Read obolo Itọn̄ 69 Bible Online

Itọn̄ 69 - obolo bible

Itọn̄ 69

¹Nteme òkup inyi ogwu òjeen̄ okwa: Igọọk me ida okwa “Lili.” Okwa kè Debit. Jei Awaji, nyan̄a emi ma! Mun̄ îmeen̄ emi ire ebek.

²Nnwaan̄ ikam me emen utek; kpunu ijọn̄ ònyenye geege ere mbakeke; nrọn̄ me emen irem; ekoon̄ otọtọp ichit emi.

³Efuuk îta emi me owot inyi itataan̄ ukpo igwen owu; amọn îriaan̄ emi me ebek; chieen̄ îyok emi inyi ikukup ikikpọ ibe owu Awaji n̄a ònonyan̄a emi.

⁴Ebi ìchacha emi me ikpak mîwa igak otu ifuk ukut ijeek ibot n̄a; ebi ìkiweek ikpakpan̄ emi ìre ebi unye ebi unye; ema ebe emi ǹyaka inu ikarege ǹchichiin̄ ǹnyi ema.

⁵Jei Awaji, owu oriọọn̄ ibe ke emi mbubut; kpunu si inu nrọbe ilọ òlelet me lek kwun̄.

⁶Jei, Ogwukaan̄-ene Okumugwem Ogwukaan̄ Inyọn̄ mè Ijọn̄, kachieek ibe ǹsa esip ǹtet ebi ìtoon̄ owu ejit me lek; jei Awaji ebi Ijeren, kachieek ibe ǹsa esip ǹtet ebi ìkitọbọ ebum inyi owu.

⁷Mîrọ emi inu ochak bak me lek kwun̄, esip îjot igak emi isi.

⁸Ebi ngwan̄ n̄a emọnọ emi kire ogwu ichen; bọn nga n̄a gaalek eyaka inimọnọ emi kubọk ogwu ofifi ido.

⁹Ulọk nkaan̄be me lek uwu kwun̄ ìkiyok emi me ejit kire ukan̄; unyechieen̄ ekinye inyi owu ìkinirurọn̄ọ itoon̄ emi me lek.

¹⁰Nsikisiki lek me isi kwun̄, mè ijin otu, ebi ene mîra ikisa eya si ikinye chieen̄ inyi emi.

¹¹Ìrere ekwut ufieejit ke nsa ibala lek, ema ekichachak emi ochak si.

¹²Ebi ìkup me lek oniin̄ ekilolo emi; ebi usa-miin̄ si ekikọkọt emi me lek okwa.

¹³Eyi n̄a, îre owu, Okumugwem, ke nkiriaak uriaak ikpọ isi; soso, Awaji, me mgbọ înenbe owu me lek, rọ otu uriaak n̄a nyi emi, bak me lek imumechieen̄ kwun̄ òkibia ene me lek; mè use ochieekbe inyanyan̄a ene, eyi ìkakilọ.

¹⁴Taba emi sibi, ufuna nkagwọt ìchep me utek; nyan̄a emi me ubọk ebi ochicha n̄a, mè nyan̄a emi sibi me emen irem.

¹⁵Kachieek ibe ekoon̄ itọp ichit emi; kachieek ibe ǹgen ǹchep me emen irem; kachieek si ibe udọn̄ mkpa ikama otu imen emi.

¹⁶Jei Okumugwem, rọ otu uriaak n̄a nyi emi, mije, imumechieen̄ okikaan̄ me lek ene mgbọ geelek înwọn; sa me ikpele ejit nsan kwun̄, yaka isi jeen̄ emi.

¹⁷Kada isi kwun̄ ìsan̄a me lek gwun̄ ikwaan̄ kwun̄, mije, uyọrọlek îtet emi enenen; gwat lek rọ otu uriaak n̄a nyi emi.

¹⁸Je gbet emi lek, mè faka emi sibi; nyan̄a emi sibi me ubọk ebi ochicha n̄a!

¹⁹Owu oriọọn̄ unyechieen̄ nkibọkọ, mè esip òkitet emi, mè ulibi òtata emi me lek; owu omọọn̄ otutuuk ebi ochicha n̄a.

²⁰Unyechieen̄ enyibe emi òkifuku emi owot, mânigak iweek; ntoon̄ ejit ibe ke mêto emi njijin, ire, kpunu ogwu mmun̄be; mkpọ chieen̄ ibe ke môkaan̄ ebi mêkatbe emi ejit, ire, ǹkamun̄ ene geege.

²¹Mgbọ uraafiọọn̄ otakabe emi, ema enyi emi inorie òkijajat kubọk olulut; mgbọ ebek orakbe emi, ema enyi emi miin̄ agburu.

²²Tele mè inorie kiban̄ inwaan̄ ema me ebek; tele si mè inorie ijọk ema ekirie ire inu òboda ema ito.

²³Tele mè chieen̄ kiban̄ idun, inyi ema ekayaka ìmọọn̄ inu; rọ mè ebon kiban̄ ikwala, mè iyiyeke mgbọ geelek.

²⁴Gbuku uga unaan̄-ejit kwun̄ gwook ema me lek, mè kachieek ema elibi enwọnọ uyok uyok unaan̄-ejit kwun̄.

²⁵Tele ebi ene eyat eta me ama kiban̄, mè ene geege ikaluk me uwu kiban̄.

²⁶Mije, ema mîsisaak ebi owu osulube osusut, mè ilo ebi owu otapbe unan me lek.

²⁷Fuk ikan ijo irọrọ kiban̄ tutọmọ ema me ibot, mè kanyanyan̄a ema mgbọ geege.

²⁸Tuku erieen̄ kiban̄ san̄a me emen ikpa eyi ugwem; kafuk ema ìtap me otu ifuk ebi ata irọrọ.

²⁹Ire, emi gwa ǹkibọkọ ukwook mè ujaralek; jei Awaji, nyan̄a emi, mè bene emi gwuun̄.

³⁰Mâkọt okwa isa itọn̄ erieen̄ Awaji; mâbe ọmọ onirọ, mè isa me ikeya imin ọmọ.

³¹Eyi môtọp Okumugwem me lek igak inyinyi orie eriembuuk, mè isasa orie eriembuuk òmimin mè ikaan̄ iko me ibot, mè ikpa me ukot, igwa ngwugwa inyi ọmọ.

³²Ebi ekirọ ikeme isimun̄ eyi, ejit môbele ema; ebi ìkitọbọ ebum inyi Awaji isimun̄ si, ejit môtop ema.

³³Okumugwem ìkinọ uriaak ebi una; ìkakiwuuk ebi eyi kan̄ ebi ìkup me mkpọn.

³⁴Inyọn̄ mè ijọn̄, mè okwaan̄, mè inu geelek òkup me emen kiban̄, ìtọn̄ Okumugwem.

³⁵Awaji mônyan̄a Sayọn, mè ikpọk inama ama ebi Juda; bọn ikwaan̄ kan̄ mêluk me ere ya, mè ibọkọ ikaan̄.

³⁶Bọn ebi ikwaan̄ kan̄ mêbọkọ ere ya ikaan̄ si me ìrot; ebi ìmama erieen̄ Okumugwem mêluk me ere ya.