Read obolo Urọk 14 Bible Online

Urọk 14 - obolo bible

Urọk 14

¹Enenwaan̄ òrọriọọn̄ inu okinama uwu kan̄, ire, enenwaan̄ mbubut ìkisa ubọk kan̄ gaalek igbugbọ uwu kan̄ igwook.

²Ogwu òtatat me ugwem kan̄ okilibi Okumugwem, ire, ogwu òkije nlilọ nlilọ ìkikpọkpọ ọmọ isiki chieen̄.

³Ikọ ogwu mbubut ìkire ikọ ugumulek òkisa osusut ijet ọmọ, ire, ikọ ogwu òriọọn̄ inu ìkisan̄a ọmọ me ufialek.

⁴Ire kpunu eriembuuk òkisi ikwaan̄, okwa inorie anam ìkilaak ukpọk, ire, îre sa me unye eriembuuk ke ekikaan̄ inu owuwa owuwa me uko.

⁵Ogwu ata-ikọ ògbegbe utoon̄-ejit ìkakikan̄ ataak, ire, ogwu ata-ikọ ataak okigwook ataak.

⁶Ogwu òkirọ ene ochak iweek iriọọn̄-inu, ìkakikaan̄; ire, ifuk-ibot ìre mfufet inu inyi ogwu òkakaan̄ ngobo-ntet.

⁷Je nan̄a me lek ogwu mbubut, mije, owu òkpomun̄ ifuk-ibot ge me lek ikọ kan̄.

⁸Iriọọn̄-inu ogwu òriọọn̄ lek ìre igogobo inu òkinu inyi ọmọ itet, ire, burubut ogwu mbubut ìkifiaan̄ ogwukaan̄ lek ifiin̄.

⁹Irọrọ ijo inu ìkirọ ibe ebi mbubut echak imọm; ire, ebi ìkirọ inu òtatat ke îkiyọt me lek.

¹⁰Ejit ene gaalek oriọọn̄ ikeke ọmọ ojatbe ire, ikeya si, kpunu ogwu òkigọọk ọmọ inwọọn̄ unwọọn̄ kan̄.

¹¹Uwu ebi ikpak, ebejijijaka igwook, ire, uwu ọfọ ebi ìkirọ inu òtatat ìbonyenye me ijọn̄.

¹²Îkaan̄ oniin̄ ene okimọnọ ibe ke îtat me lek kan̄, ire, okputut oniin̄ ya ìkire mkpa.

¹³Imọm ìkakigwa ufieejit, unwọọn̄ ìkekikana ufieejit.

¹⁴Ogwu ijo ene ìborie oruru ijo inu kan̄ ijot owot, ire, ogwu ata ene môrie oruru ata ikwaan̄ kan̄ ijot owot.

¹⁵Ogwu wewe, ìkichechieek inu geelek etumube inyi ọmọ, ire, ogwu òriọọn̄ lek ìkigwugwuun̄ chieen̄ ikpọ ijọn̄, sabum ònotap ukot.

¹⁶Ogwu òriọọn̄ inu ìkifefieek owot, mè ikida lek ibọkọ me lek ijo inu, ire, ogwu mbubut ìkichachat chieen̄ iraka isi ge inin̄ emen ijo inu.

¹⁷Ogwu uyok-ejit ìkirọ inu ebot ebot, ogwu ifiọk ìre ogwu ekichacha.

¹⁸Ìrot ogwu una ekiket ìkire burubut, ire, ogwu òriọọn̄ lek okikaan̄ ogbogbo ifuk-ibot.

¹⁹Ebi ijo ife mêtọbọ ibot inyi ebi ata ife; ebi ikpak mêtọbọ ibot me otunchit ebi ata irọrọ.

²⁰Ogwu ugbọọn̄, ebi melek kan̄ si ekichacha, ire, ebi ìkima ogwu ubọọn̄ ìre ogbogbo ene.

²¹Ogwu òkpọkpọ ogwu melek kan̄ chieen̄ isiki, îrọ ijo inu, ire, uga ubelejit môkup inyi ogwu òkaan̄ ata ejit me lek ogwu una.

²²Ogwu òtọt ijo inu, ìkpolọlọ ijeje ilọ oniin̄, ire, ogwu òtọt ata inu, môbọkọ ata ejit mè atikọ.

²³Unye ikwaan̄ geelek ìkekisibi oruru, ire, ikukup ikilo otu, ìkirọ ene inin̄ ugbọọn̄.

²⁴Inu ubọọn̄, ọmọ ore mkpukpe ebi ìriọọn̄ inu, ire, mkpukpe ogwu mbubut ìre burubut.

²⁵Ogwu ata-ikọ òtutumu atikọ me ibot ene, înyan̄a ugwem ene, ire, ogwu ata-ikọ òkakan̄ ataak ikeme ene, ìre ogwu ofiaan̄.

²⁶Ogwu òkitet ukpook me lek Okumugwem îkaan̄ okwukwek ònyenye, eya môre ere ilet-lek inyi bọn kan̄.

²⁷Itetet ukpook me lek Okumugwem ìkinyi ene ugwem; ìkida ene isan̄a me otu ufe mkpa.

²⁸Uwa ene ore umin ogwu ubọọn̄, ire, ogwu ubọọn̄ ogwu kpunu ene me udun̄ ìkakup me lek inu geege.

²⁹Ogwu òkaan̄ ukarajit îkaan̄ ikpele ngobo-ntet, ire, ogwu uyok-ejit ìkiben mbubut kan̄ iwele.

³⁰Emen ejit ene ikup me esuuk, ene òkaan̄ ata lek; ire, ogwu ikaan̄ chieen̄ ile, emen kan̄ okpukpuku ogwook.

³¹Ogwu òfeen̄ ogwu ugbọọn̄, ìnye chieen̄ inyi Òrom kan̄, ire, ogwu òtap ubọk inyi ogwu una, ìnyi Awaji umin.

³²Inu ikpak ogwu ikpak, ọmọ ke mêsa ida ogwu ikpak ito, ire, ogwu ata irọrọ îkaan̄ ere nlet mgbọ ọmọ isikwu.

³³Iriọọn̄-inu ìkikup me emen ejit ogwu òkaan̄ ngobo-ntet, ire, ìkekijeen̄ lek si, ikerere me etete ebi mbubut, mîriọọn̄.

³⁴Ata irọrọ okirọ inyi ido ikaan̄ umin, ire, ijo inu ìkisa ochak ijet ido.

³⁵Gwun̄ ikwaan̄ òriọọn̄ lek ìre inu ubelejit inyi ogwu ubọọn̄, ire, gwun̄ ikwaan̄ òkisa esip itet ọmọ ìkibọkọ unaan̄-ejit kan̄.