Read obolo Itọn̄ 76 Bible Online

Itọn̄ 76 - obolo bible

Itọn̄ 76

¹Ìkup inyi ogwu òjeen̄ okwa: Mêsa nkwukwak echi olik ikwak. Okwa kè Asafu. Ebekikọkọt. Mîriọọn̄ Awaji me Ijeren; erieen̄ kan̄ îtaan̄ etip me Juda.

²Ìluk me uwu kan̄ me Jeruselem, me inyọn̄ ogoon̄ Sayọn.

³Ere ya ke îfaan̄ oraan̄ ebi ochicha ukan̄ okisak me otu cha, mè ifiat si agbọ mè oge akọn̄ mè otutuuk nroon̄ akọn̄ kiban̄.

⁴Jei Awaji, umin kwun̄ îgana; owu òkije òrirọ òrirọ ika inan̄a me inyọn̄ ogoon̄ ere okupbe itim ikpan̄ ebi ochicha kwun̄.

⁵Mîtet ebi akọn̄ kiban̄ ebi unye ibọkọ inu geelek ema ekaan̄be; ema elalaak ilaak mkpa; kpunu ene geege me lek kiban̄ òkọkọt ibene ubọk.

⁶Mgbọ owu Awaji kè Jekọp oramabe ema, inyinya kiban̄ mè uji akọn̄ mè ebi ìkup me emen erururọn̄ọ ikwaan̄ isan̄a.

⁷Ire owu Okumugwem, otutuuk ene ekitetet ukpook kwun̄; ejit isinaan̄ owu, kpunu ogwu òkikọt ikeke me isi kwun̄.

⁸Owu òkikup me emen inyọn̄ ikifieek oyerebet; ebi linyọn̄ mîra itet ukpook; kpekisisik lek.

⁹Ema kpekisisik lek mgbọ owu Awaji onan̄abe ikeke ikifieek oyerebet isa ikinyan̄a ebi ekitutuku me linyọn̄.

¹⁰Ejit ebilene ekinaan̄ môsa itọn̄ ijet owu; ebi mênwọnọbe unaan̄-ejit kwun̄, owu môbọp ema ikam.

¹¹Ìchieek Okumugwem Awaji kinyi use, mè ìrọ inu ya enyi echieekbe ọmọ use; enyi otutuuk ebi ìkiluk igbet lek kan̄, ìsa uche kinyi ìjet ọmọ, Awaji, ogwu ekitetet ukpook kan̄.

¹²Ọmọ okigele ebi mkpulu ebi ìkigumu lek isiki, mè ikitap ebi ubọọn̄ ilile me linyọn̄ ukpook me emen.