Read obolo Itọn̄ 83 Bible Online

Itọn̄ 83 - obolo bible

Itọn̄ 83

¹Ebekikọkọt. Okwa kè Asafu. Jei Awaji, kakpọkpọ ìriaan̄ ere; san̄a amọn; kakpọkpọ ìkup ikeya ìkikpọ!

²Kpọ, ebi ochicha kwun̄ mîgwu lek ikom inyi akọn̄; ebi ìchacha owu mêkinyan isi inyi owu.

³Ema mêkitọt otitọt me nlelet ibak ebi eyi kwun̄; mêkitọt otitọt ibak ebi owu okibem.

⁴Ema ekibe, “Ìna eji egen̄ ido ebi Ijeren esan̄a, inyi erieen̄ kiban̄ ichep ire mgbọ geelek.”

⁵Kpọ, ema mîbọp oru, mè inyan̄a ibot igbagbaan̄ lek itọbọ inu akọn̄ me lek kwun̄, Awaji.

⁶Ema ìre ebi Edọm, mè ebi Isimen, mè ebi Mowabu mè ebi Aga.

⁷Ebi Gebali mè ebi Amọn melek ebi Amalek, mè ebi Filisia melek ebi ama Taya, òwa si me lek.

⁸Ebi Asiria si mîgbaan̄ ibọp melek kiban̄; otutuuk kiban̄ ekigọọk ebi Amọn mè Mowabu, bọn owot iman kè Lọt, ikeke.

⁹Awaji, soso, yaka ubọk gwook ema me lek kubọk orọbe ebi Midian, mè irọ si Sisera mè Jabin me okwaan̄ Kison.

¹⁰Owu okpan̄ ema isan̄a me Endọ, ema ekukup me ijọn̄ igọk ita kubọk ifin anam.

¹¹Rọ ebi ibot kiban̄ cha inu orọbe Orep mè Jebu; rọ ebi ìkikpulu ema inu orọbe Jeba me Jalimuna,

¹²ebi mgbọ ìbebe, “Eji ebọkọ ijọn̄ Awaji okaan̄be esa erọ eyi kiji.”

¹³Jei Awaji n̄a, chon ema kana kubọk mfuun̄, mè yiyala ema kubọk nchat inwan̄ efet okiben iwut ikana ere.

¹⁴Ike ukan̄ okitaka oron ile iriọk; ike alọm ukan̄ okibumu itaka lek ogoon̄,

¹⁵ikeya si, sa egwijo kwun̄ rieen̄ ema si chik, mè sa uramun̄ kwun̄ tap ema ukpook me lek.

¹⁶Jei Okumugwem tap esip deke ema me isi, mege ema mênube initọbọ ebum inyi owu.

¹⁷Soso, rọ esip itet ema, mè uga ukpook inin̄ ema me lek ire mgbọ geelek, mè ema ekwaan̄ eta.

¹⁸Rọ inyi ema eriọọn̄ ibe ke owu gaalek, ogwu erieen̄ kan̄ orebe Okumugwem, ore Awaji Ogwu Òbebene Ichit me otutuuk linyọn̄.