Read obolo Itọn̄ 74 Bible Online

Itọn̄ 74 - obolo bible

Itọn̄ 74

¹Ijeen̄-inu kè Asafu. Jei Awaji, ìre òbojijit eji ire mgbọ geelek? Keke orọ unaan̄-ejit kwun̄ oyokbe me lek kiji ebi ìrere arọọn̄ owu okiriọọn̄ ubọk ikpukpo?

²Kawuuk ebi eyi kwun̄; ebi owu ogobobe karake akat isun̄ inyi lek kwun̄; ebi owu onyan̄abe isibi ibe ere otoko eyi kwun̄; kawuuk si ogoon̄ Sayọn, ere mgbọ owu okiluk.

³Sibi na je kana kpọ ere ejijakabe isan̄a; ebi ochicha kiji mîfiat inu geelek òkup me Uwu Mbuban isan̄a kpai.

⁴Ebi ochicha kwun̄ mîkput okput unwọọn̄ ntim-mkpan̄ me emen Uwu Mbuban; ema mîgwuun̄ egop kiban̄ kire inu ijejeen̄ ibe ke ema mîtim ikpan̄.

⁵Ema mîgbugbọ ere igwook kubọk ebi ìcho uti ekibene otuban ichon uti me oron.

⁶Otutuuk uti ekọbe lek ijaan̄ cha, ema mîsa otuban òkup esese esese ibọn̄ ikpukpuku isan̄a kpai.

⁷Ema mîjijaka Uwu Mbuban kwun̄, mè ichim ukan̄ itap me lek; ema mîchaka mbuban me ere ekitọbọ ebum inyi owu.

⁸Ema ekibe ke ema mêjijaka eji isan̄a isi ge, mè iwọp otutuuk ere mbuban me ama kiji itaka iriọk.

⁹Owu òkayaka ìrọ uyeke inu cha geege okirọ inyi eji; eji kpeyaka ikaan̄ ebi nriran geege; ene kiji geege ìkariọọn̄ mgbọ inu chi obokup ire.

¹⁰Jei Awaji, kpa mgbọ ke ogwu ochicha obochak owu ire? Ìre ema ebechim owu ubọk me chieen̄ ibia ire mgbọ geelek ni?

¹¹Keke orọ okpọkpọ ikat ubọk me lek ikikpọ, òkasut ema osusut? Keke orọ obenbe ubọk kwun̄ itap me agbagba ukot, mè ikikpọ ife chi chieen̄ chieen̄?

¹²Awaji kiji, owu ore ubọọn̄ karake akat; owu okinyan̄a eji owuwa mgbọ me lek ijọn̄ yi.

¹³Owu osa ikpele unye kwun̄ iche okwaan̄ okpọkọ iba, mè ikpukpuku ibot mgbugbo anam ejit okwaan̄.

¹⁴Owu okpan̄ mgbugbo anam ejit okwaan̄ ya, mè isa ufuk kan̄ inyi ebi kè anam oron ìluk me emen èwê esa erọ inorie.

¹⁵Owu orom ogbuuruk mè agbugbuk ibe ikigbuk; owu oyaka irọ mè okwaan̄ òkigbugbuk ichiaak ita.

¹⁶Owu orom eririeen̄ mè irom egwe; owu osun̄ ura mè inu geelek òkinyi utoon̄ me irek kiban̄.

¹⁷Owu osun̄ okike eyi linyọn̄, mè irom mgbọ ura mè mgbọ ibot.

¹⁸Jei Okumugwem, kawuuk ibe ke ebi ochicha mêkichak owu, ke ebi kperiọọn̄ owu mêkikpọ owu isiki chieen̄.

¹⁹Ebi eyi kwun̄ kpekọt inyan̄a lek kiban̄; eya orọ, kayaka ema ìtap me ubọk ebi ochicha; kawuuk ebek ugwem ebi eyi kwun̄ ebi ekisisaak ìre mgbọ geelek.

²⁰Keek inyan̄a-ibot kwun̄ melek kiji; kpọ, inu afa òkirọ me ndudun ere geelek me inyọn̄ ijọn̄ yi.

²¹Kachieek ibe esip itet ebi ekitutuku; rọ mè ebi ugbọọn̄ mè ebi una etọn̄ owu.

²²Jei Awaji, nan̄a keke, na gbini ikọ ibot kwun̄; kawuuk ibe ke ebi kperiọọn̄ owu ekichak owu ochak otutuuk usen.

²³Kawuuk ukpo unaan̄-ejit ebi ochicha kwun̄ ekitaan̄; kawuuk okput ebi oriara kwun̄ ekikput mgbọ geelek.