Read obolo Itọn̄ 73 Bible Online

Itọn̄ 73 - obolo bible

Itọn̄ 73

¹Okwa kè Asafu. Me atikọ, Awaji înwọn enenen inyi ebi Ijeren; înwọn inyi ebi ejit otanabe me lek kan̄.

²Sọntiik osik emi kpamayaka itoon̄ ejit me lek kan̄; kpamayaka ichieek si me lek kan̄.

³Mije, mmin ejit me lek ebi ugumulek, mè ikaan̄ chieen̄ ile mgbọ inu okije ijaan̄ me lek ebi òkpaka ibot.

⁴Ema kpekikaan̄ ufiak; lek kiban̄ ìkinyenye, mè òtibi ufuk òjot.

⁵Ema kpekibọkọ ukwook kubọk otutuuk ebilene ekibọkọ; uyọrọlek ìkakitet ema kubọk îkitet otutuuk ebilene.

⁶Eya orọ, ema ekigumu lek kubọk etap akalari me ebek, mè èkerọ inu afa afa mgbọ geelek.

⁷Ema mîmiin̄ ufuk mege ufuk osisibi ema me chieen̄, ire, ijo otitọt ojot ema ejit.

⁸Ema ekirọ ebi ofifi ife ochak, mè ikitumu ijo inu ema eberọ; ema ekigumu lek ikitọt irọrọ ikeme ebi ofifi ife.

⁹Ema ekitumu Awaji òkup me inyọn̄ ifiat, mè ikitọ ikọ inyi ebilene me linyọn̄.

¹⁰Eya orọ, ebi eyi Awaji ekakana igọọk ema, mè ikichieek inu geelek ema ekitumu.

¹¹Ema ebi òkpaka ibot cha, ekitumu ibe, “Awaji ìbojeje iriọọn̄ ni? Ogwu Òbebene Ichit ìbojeje iweek imun̄ ni?”

¹²Ubọk ebi òkpaka ibot ekupbe ire eya, kpekimun̄ ufialek geege; ema mîbọọn̄ ubọọn̄, mè ikpọkpọ ikibọọn̄ si itoon̄ urot.

¹³Ǹkifafiat mgbọ ichep ikiluk ugwem òtatana; me ikike ke nkikaak ubọk ijeen̄ Awaji ibe ǹkalọ.

¹⁴Uyọrọlek ìkatele emi usen geege; ewelegwe geelek ǹkibọbọkọ osusut.

¹⁵Ire ntumu inu òkup ikecha, ǹkifiaan̄ nsabọn ebi eyi kwun̄ ebi ìbenu me mgbọ òkup me isi.

¹⁶Nsa ikọkọt ikeek inu yi itet, ire, îyọt me lek n̄a enenen.

¹⁷Ire, mgbọ nnin̄be Uwu Mbuban Awaji, mgbọ ya ke nnigobo itet inu òborọ ebi òkpaka ibot me okputut ugwem kiban̄.

¹⁸Me atikọ, Awaji ìbosun̄ ema me ere òkikwakwaak, mè irọ ema erurọn̄ọ ekwaan̄ esan̄a kpai.

¹⁹Mgbọ yaage ke mêfiat ema isan̄a kpai; ikpele ukpook mônin̄ inyi ema me okputut ugwem kiban̄.

²⁰Okumugwem, owu ositọbọ ijibi, ebi òkpaka ibot mêniniin̄ ichieen̄ kubọk ene okinan̄a ilaak ewelegwe, mè iwuuk ilaak îmun̄be mè eririeen̄.

²¹Mgbọ ejit oyokbe emi me lek kiban̄, owot si ofukube emi,

²²nkana mbubut kubọk anam oron; kpunu inu geege nkọtbe igobo itet ofolek kwun̄.

²³Ire, ǹkanan̄a ìtele owu mgbọ geege; owu òtetet emi me ubọk n̄a agan̄ ulom ikaan̄.

²⁴Nteme kwun̄ ke osa ikijeen̄ emi oniin̄; òta kan̄, owu môto emi me irek umin.

²⁵Ekene ke nkaan̄ me emen inyọn̄, ilọ me lek kwun̄ Awaji? Kpunu si inu geege mweekbe me linyọn̄ igak owu.

²⁶Akpalek n̄a mè ejit n̄a môwọ, ire, Awaji ore unye n̄a; ọmọ gaalek ore ogwu mâweekbe ire mgbọ geelek.

²⁷Me atikọ, ebi ìkpekpebe owu lek me lek kpebelọlọ ichechieen̄ ita; ebi kpegwuun̄ isi ikeke inye me lek kwun̄, owu môjijaka.

²⁸Ire, me lek n̄a, înwọn ikukup iriaak Awaji me lek, mè inwọn si itatap ibot me ubọk Okumugwem, inyi mâkikpa inu echi Ogwukaan̄-ene orọbe isibi.