Read obolo Itọn̄ 96 Bible Online

Itọn̄ 96 - obolo bible

Itọn̄ 96

¹Ìkọt aya okwa eyi kperarak ìkọt ìnyi Okumugwem; enyi, otutuuk ebi linyọn̄, ìkọt okwa ìnyi Okumugwem!

²Ìkọt okwa ìnyi Okumugwem, mè ìtọn̄ erieen̄ kan̄; me usen me usen, ìkilook etip unyan̄a kan̄ îkinyan̄a ene!

³Ìkpa umin kan̄ ìkana ìnyi ebi ido geelek; ìkpa si uyeke ikwaan̄ kan̄ ìnyi otutuuk ebilene!

⁴Okumugwem îmin enenen, mè igbe ogwu ebetọn̄ enenen; ọmọ ogbe ibe etet ukpook me lek igak otutuuk ofifi awaji geelek.

⁵Mije, otutuuk awaji ebi ofifi ido geelek ìre mkpọmfaka; ire, Okumugwem, ọmọ orom akpabin inyọn̄.

⁶Òrirọ mè umin ubọọn̄ ìkakana ọmọ okokop; unye mè ujamgbugbo ìjojot me Uwu Mbuban kan̄.

⁷Enyi otutuuk ebi linyọn̄, ìnyi Okumugwem umin; ìtumu ìnyi Okumugwem ibe ke unye ìre eyi kan̄.

⁸Ìnyi Okumugwem umin ògbegbe erieen̄ kan̄; ìben akpan ngwugwa ìsa ìnu me oyet egep kan̄.

⁹Ìtọbọ ebum ìnyi Okumugwem, ogwu òkaan̄ òrirọ me lek, mè ikup mbuban; otutuuk ebi linyọn̄, ìtet ukpook me isi kan̄.

¹⁰Ìtumu ìnyi ebi ido geelek ibe ke Okumugwem ìre ubọọn̄; ọmọ îsun̄ linyọn̄ ikam me irek; kpunu ogwu òbokọt isisik linyọn̄ isan̄a me akpat; Okumugwem môfieek oyerebet ònenen inyi ebi ene.

¹¹Eya orọ, akpabin inyọn̄, bele ejit; linyọn̄, owu nwọọn̄ unwọọn̄; okwaan̄, owu si, melek inu geelek òkup me emen kwun̄, bele ejit, mè gbugbut.

¹²Ijọn̄ uko, owu si, mè inu geelek òkup me emen kwun̄, bele ejit; enyi otutuuk uti òkup me oron, ìkọt okwa ìnwọọn̄ unwọọn̄.

¹³Ìnwọọn̄ unwọọn̄ me isi Okumugwem; mije ọmọ òkinu; iin̄, òkinu inenisibi oyerebet inyi ebi linyọn̄; môsibi oyerebet ònenen inyi ebi linyọn̄, mè ifieek oyerebet atikọ inyi ebilene.