Read obolo Urọk 12 Bible Online

Urọk 12 - obolo bible

Urọk 12

¹Ogwu òma ikween̄-inu ìma ifuk-ibot, ire, ogwu òcha ikan̄-inu ìre ndide.

²Okumugwem ìkirọ nnwọn inyi ogwu ata ene; ire, ìkitip ogwu mfufiọk oyerebet.

³Inu ikpak ìkakichieek ene ikeke inye me irek, ire, ogwu ata irọrọ, kpebekọt ijibi isan̄a me akpat.

⁴Òjot òjot nwa ìre umin inyi ogwu olom, ire, nwa ikariọọn̄ge esip ìkitap ogwu olom uwọ-lek.

⁵Ogwu ata irọrọ ìkikeek ekiket òtatat, ire, ogwu ikpak ìkinyi nteme ofiaan̄.

⁶Ikọ ogwu ikpak ìkup kubọk ufe òbokpan̄ ene, ire, ikọ ogwu ugwem òtatat ìkinyan̄a ene isibi me mkpa.

⁷Ogwu ikpak ìbokwukwu ichep dìp dìp, ire, uwu ogwu ata irọrọ ìbokekeke inye.

⁸Ekitọn̄ ene ikpọ me lek iriọọn̄-inu kan̄, ire, ogwu ifuk-ibot kan̄ ìkakitat, ekikpọkpọ chieen̄ isiki.

⁹Ogwu ikakupge me lek inu, ire, îkaan̄ gwun̄ uwu, înwọn igak ogwu òkimin lek kan̄, ire, ìkakaan̄ inorie.

¹⁰Ogwu ata irọrọ îkaan̄ ulibi inyi ugwem anam kan̄, ire, ata ejit ogwu ikpak okaan̄be ìre oma kè ikpi.

¹¹Ogwu ògbọgbọ ijọn̄ kan̄ iwop uko oborie ijot owot, ire, ogwu òkifiat mgbọ kan̄ me lek inu ikakaan̄ge ibot ìkakaan̄ nden̄.

¹²Ebi ikpak ekimin ebek me lek inu ubọọn̄ ebi ijo ife ekaan̄be, ire, Awaji ìkinyi ebi ata irọrọ oniin̄ ebesa ikaan̄ inu.

¹³Ijo ikọ ogwu ikpak môtap ọmọ me ufialek, ire, ogwu ata irọrọ mônwọnọ ufialek kecha.

¹⁴Ata usem òkinan̄a ene me otu ìkirọ ata inu ijot ene owot, ikeya si ke ubọk ikwaan̄ ene okinyi ene mkpukpe.

¹⁵Inu ogwu mbubut okirọ ìkitatat me chieen̄ ogwukaan̄, ire, ogwu ògban̄ nteme ìre ogwu òriọọn̄ inu.

¹⁶Ogwu mbubut ìkinaan̄ ejit ebi ekpuk, ire, ogwu òme unyechieen̄ ìre ogwu òriọọn̄ inu.

¹⁷Ata ogwu ata-ikọ atikọ ìkitumu atikọ, ire, ogwu ata-ikọ ataak ìkitumu ikọ ataak.

¹⁸Ikọ etumube me una ekiket ìkifieek ene nkat me owot, ire, ikọ ogwu òriọọn̄ inu ìkigwagwa ene.

¹⁹Ikọ atikọ ìkibabia ire mgbọ geelek, ire, ikọ ataak ìkikup sọnja mgbọ gaalek.

²⁰Ofiaan̄ okijot ejit ebi ìkitọt ijo inu, ire, unwọọn̄ okijot ejit ebi ìkitọt esuuk.

²¹Ufialek ìkakirọn̄ ìkeme ogwu ata irọrọ, ire, uyọrọlek ìkikakana ichit ogwu ikpak.

²²Ebi ataak ìre mbuban inu me lek Okumugwem, ire, ebi ìkitumu atikọ ìre inu ubelejit inyi ọmọ.

²³Ogwu òriọọn̄ lek ìkakiwele ifuk-ibot kan̄ me oyet, ire, ogwu mbubut ìkibeben mbubut kan̄ isibi ewe.

²⁴Ogwu òkaan̄ efuuk ikwaan̄, ọmọ obore ogwu ibot, ire, ogwu ugbek ìbore ogwu usun̄.

²⁵Saasaak ejit ìkinwun ene ekpuk me udun̄, ire, ata ikọ ìkinyi ene ubelejit.

²⁶Ogwu ata irọrọ ìkisa ogwu melek kan̄ ijeen̄ oniin̄, ire, oniin̄ ogwu ikpak ìkisa ene ije ichep.

²⁷Ogwu ugbek ìkakigbala chieen̄ me lek inu îkwookbe ukwook ikaan̄, ire, ogwu òkaan̄ efuuk ikwaan̄ okigbala chieen̄ me lek inu kan̄.

²⁸Ata irọrọ ìkisa ene itap me ugwem, mkpa kpunu me oniin̄ kan̄.