Read obolo Itọn̄ 9 Bible Online

Itọn̄ 9 - obolo bible

Itọn̄ 9

¹Ìkup inyi ogwu òjeen̄ okwa: Igọọk me ida okwa mkpa gwun̄ enerieen̄. Okwa kè Debit. Jei Okumugwem, mâtọn̄ owu me otutuuk ejit n̄a; mâtumu otutuuk uyeke uyeke inu owu orọbe isibi.

²Mâbele ejit mè inwọọn̄ unwọọn̄ mije kwun̄; mâkọt okwa itọn̄ owu, Awaji Ogwu Òbebene Ichit.

³Ebi ochicha n̄a mîgwu ikom ililiin̄, mè irurọn̄ọ ikwaan̄ mgbọ ema ebenebe chieen̄ itoon̄ owu me lek.

⁴Owu okup me inyọn̄ ogboon̄ ubọọn̄ kwun̄ ikisibi oyerebet ònenen; owu onyi emi unen n̄a, mè ijeen̄ ibe ke ǹkarọ ìlọ.

⁵Owu ogana ere inyi ebi ofifi ido geelek; owu ojijaka ebi ìkirọ inu ikpak, mè irọ erieen̄ kiban̄ ichep dìp dìp.

⁶Owu ojijaka ebi ochicha kiji isan̄a ire mgbọ geelek, mè igwak ama kiban̄, mkpukpọk ìkasik; kpunu ogwu òboyaka ikeek ema ofifi.

⁷Ire, Okumugwem ìkukup me lek ubọọn̄ ire mgbọ geelek; îto ogboon̄ kan̄ itele inenisibi oyerebet.

⁸Ìbosa me ata irọrọ ikikpulu linyọn̄, mè ikisọp oyerebet ikakaan̄ge wọlọwọlọ inyi ebi ene.

⁹Okumugwem môre mgban ebi ekitutuku ekisa ikwek lek; lek kan̄ ke ebekitap ibot mgbọ uyọrọlek.

¹⁰Okumugwem, ebi ìrọriọọn̄ owu mêtoon̄ ejit me lek kwun̄, mije òkakilap ebi ìnunu owu me lek ìsan̄a.

¹¹Ìkọt okwa ìtọn̄ Okumugwem ogwu òluk me Sayọn; ìkpa inu îrọbe ìnyi ebi ido geelek enọ!

¹²Mije Awaji îkeek ito ebi ekitutuku; ọmọ ogwu òkido ibot ebi ekpan̄be, ìkawuuk idodo ibot kiban̄.

¹³Jei Okumugwem, kaan̄ ejit nsan me lek n̄a; kpọ kwulukwulu ebi ochicha n̄a enyibe emi; nyan̄a emi sibi me ubọk mkpa,

¹⁴ufuna mâkeke me isi ebi Jeruselem ikpa inu mbak me lek ikitọn̄ owu; mâbele ejit mije owu onyan̄a emi isibi.

¹⁵Ebi ido geelek mîrurọn̄ọ inin̄ udọn̄ ema erọkọbe; ukot kiban̄ gaalek îjijeen̄ me otu ufe ema elileekbe itip.

¹⁶Okumugwem îjeen̄ ogwu ọmọ orebe isibi bak me lek unen oyerebet îfieekbe; ikwaan̄ ebi ijo irọrọ erọbe îseme itet ema gaalek kubọk ufe.

¹⁷Ebi ìkpaka ibot inyi Awaji mêfon ama ekwukwu; inu yaage si okup inyi ebi ido geelek ìwuwuuk Awaji.

¹⁸Awaji ìkabowuuk ebi una ire mgbọ geelek; ikpọchieen̄ ebi ugbọọn̄ ekaan̄be me lek kan̄ ìkabochep ire mgbọ geelek.

¹⁹Jei Okumugwem, nan̄a keke; kachieek ibe unye ebilene igak eyi kwun̄; to ebi ido geelek me isi kwun̄, mè sibi ema oyerebet me ibot.

²⁰Okumugwem, tap ema ukpook me lek; rọ inyi ema eriọọn̄ ibe ke ema ìre ukpọk ukpọk ebilene ikike.