Read obolo Itọn̄ 84 Bible Online

Itọn̄ 84 - obolo bible

Itọn̄ 84

¹Ìkup inyi ogwu òjeen̄ okwa: Igọọk me ida okwa ebi Gat. Okwa bọn kè Kora. Jei Okumugwem Ogwukaan̄ Inyọn̄ mè Ijọn̄, uwu kwun̄ îjaan̄ uja enenen!

²Me atikọ, òkilọk emi, iin̄, ìkisoson emi lek irere Uwu Mbuban Okumugwem; ǹkisa otutuuk unye n̄a mè efuuk n̄a geelek ikọt okwa unwọọn̄ ikiweek owu Awaji ogwu òkup me ugwem.

³Kpọ, ebi kè agagawaji ikike mîweek uwu kiban̄ imun̄; ebi kè ùyọrọ mînama uwu kiban̄ me agba ntook kwun̄, ere ema mêkibọọk bọn kiban̄; Jei Okumugwem, Ogwukaan̄ Inyọn̄ mè Ijọn̄, owu ore ogwu Ubọọn̄ n̄a, mè ire si Awaji n̄a.

⁴Kpọ uga ubelejit òkup inyi ebi ìluk me uwu kwun̄; ema ekikọt okwa itọn̄ owu mgbọ geelek.

⁵Uga ubelejit okup inyi ebi owu orebe unye kiban̄; ebi îkiyok me ejit ijeje me ikpele oniin̄ isi itọbọ ebum inyi owu me ogoon̄ Sayọn.

⁶Ike ema ekije itibi nchat iteke ijọn̄ Baka, ema mîrọ iteke ya ikana ogbuuruk; aya otu ibot otatap ǹririeen̄ mun̄ igak ere ya.

⁷Ike ema ekije, unye kiban̄ ìyaka ikitatap inu isọkọ lek; ema mêsi ikeke me isi Awaji me Sayọn.

⁸Jei Okumugwem, Awaji Ogwukaan̄ Inyọn̄ mè Ijọn̄, nọ uriaak n̄a; Awaji kè Jekọp, soso, gban̄ utọn̄.

⁹Jei Awaji, kpọ chieen̄ me lek ogwu ubọọn̄; ọmọ ore agbọ òkikput eji lek; yaka chieen̄ kwun̄ kpọ isi ogwu owu ogobobe ito.

¹⁰Mije ikukup me uwu kwun̄ egwe ge gaalek îgak ikukup obop usen me ofifi ere; înwọn emi me lek ikekeke me agba isotu uwu Awaji n̄a ikisi ǹtiten̄e ikwaan̄, igak iluluk me uwu ebi òkpaka ibot.

¹¹Okumugwem Awaji ìre ura; ìkinyi utoon̄ me ugwem ebilene; ọmọ ore agbọ òkikput ene lek; ọmọ okinyi eji atata nnwọn kan̄, mè ikirọ eji ekaan̄ umin; kpunu ata inu geege Okumugwem okitele irọrọ inyi ebi geelek ìkirọ inu ònenen.

¹²Jei Okumugwem Ogwukaan̄ Inyọn̄ mè Ijọn̄, uga ubelejit òwa inyi ogwu geelek òtotoon̄ owu ejit me lek.