Read obolo Itọn̄ 94 Bible Online

Itọn̄ 94 - obolo bible

Itọn̄ 94

¹Jei Okumugwem, owu ore Awaji ogwu òkisan̄a useen̄; owu Awaji ogwu òkisan̄a useen̄, jeen̄ unaan̄-ejit kwun̄!

²Owu ogwu òkisibi oyerebet me ibot otutuuk ebi linyọn̄; tọbọ jibi na nyi ebi ugumulek inu ògbegbe ema!

³Jei Okumugwem, ìre kpa mgbọ ke ebi òkpaka ibot ebebele ejit ire ni? Tumu-nu, ìre kpa mgbọ?

⁴Ebi òkpaka ibot ekitumu ikọ unyechieen̄, mè ikisa ugumulek kiban̄ inyan isi, mè ikigugo lek.

⁵Okumugwem, ema ekisisaak ebi eyi kwun̄, mè ikitutuku ebi owu okaan̄be.

⁶Ema ekikpan̄ ebi nwakpa mè ebi ichen ìgọgọọk eji iluk, mè èkpan̄ si bọn kpà-nte.

⁷Ema ekibe, “Okumugwem ìkamun̄ eji; Awaji ebi Ijeren ìkarọriọọn̄ inu eji ekirọ.”

⁸Enyi ebi ikpak, ìkigobo inu ìtet; enyi ebi burubut, ìre mgbọ owa ke enyi eberiọọn̄ inu?

⁹Awaji ogwu òrorom utọn̄, ìre ìkpokinọ ikọ ni? Ogwu òrorom chieen̄, ìre ìkpokimọọn̄ inu ni?

¹⁰Ìre ogwu òkigana ikọ inyi ido geelek me linyọn̄ kpokọt isulu enyi osusut? Ìre ogwu òkijeen̄ ene ifuk-ibot kpokaan̄ ifuk-ibot eyi kan̄ ni?

¹¹Okumugwem îriọọn̄ ekiket ebilene; îriọọn̄ ibe ke inu geelek ema ekikeek ìre inu ikike.

¹²Jei Okumugwem, uga ubelejit òwa inyi ene ya ogwu owu okiteme nteme; owu òkisa me ikan kwun̄ ijeen̄ ọmọ inu.

¹³Owu môkisun̄ ọmọ me utelelek mgbọ ebi òkpaka ibot ekinyi ọmọ ufialek, mege ire mgbọ owu môtapbe ebi ikpak cha ibot me udọn̄.

¹⁴Mije, Okumugwem ìkposan̄a ebi eyi kan̄ ubọk me lek; ìkpojit ebi îgobobe inyi lek kan̄.

¹⁵Ata oyerebet môgwu ikom inin̄ me uwu oyerebet; otutuuk ebi ata irọrọ mêgọọk irọ unen oyerebet inye.

¹⁶Ìre ekene obogọọk emi ikeke itim akọn̄ me lek ebi òkpaka ibot? Sà ìre ekene obotumu ikọ ibot n̄a me isi ebi ijo irọrọ?

¹⁷Mebe Okumugwem ìkatap ubọk ìnyi emi, kè nra ikwu iraka.

¹⁸Jei Okumugwem, mgbọ nkikeek ibe ke mânikwaak irọn̄, owu otet emi ikaan̄, bak me lek ke òkimumun̄ emi me chieen̄ mgbọ geelek.

¹⁹Mgbọ uga saasaak isinin̄ emi me emen, ukarajit okinyi emi okisiki emi ejit.

²⁰Ìre owu môkọt ire unene ebi ìkisibi oyerebet bukubuku; ebi ìkigwen inu ikarege ikan ibe ire ikan?

²¹Ema ekinin̄ oru ikeme ebi ata irọrọ, mè ikitip ebi ekalọge inu geege oyerebet mkpa.

²²Ire, Okumugwem ore uwu mgban akọn̄ òkikput emi lek, Awaji n̄a ore ewuuk òkilet emi lek.

²³Ọmọ môyaka ijo inu kiban̄ ikwuun̄ ema me ibot, mè igen̄ ema isan̄a, bak me lek inu ikpak ema ekirọ; Okumugwem Awaji kiji môgen̄ ema isan̄a kpai.