Read obolo Itọn̄ 72 Bible Online

Itọn̄ 72 - obolo bible

Itọn̄ 72

¹Okwa kè Solomọn. Jei Awaji, jeen̄ ogwu ubọọn̄ ubọk owu okisibi unen oyerebet kwun̄, mè rọ ọmọ iriọọn̄ ata irọrọ kwun̄.

²Kè ọmọ isa ata irọrọ ikpulu ebi eyi kwun̄, mè ikisibi oyerebet ònenen inyi ebi ekitutuku.

³Kè ijọn̄ isibi inu ubọọn̄ bene me lek ogoon̄ re lek orioon̄; kè ebi eyi kwun̄ ekerọ ata irọrọ.

⁴Kè ogwu ubọọn̄ isibi unen oyerebet inyi ebi ugbọọn̄ me etete ebi kwun̄, mè inyan̄a ebi una isibi, mè ikpukpuku ebi ìkirọ ikeme ene.

⁵Jei Awaji, kè ebi eyi kwun̄ etọbọ ebum enyi owu me ukot geelek, kubọk ura mè onyan̄ ebekup ire mgbọ geelek me akpa isinyọn̄.

⁶Kè ukot mgbọ eyi ogwu ubọọn̄ ire ata mgbọ inyi ebi eyi kan̄, kubọk ibot okirọ mbubet egbọbe itibi ijaan̄; kubọk ibot otu ile okirep imem ijọn̄.

⁷Kè ata irọrọ iso ere me ukot eyi kan̄, mè esuuk ikup ire mgbọ geelek, mgbọ geelek.

⁸Kè ama ubọọn̄ kan̄ iwele inan̄a me okwaan̄ ge ichak me ofifi okwaan̄, mè inan̄a me okwaan̄ Yuferetis iwele ichak me ntutun̄ ere geelek me linyọn̄.

⁹Kè ebi ìluk me emen èwê etọbọ ibot enyi ọmọ, mè ebi ochicha kan̄ erurọn̄ọ me achiaan̄!

¹⁰Kè ebi ubọọn̄ Tasis mè ebi ubọọn̄ lek achọ ekpe mkpukpe enyi ọmọ; kè ebi ubọọn̄ Sieba mè ebi ubọọn̄ Seba esa mkpukpe ejet ọmọ.

¹¹Kè otutuuk ebi ubọọn̄ erurọn̄ọ me isi kan̄, mè otutuuk ido ekesi ikwaan̄ enyi ọmọ.

¹²Ọmọ okinyan̄a ebi ugbọọn̄ ìkigwen ọmọ ibe ininyan̄a ema, mè ebi una, mè ebi kpekaan̄ ogwu òkitap ubọk inyi ema.

¹³Ọmọ okito ebi ijo irek mè ebi ugbọọn̄ njijin, mè ikinyan̄a ebek ugwem ebi una.

¹⁴Ọmọ okinyan̄a ema me ubọk ebi ìkitutuku ema, mè ebi ìkirọ ema inu me lek afa afa; ugwem kiban̄ îkup me unye otu ewe me lek kan̄.

¹⁵Kè ogwu ubọọn̄ iluk ujọn̄ọ ugwem; kè ebi Sieba esa alata araran̄ ekpe mkpukpe enyi ọmọ; kè ebi ene eriaak uriaak mgbọ geelek me ibot kan̄, mè ebeek usen geelek ibe Awaji igbana ọmọ!

¹⁶Kè akpa iwa ijot ama gboi, mè inu ewopbe itibi ichit inyọn̄ ogoon̄ gbak; kè ito mfut igak lek kubọk echi òkito me lek ogoon̄ ido Lebanọn; mè ebilene emumana ejot ama gbak kubọk inwan̄ okitibi ijot oron.

¹⁷Kachieek ibe erieen̄ kan̄ ichep; kè etip kan̄ itaan̄ ijọn̄ọ mgbọ enenen; kè otutuuk ido ekebeek ibe Awaji igbana ema kubọk îgbanabe ogwu ubọọn̄.

¹⁸Itọn̄ ikup inyi Okumugwem, Awaji ebi Ijeren; ọmọ gaalek ore ogwu òkirọ uyeke inu.

¹⁹Ìtọn̄ erieen̄ kan̄ òmimin ìre mgbọ geelek; kè otutuuk linyọn̄ etọn̄ ọmọ; Ikup ikeya! Ikup ikeya!

²⁰Ere keyi ke uriaak kè Debit gwun̄ kè Jesi ota.