Read obolo Itọn̄ 89 Bible Online

Itọn̄ 89 - obolo bible

Itọn̄ 89

¹Ijeen̄-inu kè Etan ogwu Ejira. Mege isi ire mgbọ ikakaan̄ge itata, mâkọt okwa ofolek imumechieen̄ Okumugwem okikaan̄ me lek ene mgbọ geelek; nan̄a me ukot re me ukot, mâsa otu n̄a ikpa ibe ke owu ogbe ogwu etoon̄be ejit me lek.

²Nriọọn̄ ibe ke imumechieen̄ kwun̄ ìbokukup ire mgbọ geelek; ikeya si, igbegbe utoon̄-ejit ogbebe ìkekeke ikam kubọk akpabin inyọn̄.

³Owu otumu ibe, “Emi nra inyan̄a ibot melek Debit, ogwu ngobobe; nra ichieek ọmọ, gwun̄ ikwaan̄ n̄a, use ibe:

⁴‘Mârọ ibe ebi owot iman kwun̄ ekere ubọọn̄ mgbọ geelek; mâyaka ogboon̄ ubọọn̄ itap me uwu kwun̄ ire ukot geelek.’ ”

⁵Okumugwem, akpabin inyọn̄ môkitọn̄ uyeke inu owu okirọ; ebi osat me emen inyọn̄ mêkitumu me ntitiin̄ kiban̄ ibe ke owu ogbe utoon̄-ejit.

⁶Ìre ekene me isinyọn̄ ke ebesa itọ me lek kwun̄, Okumugwem? Sà ìre ekene me etete ebi osat ore ìkike melek kwun̄?

⁷Ema ekitetet ukpook kwun̄ me emen ntitiin̄ kiban̄; otutuuk kiban̄ ìkana owu okokop ekifefieek owot me lek kwun̄, mè ikiran mije ukpook kwun̄.

⁸Jei Okumugwem Awaji Ogwukaan̄ Inyọn̄ mè Ijọn̄, kpunu ogwu òbet lek kwun̄; Okumugwem, owu okaan̄ unye; me agan̄ geelek, owu ogbe ogwu etoon̄be ejit me lek.

⁹Owu okikpulu emen awaji ere ekoon̄ okiriak ifuuk; ogbururu isinin̄ okwaan̄, owu okirọ inyi iyaka isibi.

¹⁰Owu okpan̄ Rayabu, mgbugbo anam ejit okwaan̄, mè ijak ọmọ ikpukpuku; owu osa ikpele unye kwun̄ ililaba ebi ochicha kwun̄ ichieen̄ ita.

¹¹Akpabin inyọn̄ ìre eyi kwun̄; ijọn̄ si ìre eyi kwun̄; linyọn̄ mè inu geelek òkup me emen kan̄, îre owu orom.

¹²Owu orom agan̄ inyọn̄ mè agan̄ osiki; ogoon̄ Tabọ mè ogoon̄ Emọn ekeke kubọk ebi ejit obelebe ikitọn̄ owu.

¹³Owu okaan̄ ikpele unye; unye kwun̄ îmin enenen; ubọk ulom kwun̄ îtim ikpan̄ me akọn̄.

¹⁴Ata irọrọ mè unen oyerebet ore inu osabe itọbọ ọdọ mkpulu kwun̄; inu geelek okirọ, ìkijeen̄ ibe ke owu omun̄ ene me chieen̄, mè igbe ogwu etoon̄be ejit me lek.

¹⁵Ikpele ubelejit òwa inyi ebi ìkigọọk ikọt okwa unwọọn̄ isa itọn̄ owu; Okumugwem, isi kwun̄ môtoon̄ me lek kiban̄.

¹⁶Mije kwun̄, ema ekinwọọn̄ unwọọn̄ otutuuk usen, mè ikitọn̄ owu enenen me ata irọrọ kwun̄.

¹⁷Ikpele unye kwun̄ ke eji ekisa itim ikpan̄ ebi ochicha kiji; sa me nnwọn kwun̄ ke okinyi eji ikpele unye ya.

¹⁸Okumugwem, owu ore agbọ inyi eji; owu ogwu Òkup Mbuban, ogwu ebi Ijeren ekiriaak, owu ore ogwu ubọọn̄ kiji.

¹⁹Me emen ilaak ọkpọchieen̄, owu otumu inyi ebi ìchieek me lek kwun̄ ibe: “Ntap ubọk inyi ogwu akọn̄ ge; mmọnọ ene ge me etete ebi n̄a isa ito ubọọn̄.

²⁰Ngobo Debit gwun̄ ikwaan̄ n̄a isibi; ntọkọ ọmọ aran̄ n̄a me ibot, mè ito ọmọ ubọọn̄.

²¹Mâsa unye n̄a irọ ọmọ inye, mè irọ ọmọ ikaan̄ unye.

²²Ebi ochicha kan̄ kpebekọt ifeen̄ ọmọ; ebi ugumulek si kpebekọt itim ikpan̄ ọmọ.

²³Me isi kan̄, mâjak ebi ochicha kan̄ ikpukpuku iriọk, mè ikpan̄ ebi geelek ìchacha ọmọ.

²⁴Mâma ọmọ, mè ikeke inye me lek kan̄; mârọ ọmọ ikaan̄ unye enenen, mije umin erieen̄ n̄a.

²⁵Mârọ ama ubọọn̄ kan̄ imin owot; môbene me okwaan̄ ile Mediterenia isaak isi ire okwaan̄ Yuferetis.

²⁶Ọmọ môtumu inyi emi ibe, ‘Owu ore Nte n̄a mè Awaji n̄a; owu ore ewuuk òkinyan̄a emi.’

²⁷Emi mâsa ọmọ irọ adasi gwun̄ enerieen̄ n̄a, mè irọ ọmọ ogwu ubọọn̄ òmimin igak otutuuk ebi ubọọn̄ me linyọn̄.

²⁸Imumechieen̄ n̄a môkup me lek kan̄ ire mgbọ geelek; ikeya ke inyan̄a-ibot n̄a melek kan̄ obokup.

²⁹Onineen̄ ubọọn̄ kan̄ môkeke ibia kubọk akpabin inyọn̄; ebi owot iman kan̄ mêkikpulu me ntuun̄ me ntuun̄ ire mgbọ geelek.

³⁰“Ire, ire bọn owot iman kan̄ ifiat ikan n̄a, mè ikpaka ikọ n̄a,

³¹ire ema ijit orọmijọn̄ n̄a, mè ije ikeme ikọ ntọbe,

³²mâsa olik ekpuk ibak ema udun̄, mije ijo inu kiban̄, mè isa edim ikpaan̄ ibala ema lek mije nrọ-nlọ kiban̄.

³³Ire, eya ìkabokput emi imama Debit ire mgbọ geelek; ìkabokwek emi irọrọ use nchieekbe ọmọ.

³⁴M̀kpafaan̄ inyan̄a-ibot n̄a melek kan̄; ǹkabanwene ikọ otu n̄a mgbọ geege.

³⁵Nsa me erieen̄ n̄a òkup mbuban ichieek Debit use; ǹkabafiaan̄ Debit ofiaan̄ mgbọ geege.

³⁶Onineen̄ ubọọn̄ kan̄ môkeke ibia; me isi n̄a, ogboon̄ ubọọn̄ kan̄ môkup ire mgbọ geelek, kubọk ura òkup me isinyọn̄.

³⁷Ike onyan̄ obiabe ikam me akpabin inyọn̄ kubọk inu ijejeen̄ ògbegbe ibe etoon̄ ejit me lek, ikeya si ke ogboon̄ ubọọn̄ kan̄ obobia ire mgbọ ikakaan̄ge itata.”

³⁸Ire, owu onaan̄ ejit ikeme ogwu ubọọn̄ owu ogobobe, mè ikpọ chieen̄ ilọ me lek kan̄, mè ijit ọmọ.

³⁹Owu onyan̄a ibot ifaan̄ me lek gwun̄ ikwaan̄ kwun̄, mè isan̄a ọmọ okpibot ubọọn̄ me ibot itọp ito me ntọn̄.

⁴⁰Owu ogwak ogọ òkakana ama kan̄ igwook, mè igbugbọ si mgban akọn̄ ama ya ito.

⁴¹Otutuuk ebi ìkije iraka, ekigwaka igba ifum inu kan̄; ebi ama ìluluk ikana ọmọ enikisa ọmọ irọ ochak.

⁴²Owu orọ ibe ubọk ebi ochicha inye igak eyi kan̄, mè irọ ema otutuuk enwọọn̄ unwọọn̄.

⁴³Owu orọ ibe oge akọn̄ kan̄ ikput, mè isa akọn̄ ifieek ọmọ.

⁴⁴Owu obọkọ okuba isan̄a ọmọ me ubọk, mè ida ogboon̄ ubọọn̄ kan̄ itọbọ me ijọn̄.

⁴⁵Owu okpan̄ ọmọ me nsek, mè itap ọmọ esip ijot isi.

⁴⁶Jei Okumugwem, òbolet lek kwun̄ ire mgbọ geelek ni? Sà ìre unaan̄-ejit kwun̄ ìboyok kubọk ukan̄ isi ire mgbọ geelek mọnọ?

⁴⁷Jei Okumugwem, kawuuk ibe ke ugwem n̄a ìre mgbidim; ìre owu òrom otutuuk ebilene ito me ikike ni?

⁴⁸Ìre ekene ogwu ebilene kpokwu mkpa? Sà ìre ekene ogwu ebilene obokọt ibọkọ lek kan̄ isan̄a me ubọk udọn̄ mkpa?

⁴⁹Ogwukaan̄-ene, mọmọ adasi imumechieen̄ kwun̄ ya ochieekbe Debit use ibe ke owu òkpolọlọ irọrọ iso?

⁵⁰Jei Ogwukaan̄-ene, kawuuk ochak ekichak emi gwun̄ ikwaan̄ kwun̄; kawuuk unyechieen̄ owuwa ido ekinyi emi.

⁵¹Jei Okumugwem, kawuuk si ochak ebi ochicha kwun̄ ekichak ogwu ubọọn̄ owu ogobobe ito, mè ikiyomo ọmọ me ere geelek îsibe.

⁵²Ìtọn̄ Okumugwem ìre mgbọ geelek; ikup ikeya, mè ikup ikeya!