Read obolo Urọk 13 Bible Online

Urọk 13 - obolo bible

Urọk 13

¹Gwun̄ iriọọn̄ inu, ìnan̄a me ikan̄-inu ogwu ute, ire, ogwu òkirọ ene ochak, ìkabọkọ ikan̄-inu.

²Ata otu usem ìkinyi ene ata inu, ire, inu òkilọk ogwu mfufiọk ìre afa.

³Ogwu òkitet otu kan̄ ikaan̄ ìkibọọk ugwem kan̄, ire, ogwu òkitumu ikọ kpoo ìbonin̄ me ichep.

⁴Ogwu ugbek òkiweek ibọbọọn̄ ubọọn̄ ìkpokaan̄ inu geege, ire, ogwu òkaan̄ efuuk ikwaan̄ môkaan̄ inu îweekbe òjot òjot.

⁵Ogwu ata irọrọ ìkakima ataak, ire, ogwu ikpak môrie esip mè ochak.

⁶Ata irọrọ ìkikput lek ogwu ìkarọ ìlọ, ire, inu ikpak ìkida ogwu ijo ene ito.

⁷Îkaan̄ ebi ìkirọ lek kiban̄ ubọọn̄ ubọọn̄, ire, kpekaan̄ inu geege, mè ikaan̄ ebi ìkirọ lek kiban̄ ugbọọri ugbọọri, ire, mîbọọn̄ atalek ubọọn̄.

⁸Ene môkọt isa inu ubọọn̄ kan̄ inwene ibot, ire, ogwu una ìkakinọ ikan̄-inu.

⁹Mkpukan̄ ebi ata irọrọ ìkilolomo itoon̄ ere, ire, mkpukan̄ ebi ikpak ìboniniin̄.

¹⁰Ugumulek ìkisa gaalek ibaak inu, ire, ebi ìkibọkọ nteme ekaan̄ iriọọn̄-inu.

¹¹Ikpoko ekaan̄be me ngan ìbotọtọk ita, ire, ogwu òkibọm ikpoko sọnja sọnja môkaan̄ iwa.

¹²Inu etoon̄be ejit ibe môrọ isilọ, ìkifieek ene ejit, ire, ikpọchieen̄ isirọ iso, ìkire unwọọn̄ mè ugwem.

¹³Ogwu òkpọkpọ nteme ilọ chieen̄, môtuku ilaka, ire, ogwu òkakaan̄ ulibi me lek ikọ etọbe, mêwaak ubọk.

¹⁴Ijeen̄-inu ogwu òriọọn̄ inu ìre ogbuuruk ugwem, ìkida ene isan̄a me otu ufe mkpa.

¹⁵Ogwu òriọọn̄ lek ìkibọkọ nnwọn-isi, ire, oniin̄ ogwu mfufiọk ìkikup uyọt uyọt.

¹⁶Ogwu òriọọn̄ lek ìkirọ inu me ifuk-ibot, ire, ogwu mbubut ìkiben burubut kan̄ iwele.

¹⁷Gwun̄ ikwaan̄ òrere ogwu ikpak ìkirọn̄ inin̄ me ufialek, ire, gwun̄ ikwaan̄ ogwu etoon̄be ejit me lek ìkisa igwagwa ijet ene.

¹⁸Ugbọọri mè esip okup inyi ogwu òjijit ikween̄-inu, ire, ogwu osa ikan̄-inu igwen inu môkaan̄ ulibi.

¹⁹Inu eweekbe isire ene ubọk, ìkibele ene ejit, ire, isisibi itele ijo inu ìre mbuban inu me lek ogwu mbubut.

²⁰Ogwu ògọọk ebi ìriọọn̄ inu ije, môriọọn̄ inu, ire, ogwu ògọọk ebi mbubut ije mônin̄ me ufialek.

²¹Ijo inu ìkililaba ebi ijo ife, ire, ata mkpukpe okup inyi ebi ata irọrọ.

²²Ata ìrot ogwu ata ene otelebe môje ire lek bọn ebi bọn, ire, inu ubọọn̄ ogwu ijo ene, ekititiin̄ isun̄ inyi ebi ata irọrọ.

²³Ijọn̄ uko ogwu ugbọọn̄ môkọt isibi inorie ogbogbo, ire, mêsa ijo oyerebet inikpulu ije.

²⁴Ogwu òyayaka njijan̄ ito ìkama gwun̄ kan̄, ire, ogwu òmama gwun̄ ìkisulu gwun̄ ya mgbọ yaage îrọbe ilọ.

²⁵Ogwu ata irọrọ ìkirie inorie ike ejit kan̄ otọbe, ire, owot ogwu ikpak ìkire ukpọk ukpọk.