Read obolo Itọn̄ 90 Bible Online

Itọn̄ 90 - obolo bible

Itọn̄ 90

¹Uriaak kè Mosis, ogwu eyi Awaji. Ogwukaan̄-ene, irak kwun̄ ke eji ekiluk nan̄a me ukot re me ukot.

²Sabum owu onirorom ogoon̄; sabum owu onirorom lek ijọn̄ mè otutuuk linyọn̄; bene me mgbọ ikakaan̄ge itata si re mgbọ ikakaan̄ge itata; owu ore Awaji.

³Owu okibe bọn ebilene egwu ekom efon achiaan̄ ere ema enan̄abe, mè owu orọ si inyi ema egwu ekom ekana achiaan̄.

⁴Me lek kwun̄, obop acha ge kiji ìbet lek usen ge kpọi; ìbet lek iyakwut òraraka, mè ibet lek mgbidim mgbọ me eririeen̄.

⁵Owu okikwọọk eji ije kubọk agbugbuk; eji ekup kubọk mun̄umun̄ ilaak ikike; eji ebet lek mbubet òkititibi;

⁶me ewelegwe, îra ibum otu isibi, mè isan̄a inwan̄ isibi, mè inan̄a ikeke; isire ikakwun̄, îra igen̄ inwan̄ isan̄a me lek, mè ikwu.

⁷Unaan̄-ejit kwun̄ òkikpan̄ eji isan̄a; uyok-ejit kwun̄ òkitet eji ukpook enenen.

⁸Ijo inu eji ekirọ, owu oriọọn̄ isan̄a kpai; echi eji erọbe me nlelet, ìkpọkpọ isibi utoon̄ me isi kwun̄.

⁹Owu òkinaan̄ ejit inyi eji otutuuk usen ugwem kiji; owu ofieek otu ifuk acha ugwem kiji igbidim, kubọk mgbọ efuuk ge ene ochobe.

¹⁰Otu ifuk acha ugwem kiji ìre akọp acha jaaba gaalek; ogwu ònyenye lek oluk iso akọp acha jeeta. Ire, otutuuk mgbọ ya ìre ufialek mè kwulukwulu; sọnja mgbọ, ugwem îra ita, eji mîra ijibi wup.

¹¹Kpunu ene geege òrarak iriọọn̄ unye eyi unaan̄-ejit kwun̄ okikaan̄ me lek ene; ogwu òkakaan̄ ukpook kwun̄ me emen, ọmọ oriọọn̄ inu ofolek unye uyok uyok unaan̄-ejit kwun̄ okikaan̄ me lek ene.

¹²Eya orọ, jeen̄ eji ubọk eji mêsabe iluk ugwem kubọk ebi ìrọriọọn̄ ibe ke usen ugwem kiban̄ ìkawa, inyi eji ekeluk usen geelek kubọk ebi ìriọọn̄ inu.

¹³Jei Okumugwem, ìre unaan̄-ejit kwun̄ ìboyaka mgbọ owa ni? Soso, gwu kom na me lek kiji, mè kaan̄ nsan me lek kiji ebi ikwaan̄ kwun̄!

¹⁴Jeen̄ eji imumechieen̄ mgbọ geelek kwun̄ ewelegwe geelek, ufuna eji mêkibele ejit, mè ikinwọọn̄ unwọọn̄ otutuuk usen ugwem kiji.

¹⁵Nyi eji unwọọn̄ òkekem me lek ufieejit onyibe eji; nyi eji unwọọn̄ òkekem me lek otutuuk acha ukwook otetbe eji.

¹⁶Soso, tele eji ebi ikwaan̄ kwun̄ emun̄ ikpele ikwaan̄ owu okirọ; tele si nsabọn kiji emun̄ òrirọ kwun̄.

¹⁷Ogwukaan̄-ene Awaji kiji, tele nnwọn kwun̄ ikup inyi eji, mè rọ ubọk ikwaan̄ kiji ije ijaan̄ inyi eji; soso, rọ ubọk ikwaan̄ kiji ikeke inye.