Read obolo Itọn̄ 85 Bible Online

Itọn̄ 85 - obolo bible

Itọn̄ 85

¹Ìkup inyi ogwu òjeen̄ okwa. Okwa bọn kè Kora. Okumugwem, owu onwọn eru me lek bọn kè Jekọp, ebi ìluk me ijọn̄ kwun̄; owu orọ inu ikpọk ije ijaan̄ inyi ema.

²Owu oben nrọ-nlọ ebi eyi kwun̄ isan̄a, mè itele otutuuk ijo irọrọ kiban̄.

³Owu oyaka unaan̄-ejit kwun̄ ito, mè itet uyok-ejit kwun̄ me lek kiban̄ ikaan̄.

⁴Jei Awaji, ogwu òkinyan̄a eji, sun̄ eji me oka irek kiji ya, mè tele inanaan̄ ejit inyi eji.

⁵Ìre owu mônaan̄ ejit inyi eji ire mgbọ geelek ni? Sà ìre unaan̄-ejit kwun̄ môkup nan̄a me ukot re me ukot ni?

⁶Ìre owu òkpoyaka irọ me eji egat ugwem, ufuna eji ebi eyi kwun̄ ekaan̄ unwọọn̄ me emen kwun̄ ni?

⁷Jei Okumugwem, jeen̄ eji imumechieen̄ mgbọ geelek kwun̄, mè nyan̄a eji.

⁸Tele m̀gban̄-nu inu Okumugwem Awaji obotumu; mije ọmọ môtumu ikọ òbonyi eji ebi kan̄ esuuk; eji ebi ọmọ okikaan̄ ejit nsan me lek, mè ire eji kpeyaka igwu ikom isi irọ inu mbubut cha eji ekirọ.

⁹Ọmọ îbem lek inyanyan̄a ebi ìkinyi ọmọ ulibi, inyi eji ebi ìluk me ijọn̄ yi mêmun̄ umin kan̄.

¹⁰Awaji mômun̄ eji me chieen̄ mgbọ geelek, mè inyi eji atikọ kan̄; eji mêkirọ ata irọrọ, mè iluk me esuuk.

¹¹Ebi eyi Awaji me linyọn̄ mêkeke inye me lek Awaji; ọmọ ogwu òkup me emen inyọn̄ môrọ ema nnwọn.

¹²Okumugwem mônyi eji nnwọn kan̄; ijọn̄ kiji môgwogwook mfut enenen.

¹³Ata irọrọ ìre orọmijọn̄ kan̄; inu geelek îkirọ, ìkirọ ikpọ ikeya.