Read obolo Urọk 1 Bible Online

Urọk 1 - obolo bible

Urọk 1

¹Urọk kè Solomọn gwun̄ kè Debit, ogwu ubọọn̄ Ijeren:

²Isasa ikaan̄ iriọọn̄-inu melek ikween̄-inu; isasa igobo ikọ iriọọn̄-inu itet;

³isasa ibọkọ ikween̄-inu eyi iriọọn̄-lek, mè ata irọrọ, mè inu ònenen, mè inu òtatat;

⁴isasa irọ ogwu una ekiket ikaan̄ ekiket, mè ogwu nsabọn irieen̄ ikaan̄ ifuk-ibot mè ata nkeek.

⁵Ogwu òriọọn̄ inu mônọ, mè isa ikween̄ inu isọkọ, ogwu òkigobo inu itet môkaan̄ nteme.

⁶Isasa igobo urọk mè ikọ òkup nlelet itet, mè igobo ikọ ebi ìriọọn̄ inu mè udọk udọk urọk kiban̄ itet.

⁷Itetet ukpook me lek Okumugwem, ọmọ ore ibebene ifuk-ibot. Ire, ogwu mbubut ìkikpọkpọ iriọọn̄-inu mè ikween̄-inu chieen̄ isiki.

⁸Gwun̄ n̄a, gban̄ utọn̄ me lek ikan̄-inu nte kwun̄, mè kakpọ chieen̄ ìlọ me lek ijejeen̄ nga kwun̄.

⁹Mije echa mêrọ owu òkaan̄ ulibi kubọk òkwaan̄ ọgbọn me ibot, mè inyi owu umin kubọk ke òjeen̄ akalari isa ijaan̄ ebek.

¹⁰Ire ebi ijo irọrọ inileke owu, kachieek ìnyi ema.

¹¹Ire ema ibe, “Na gọọk eji je, eji ekup ekekpọ ebi eji mêfiatbe eje kiban̄; eji ekpọkpọ elet ekekpọ ebi kpelọ inu geege.

¹²Eji emeen̄ ema me ògat ugwem, kubọk ama ekwukwu okimeen̄ ene; eji emeen̄ ema ototuuk, kubọk ebi ìkifon emen udọn̄ mkpa.

¹³Eji mêtiten̄e inu unye otu ewe, mè itap inu eji mêfumbe ijot uwu kiji gbak.

¹⁴Na, na gọọk eji gbaan̄ je, mè eji egbaan̄ ekaan̄ akpa itap-ikpoko ge.”

¹⁵Gwun̄ n̄a, kalululuk ìgọọk ema ìje me oniin̄ kiban̄; katatap ukot me oniin̄ ema ekije.

¹⁶Mije ukot kiban̄ mikigwat ililibi inin̄ emen ijo inu, ikeya si ke ifafiat eje ene okifet ema me lek.

¹⁷Itoto njin ikana ebi kè ofut, mgbọ ema ekupbe isi me isi, ìre inu ikike.

¹⁸Ebi ìkup ikikpọ eje ene, ekikpọ eje kiban̄ gaalek; ugwem kiban̄ gaalek ke ema enween̄ lek ilileek ikikpọ.

¹⁹Ikeya ke îkup inyi ogwu òkaan̄ ulọk ebek me lek ijo oruru; ijo oruru ìkisan̄a ebek ugwem ogwukaan̄ kan̄.

²⁰Iriọọn̄-inu ìkup me lek oniin̄ ikitaan̄ ukpo igwen ene; ida kan̄ ìkitaan̄ me oyet ile ama.

²¹Ìkitaan̄ ukpo me ere ogbogbo ene ekupbe; ìkup me otunchit ama ikitumu ikọ kan̄ ibe,

²²“Enyi ebi una ekiket, kpa mgbọ ke enyi ebema una ekiket ire? Kpa mgbọ ke ebi ìkichak ene ebenwọọn̄ ichachak ene ire? Kpa mgbọ ke ebi mbubut ebecha ifuk-ibot ire?

²³Ìgwu ìkom ìna me lek ikan̄-inu nkikan̄ inyi enyi; mâtumu nkeek n̄a inyi enyi; mâkpa inu òkup emi me ejit iwele inyi enyi.

²⁴“Ire, eyi emi ngwenbe enyi, enyi ejijit, nnyana ubọk inyi enyi, kpunu ogwu òkpọkpọ chieen̄,

²⁵eyi enyi ejitbe otutuuk nteme n̄a, kpebọkọ ikan̄-inu n̄a geege itap,

²⁶emi si mâchak enyi me imọm mgbọ mfufiat isinu inyi enyi, mè ichak enyi ochak mgbọ ùrioon̄ isitoon̄ enyi;

²⁷mgbọ ùrioon̄ isi initoon̄ enyi kubọk egwijo, mè mfufiat isi inu inyi enyi kubọk unye efet; mgbọ uga ufieejit mè ujaralek isirọn̄ ikeme enyi.

²⁸“Mgbọ ya, ema mêgwen emi igak, m̀kpabọkọ otu; ema mêweek emi igak me chieen̄ mun̄ ito, ire, kpebeweek emi imun̄.

²⁹Mije, ema mîcha ifuk-ibot, mè ijit ikakaan̄ ukpook Okumugwem;

³⁰kpebọkọ nteme n̄a geege itap, ekpọkpọ ikan̄-inu n̄a isiki chieen̄.

³¹Eya orọ, ema mêrie mfut ònan̄a me oniin̄ ema ejebe, ijo ifiọk kiban̄ cha mônenijot ema owot.

³²Mije, ugwem jom-jòm ebi una ekiket obokpan̄ ema; ugwem eyi-n̄a-îso-emi ya, eyi ebi mbubut ekikaan̄, ọmọ obojijaka ema.

³³Ire, ogwu geelek ogbagban̄ emi utọn̄ me lek, môluk me utelelek, ukot kan̄ mônye me ijọn̄, ìkabofieek owot ibe ùrioon̄ môre ọmọ lek.”