Read obolo Itọn̄ 97 Bible Online

Itọn̄ 97 - obolo bible

Itọn̄ 97

¹Okumugwem ore ubọọn̄; otutuuk ebi linyọn̄ ìnwọọn̄ unwọọn̄; otutuuk ebi ìluk me lek ogbogbo achọ òkup esese esese, ìbele ejit!

²Oduku inyọn̄ mè udun okana ọmọ ichit bùk; ata irọrọ mè unen oyerebet ke îsa itọbọ ọdọ mkpulu kan̄.

³Ukan̄ okije me isi kan̄, mè ikiwọp ebi ochicha ìkana ọmọ okokop ikpan̄.

⁴Omumen-inyọn̄ kan̄ okinyi utoon̄ me linyọn̄; ebi linyọn̄ isimun̄, mîra ikiran.

⁵Me isi Okumugwem, ogoon̄ îtọk ita kubọk mgbe ukan̄ otetbe, mgbọ Okumugwem ogwukaan̄ otutuuk linyọn̄ okinu.

⁶Akpabin inyọn̄ okijeen̄ ata irọrọ kan̄; otutuuk ebi linyọn̄ emumun̄ ujamgbugbo kan̄.

⁷Ebi ìkiriaak mkpọmfaka, mè ikisa inu ekọkọ igugo lek, esip îtet ema enenen; otutuuk awaji geelek ekitọbọ ibot inyi owu Okumugwem.

⁸Ebi Sayọn mîbele ejit, ebi Juda mînwọọn̄ unwọọn̄, mije, ema mînọ ubọk Okumugwem osibibe oyerebet inyi ebi linyọn̄.

⁹Okumugwem, owu obene ichit me oniin̄ geelek me otutuuk linyọn̄; owu omin ichit me lek otutuuk awaji geelek ebilene ekiriaak.

¹⁰Enyi ebi ìmumun̄ Okumugwem me chieen̄, ìcha ijo inu; ọmọ okibem ugwem ebi kan̄ ebi ìkirọ ata irọrọ; ọmọ okinyan̄a ema me ubọk ebi òkpaka ibot.

¹¹Utoon̄ Awaji îsibi itoon̄ me lek ebi ata irọrọ, mè isa ubelejit ijet ebi ìkirọ inu òtatat.

¹²Enyi ebi ata irọrọ, ìnwọọn̄ unwọọn̄ mije Okumugwem; ikawuuk ibe ke ọmọ ìre ogwu òkup mbuban; ìtọn̄ ọmọ bak me lek inu îrọbe!