Read obolo Itọn̄ 91 Bible Online

Itọn̄ 91 - obolo bible

Itọn̄ 91

¹Ogwu òtap ibot me ere nlet eyi Awaji Ogwu Òbebene Ichit, ìbokup me irak okwukwek eyi Awaji Ogwu Òkaan̄ Unye Geelek.

²Ene ya môkọt itumu inyi Okumugwem ibe, “Owu ore ere nlet n̄a mè uwu mgban akọn̄ òkikput emi lek; owu ore Awaji n̄a; owu ke ntoon̄ ejit me lek.”

³Awaji môsan̄a owu isibi me otu ufe ogwu òtip ufe, mè inyan̄a owu me ubọk orukan̄ òkikpan̄ ene.

⁴Awaji môsa akukọ uwop kan̄ iwele ichit owu lek; owu môlelet lek kwun̄ me irak uwop kan̄; atikọ Awaji obokwek owu lek kubọk agbọ mè mgban akọn̄.

⁵Owu òkpofieek owot me lek inu ukpook òkitet ene me eririeen̄, mè ìre oraan̄ mkpa ekisook ikana me ikarek,

⁶mè ìre inu òkikpan̄ ene me emen ekpuk udun, mè ìyaka ire mfiat òkisa mkpa inu me ejit ikarek.

⁷Obop ene mêrurọn̄ọ ikwaan̄ mè agba lek kwun̄; akọp obop ene mêrurọn̄ọ ikwaan̄ me agan̄ ulom kwun̄; ire, unan ge ikeyi ìkposak owu me lek.

⁸Ire, owu môsa chieen̄ kwun̄ gaalek ikpọ, mè imun̄ osusut Awaji okinyi ebi òkpaka ibot.

⁹Bak me lek ke owu osa Okumugwem ogwu òkilet emi lek, òrere Ogwu Òbebene Ichit, irọ ere iluluk kwun̄,

¹⁰ijo inu geege ìkabore owu lek; kpunu si mfiat geege òboje igbet ere owu olukbe.

¹¹Mije Awaji môto ebi osat kan̄ ibe ekpọ owu chieen̄ me lek; ema mêkibem owu me ere geelek ojebe inin̄.

¹²Ema mêben owu ikaan̄ me ubọk kiban̄, ufuna ukot kwun̄ ikatọbọ me lek ewuuk.

¹³Owu môtim ikpan̄ ebi ochicha kwun̄, ema ikenyenye lek kubọk egbe àtat, mè imin iwot me lek kubọk ulu, owu òbojajak ema ikpan̄ isan̄a kpai.

¹⁴Awaji ìbe, “Eyi omumun̄ emi me chieen̄, mânyan̄a owu; mije owu oriọọn̄be erieen̄ n̄a, mâbene owu isaba ibot ebi ochicha kwun̄.

¹⁵Osigwen emi ibe ǹnyan̄a owu, emi mânyan̄a owu; ufialek itet owu, mâkup me agba lek kwun̄; mânyan̄a owu isibi, mè inyi owu umin.

¹⁶Mânyi owu ujọn̄ọ ugwem, isasa ikpe owu mkpukpe, mè inyan̄a owu, inyi owu òmun̄ ubọk nkinyan̄a ene.”