Awaji nan̄a keke, mè yiyala ebi ochicha kwun̄; ebi ochicha kwun̄ mêliliin̄ me isi kwun̄.

²Ubọk efet okiwut oduku ininiin̄ ichep, ikeya ke Awaji olap ema isan̄a; ike mgbe uti okigwat lek itọk me ukan̄, ikeya si ke ebi òkpaka ibot ebechieen̄ ita me isi Awaji.

³Ire, ebi ata irọrọ mêbele ejit, mè inwọọn̄ unwọọn̄ me isi Awaji; ejit môtop ema enenen; ema mêtaan̄ ukpo inwọọn̄ unwọọn̄.

⁴Ìkọt okwa ìtọn̄ Awaji; ìkọt itọn̄ ìnyi erieen̄ kan̄; ìbene ọmọ ogwu òkikọp me emen oduku inyọn̄ ìfo inyọn̄; erieen̄ kan̄ ìre Okumugwem; ìbele ejit ìje me isi kan̄.

⁵Awaji, ogwu òluk me Uwu Mbuban kan̄, ọmọ ore ute inyi ebi una ute; ọmọ ore si ogwu òkisibi oyerebet inwọn ebi nwakpa.

⁶Ọmọ okirọ ebi ìrere bọn ibot ge ekaan̄ ototun̄ ukan̄ eyi kiban̄, mè ikisan̄a ebi etapbe me mkpọn isibi isi itap ubọọn̄; ire, ebi ìfefieek inan̄a me lek kan̄ ebeluk me ere ijọn̄ ochiaakbe kubọk ewuuk.

⁷Jei Awaji, mgbọ owu okpulube ebi eyi kwun̄ ikisa ika, mgbọ ya okije me isi kiban̄ isa ema ikisaba èwê,

⁸ijọn̄ îsisik; ibot orerep me inyọn̄ igwook me ntut isi kwun̄; me atikọ, ogoon̄ Saina îsisik mgbọ owu, Awaji ebi Ijeren, osibibe inu.

⁹Jei Awaji, owu orọ ibot irep òjot òjot igwook me ijọn̄ kwun̄ òninin̄ òra, ijọn̄ ya onwọnwọn;

¹⁰ebi eyi kwun̄ eluluk me lek ijọn̄ onyibe ema me ìrot; sa me nnwọn kwun̄, owu onyi ebi ugbọọn̄ inorie.

¹¹Ogwukaan̄-ene înyi ida; ebibaan̄ ebi ìsasa etip ya ikilook ikana mîwa enenen:

¹²“Ebi ubọọn̄ mè urum akọn̄ kiban̄ mîliliin̄; ema elililiin̄ isan̄a kpai; ebibaan̄ ìkukup me uwu echeche inu efumbe me akọn̄.

¹³Enyi ebi ìkup me uwu arọọn̄ mêkaan̄ inu òbet lek ekerekwukwu esabe alata okuket itọkọ, mè isa alata araran̄ ichọkọ ichit lek uwop kan̄.”

¹⁴Mgbọ Ogwu Òkaan̄ Unye Geelek oyiyalabe ebi ubọọn̄ cha, ọmọ îrọ ibot awo irep igwook me inyọn̄ ogoon̄ Jalimon.

¹⁵Ogoon̄ Basan ìre ogoon̄ eyi Awaji; ikpele ogoon̄ òkaan̄ owuwa otu me inyọn̄ kan̄.

¹⁶Enyi ebi ìkitọbọ ebum me inyọn̄ ogoon̄ Basan, keke orọ enyi ekimin ejit me lek ebi ìkitọbọ ebum me inyọn̄ ogoon̄ Sayọn, eyi Awaji ogobobe ikiluk me inyọn̄ kan̄? Me atikọ, Okumugwem môluk me inyọn̄ ogoon̄ Sayọn ire mgbọ geelek.

¹⁷Ogwukaan̄-ene înan̄a me Saina ikọp ininin̄ ere mbuban; uji akọn̄ Awaji ìre akọp obop akọp obop, mè obop obop.

¹⁸Înene ogoon̄ ubene ubene ya, mè ikwọọk ebi îtetbe me akọn̄ igbaalek, mè ikibọkọ mkpukpe me ubọk ebi ene; îbọkọ si me ubọk ebi ìfefieek inan̄a me lek kan̄; inyi Okumugwem Awaji môluk me ere ya.

¹⁹Ìtọn̄ Ogwukaan̄-ene usen geelek, mije, ọmọ okibeme uyọrọlek kiji; ọmọ ore Awaji ogwu òkinyan̄a eji.

²⁰Awaji kiji ìre Awaji òkinyan̄a ene; Ogwukaan̄-ene Okumugwem ore ogwu òkirọ eji enwọnọ mkpa.

²¹Awaji môkpukpuku ibot ebi ochicha kan̄; ibot ebi ìtetet lek inye ikije me oniin̄ eyi ijo inu kiban̄.

²²Ogwukaan̄-ene îtumu ibe, “Mâsa ebi ochicha kinyi me Basan inu; mâsa ema me ejit okwaan̄ isibi inu,

²³ufuna enyi mêkpan̄ ema, mè iwook me emen eje kiban̄; ibo kinyi si môlaka eje kiban̄ ubọk ema ekọtbe.”

²⁴Jei Awaji, otutuuk ene mîmun̄ ubọk ebi kwun̄ ekije me onineen̄ inu; ubọk ekije me onineen̄ eyi Awaji ogwu Ubọọn̄ n̄a inin̄ Uwu Mbuban kan̄.

²⁵Ebi ìkikọt okwa eje me isi; ebi ìkikwak nkwukwak echi olik eje me udun̄; nsabọn ibaan̄ ekekikwak ekpete ije me etete.

²⁶Ekikọt ibe, “Ìtọn̄ Awaji me emen ikpele ntitiin̄ ebi eyi kan̄; ìtọn̄ Okumugwem, enyi ebi owot iman kè Ijeren.”

²⁷Otoko kè Benjamin, òre otoko ogwu ijija, oje me isi; ebi ibot otoko kè Juda me ukpa kiban̄ ejeje igọọk; ebi ibot otoko kè Jebulọn mè ebi ibot otoko kè Nafitali enenigọọk.

²⁸Jei Awaji, jeen̄ unye kwun̄; jeen̄ unye ya osabe inyan̄a eji mgbọ òraraka.

²⁹Bak me lek Uwu Mbuban kwun̄ okupbe me Jeruselem, ebi ubọọn̄ mîniche uche inyi owu.

³⁰Gana ikọ nyi Ijipiti, anam oron ya òluk me emen anyiaan̄; gana ikọ nyi ebi ikpele ido cha, ebi ìkup kubọk urum orie eriembuuk òkirieen̄ echi asabọn; rọ inyi ema egele egwook enyi owu, mè esa alata okuket kiban̄ ejet owu; yiyala ife cha, ebi ìkima ititim akọn̄.

³¹Ebi otuchieen̄ mkpulu mênan̄a me Ijipiti inu; ebi Etiopia mêbene ubọk kiban̄ iriaak Awaji.

³²Ebi ido geelek ìkup me linyọn̄, ìkọt okwa ìnyi Awaji; ìkọt itọn̄ ìnyi Ogwukaan̄-ene,

³³ogwu keya òkikọp me akpabin inyọn̄; me akpabin inyọn̄ eyi îrombe karake akat; ìgban̄, òkisa ikpele ida kan̄ inyi ida.

³⁴Ìtumu ìsibi ibe Awaji mikaan̄ unye; ọmọ ore ubọọn̄ òkikpulu otutuuk ido ebi Ijeren; akpabin inyọn̄ îjeen̄ ibe ke Awaji îkaan̄ unye.

³⁵Awaji ebi Ijeren îmin nnyirinya me lek enenen me Uwu Mbuban kan̄; ọmọ okinyi ebi eyi kan̄ unye mè efuuk. Itọn̄ ikup inyi Awaji!