Read obolo Itọn̄ 8 Bible Online

Itọn̄ 8 - obolo bible

Itọn̄ 8

¹Okwa kè Debit. Okwa keyi ìnan̄a me ikpa okwa ogwu òjeen̄ okwa. Mêsa uneen̄ ebi Gat ikwak. Jei Okumugwem, Òkaan̄ kiji, erieen̄ kwun̄ îkaan̄ umin ikana otutuuk linyọn̄. Owu orọ inyi umin kwun̄ isibi utoon̄ me akpabin inyọn̄.

²Ikerere asa nsabọn, mè ebi ìkup me otu ebe, ema mêkitumu ikọ umin kwun̄; ikọ otu kiban̄ îjeen̄ ebi ochicha kwun̄ mè ebi ìkije ikeme owu ibe ke owu okaan̄ unye enenen; mije keyi, kpunu ema ene geege òbokọt ikeke ida owu.

³Nsikimun̄ akpabin inyọn̄, inu ubọk kwun̄ orombe, onyan̄ mè ntoronyan̄ osun̄be ikam me irek kiban̄, îkikaan̄ emi ukpook; nra ikikeek ibe,

⁴ìre ebilene ikike ekup me lek keke mọnọ, eyi owu okikpọ ema chieen̄ me lek ikeyi, mè ikikaan̄ ata ekiket ibak ema?

⁵Irek otobe ema îbene enenen; sọntiik ke îsa isiki igak irek kwun̄; owu onyi ema ikpele umin mè ulibi kubọk ebi ubọọn̄.

⁶Owu osa ema ito me ibot inu geelek orombe, mè itap otutuuk inu chi geelek me irak ubọk kiban̄.

⁷Bene me lek ebi kè arọọn̄ mè ebot, mè eriembuuk mè anam oron geelek,

⁸ire lek unọn òwulu me inyọn̄, mè ebi kè irin̄ mè inu geelek òluk me emen okwaan̄.

⁹Jei Okumugwem, Òkaan̄ kiji, erieen̄ kwun̄ îkaan̄ umin ikana otutuuk linyọn̄.