Read obolo Urọk 11 Bible Online

Urọk 11 - obolo bible

Urọk 11

¹Itọtọ inu ifeen̄ ene ìre mbuban inu me lek Okumugwem, ire, itọtọ inu inwọn ene, eya okibele ọmọ ejit.

²Ugumulek isinu, esip îra igọọk, ire, isiki-lek okije melek iriọọn̄-inu.

³Unen eru ebi ìkirọ inu òtatat ìkijeen̄ ema oniin̄, ire, ugwem ofiaan̄ ebi mfufiọk okifiat ema.

⁴Inu ubọọn̄ ìkponyan̄a ene me usen unaan̄-ejit Awaji, ire, ata irọrọ mônyan̄a ene isibi me mkpa.

⁵Ata irọrọ ogwu ǹkalọ okirọ, ìkirọ oniin̄ kan̄ itat, ire, inu ikpak ogwu ikpak okirọ, ọmọ oboda ọmọ ito.

⁶Ata irọrọ ebi ìkirọ inu òtatat mônyan̄a ema isibi, ire, ijo ebek ìre ufe inyi ebi mfufiọk.

⁷Ogwu ikpak isikwu, ikpọchieen̄ kan̄ îra ichep, inu îtoon̄be ejit isasa unye kan̄ ikaan̄ îra ilọ.

⁸Awaji isisan̄a ogwu ata irọrọ isibi me uyọrọlek, ìkiyaka ogwu ikpak itap me useen̄.

⁹Ogwu ijo ene ìkisa otu ifiat ogwu melek kan̄, ire, ogwu ata irọrọ môsa ifuk-ibot inwọnọ.

¹⁰Inu ije ijaan̄ me lek ogwu ata ene, ama obele ejit; ogwu ikpak ikwu, unwọọn̄ odimi me ama.

¹¹Inu ije ijaan̄ me lek ebi ìkirọ inu òtatat, ama ojibi òbene, ire, ebi ikpak itumu ikọ, ama òchep.

¹²Ogwu una ngobo-ntet okikpọ ogwu melek kan̄ chieen̄ isiki, ire, ogwu òkaan̄ ngobo-ntet ìkakisan̄a amọn.

¹³Ogwu mbia ìkikpọk mbum nlelet ikọ, ire, ogwu ògbe utoon̄-ejit okiban̄a mbum ikọ.

¹⁴Ido ònan nteme, ìborọrọn̄, ire, ido òkaan̄ owuwa ebi nteme, ntim-mkpan̄ ìkakilọ.

¹⁵Ogwu òbọbọkọ ogwu ichen me ata-ikọ, ìnyam lek kan̄, ire, ogwu òjijit ibọbọkọ ene me ata-ikọ, ìkakaan̄ uyọrọlek.

¹⁶Enenwaan̄ ata ejit okikaan̄ ulibi, ire, enerieen̄ ònye ejit okibọọn̄ ubọọn̄.

¹⁷Ogwu ata ejit ìkirọ nnwọn inyi ugwem kan̄, ire, ogwu nnaan̄ ìkitap ufialek inyi akpalek kan̄.

¹⁸Ogwu ikpak ìkibọkọ ofiaan̄ ofiaan̄ mkpukpe, ire, ogwu ata irọrọ ìkibọkọ ata mkpukpe.

¹⁹Atalek ata irọrọ ìkisa ugwem inu, ire, irọrọ ijo inu ìkisa mkpa inu.

²⁰Ogwu òkaan̄ ejit ofiaan̄ ìre mbuban inu me lek Okumugwem, ire, ogwu òtatana me ugwem ìre inu ubelejit inyi ọmọ.

²¹Sulu emi ata kpọ, ogwu ijo ene ìkponwọnọ osusut, ire, bọn ebi ata irọrọ ebefon me utelelek.

²²Uja enenwaan̄ ikakaan̄ge ifuk-ibot ìkup kubọk asi inwọm alata araran̄ esabe inwaan̄ me otu inwọm okodi.

²³Inu òkilọk ogwu ata irọrọ ìre gaalek ata inu, ire, ikpọchieen̄ ogwu ikpak ìre gaalek unaan̄-ejit Awaji.

²⁴Ogwu òkichili ubọk iche inu inyi ene, ọmọ okibọọn̄ ubọọn̄, ogwu òkifaak afaak, ọmọ okigbọọn̄.

²⁵Ogwu òkinyi me ata ejit, ọmọ okibọọn̄; ogwu òkitap ene efuuk me emen, mêtap si ọmọ efuuk me emen.

²⁶Ogbo môkup inyi ogwu òchichit inorie ònanan isun̄ ikinyam me unye otu ewe, ire, ugbana môkup inyi ogwu òchichili eyi kan̄ ikinyam.

²⁷Ogwu òweek ata inu mômun̄ nnwọn, ire, ogwu òweek ijo inu, ijo inu môgọọk ọmọ.

²⁸Ogwu òtoon̄ ejit me lek inu ubọọn̄ kan̄, ìborọrọn̄; ire, ogwu ata irọrọ ìbokisesek kubọk inwan̄ oron.

²⁹Ogwu òto ufialek me uwu kan̄ gaalek, ìkpokaan̄ inu geege; ogwu mbubut ìbore usun̄ inyi ogwu òriọọn̄ inu.

³⁰Ubọk ikwaan̄ ogwu ata irọrọ ìkinyi ebi ene ugwem; ogwu òkpukpulu ebi ene iriaak me lek kan̄ ìre ogwu òriọọn̄ inu.[2]

³¹Ire ebi ata irọrọ ibọkọ mkpukpe inu ema erọbe me linyọn̄ keyi, ebi ikpak mè ebi ìkirọ ijo inu kpebelọlọ ibọbọkọ si mkpukpe kiban̄.