Read obolo Itọn̄ 77 Bible Online

Itọn̄ 77 - obolo bible

Itọn̄ 77

¹Ìkup inyi ogwu òjeen̄ okwa: Ìkup inyi Jedutun. Okwa kè Asafu. Mbọn̄ ukpo igwen Awaji; mbọn̄ ukpo enenen igwen ọmọ, inọnọ ida ukpo n̄a;

²Mgbọ uyọrọlek otetbe emi, mweek Okumugwem; kpunu ogwu òkọkọt ikat emi ejit; otutuuk eririeen̄, ǹkatetet ubọk ìkaan̄ irariaak uriaak inyi Okumugwem.

³Nsikikeek Awaji, ìkirọ emi lek nyanyanya; mgbọ nsikeek inu ofolek kan̄, ǹkakikọkọt ìkup.

⁴Îrọ ibe chieen̄ n̄a ifat me eririeen̄; ǹkakọt ìlaak; lek îwọ emi enenen, mè itap emi mbuuk.

⁵Nnenikeek oka oka usen cha òraraka, mè ikeek si acha ukot oka mgbọ cha òraraka.

⁶Nkeek si mgbọ cha otu n̄a okire okwa okwa otutuuk eririeen̄; emen ejit n̄a okekisisaak emi; nkekido lek n̄a ibe:

⁷“Ìre Ogwukaan̄-ene ìbokpọkpọ ijit eji ni? Sà ìre isi kan̄ ìkpoyaka itọtọn̄ọ me lek kiji ofifi mọnọ?

⁸Ìre imumechieen̄ mgbọ geelek kan̄ îta ni? Sà ìre use kan̄ îchieekbe eji ìkayaka ìkeke mọnọ?

⁹Ìre Awaji ìwuwuuk ikakaan̄ ejit nsan me lek kiji ni? Sà ìre ọmọ ìkayaka ìkaan̄ ejit nsan, bak me lek înaan̄be ejit mọnọ?”

¹⁰Nnenibe, “Inu òtataka emi lek ichit ìre ke Awaji, Ogwu Òbebene Ichit ìkayaka ìsa unye kan̄ ìrọ inu me ibot kiji.”

¹¹Mâkikeek ikpele inu echi owu Okumugwem orọbe; mâkeek uyeke inu cha orọbe me ukot ikaan̄.

¹²Mâkikeek otutuuk inu owu orọbe; mâkeek si nke nke ikwaan̄ cha osibe.

¹³Jei Awaji, oniin̄ kwun̄ ìre oniin̄ òkup me mbuban; kpunu awaji òmimin ibet lek kwun̄ Awaji kiji.

¹⁴Owu ore Awaji òkirọ uyeke inu; owu ojeen̄ ebi ido geelek ikpele unye okaan̄be.

¹⁵Owu osa unye kwun̄ inyan̄a bọn kè Jekọp, mè bọn kè Josefu ebi eyi kwun̄ isibi.

¹⁶Jei Awaji, mgbọ okwaan̄ otoon̄be chieen̄ me lek kwun̄, ukpook îtet, irem okwaan̄ ototo ejit.

¹⁷Mgbọ ya, oduku inyọn̄ îchimi ibot igwook; isinyọn̄ ososook me akpabin inyọn̄; omumen-inyọn̄ omumumen iso agan̄ geelek.

¹⁸Isinyọn̄ okekigọt ida kan̄ inunuun̄ ikije; omumen-inyọn̄ omumumen itoon̄ ere gbei me linyọn̄; ijọn̄ oraran, mè isisik jiki jiki jiki.

¹⁹Owu oje isaba okwaan̄, mè ije itibi ugwuuk okwaan̄, ire, kpemun̄ akpat ukot kwun̄.

²⁰Owu osa ebi eyi kwun̄ ije kubọk urum arọọn̄, sa me ubọk kè Mosis melek kè Erọn.