Read obolo Itọn̄ 7 Bible Online

Itọn̄ 7 - obolo bible

Itọn̄ 7

¹Okwa ito kè Debit, eyi îkọtbe inyi Okumugwem bak me lek kè Kus ogwu Benjamin. Jei Okumugwem, Awaji n̄a, ubọk kwun̄ ke ntap ibot; taba emi sibi, mè nyan̄a emi me ubọk ebi ìkigọọk emi ibesak emi unan;

²inyi ema ekachim emi kubọk egbe àtat, mè ìdut emi ìsa ìsi ìgwak ìtaka, me ere kpamun̄be ogwu òbonyan̄a emi.

³Jei Okumugwem, Awaji n̄a, ire nrọ inu yi etoon̄be emi, mè ìre ǹrọrọ ene ilọ;

⁴ire nleke ogwu une n̄a ifiin̄, mè ìre ǹrọrọ ogwu ochicha n̄a inu ikpak me nnaan̄,

⁵tele mè ebi ochicha egọọk emi, mè esoon̄ emi etet; tele mè ema ebọn̄ emi eto me ijọn̄, mè ekpan̄ emi, mè esa ata erieen̄ n̄a echọk me ijọn̄.

⁶Ire, ire ìkare ikeya, jei Okumugwem, naan̄ ejit, mè tọbọ jibi; nan̄a keke, na kwek unaan̄-ejit ebi ochicha òkiyok me lek n̄a; soso nan̄a keke nin̄ emi lek; na sibi unen oyerebet nyi emi.

⁷Titiin̄ ebi ido geelek gban kana lek kwun̄, mè nene ogboon̄ ubọọn̄ kwun̄ me emen inyọn̄ kweek irek sibi ema oyerebet me ibot.

⁸Owu, Okumugwem, okisibi oyerebet me ibot otutuuk ebilene; sibi emi oyerebet me ibot gọọk me lek unen eru n̄a, mè ugwem òtatat eyi nkiluk.

⁹Owu ìre Awaji òkirọ inu ònenen; owu oriọọn̄ ejit kiji mè ekiket kiji; kwek inu ikpak ebi ijo ife ekirọ; ire, kpọ chieen̄ me lek ebi ata ife.

¹⁰Awaji, ogwu òkinyan̄a ebi kpekaan̄ ofiaan̄ me ejit, ọmọ ore agbọ òkikput emi lek.

¹¹Awaji ìre ogwu unen oyerebet; ìkinaan̄ ejit usen geelek inyi ebi ijo irọrọ.

¹²Ire ema kpenwene ugwem, Awaji môwat oge akọn̄ kan̄ ireke; îra inwun ogbaan̄ kan̄ isan̄a, mè ibọp inen̄e isun̄ ikikpọ.

¹³Îkpulu si nroon̄ akọn̄ òkikpan̄ ene ikwaan̄, mè itet oraan̄ kan̄ ukan̄ okisak me lek itat ikpọ ebi ìkigọọk emi.

¹⁴Ìkpọ, ogwu òro ijo înin̄ owot ijo inu, uman inu ikpak otetet, imaman ofiaan̄.

¹⁵Îrọkọ udọn̄, mè inen̄e isun̄ iban ofifi ene; ire, ọmọ gaalek oyaka inan̄a irọn̄ inin̄ emen udọn̄ kan̄.

¹⁶Inu ikpak kan̄ ìbogwook ọmọ me ibot; inu afa kan̄ ìboyaka itoon̄ si me eden̄ ibot kan̄ gaalek.

¹⁷Ire emi, mâbe Okumugwem usọ, mije, îrọ inu ònenen; mâkọt okwa itọn̄ Okumugwem, Ogwu Òbebene Ichit.