Read obolo Urọk 15 Bible Online

Urọk 15 - obolo bible

Urọk 15

¹Ata otu ifọọk-ikọ ìkisiki unaan̄-ejit, ire, ijo otu ikọ ìkiribi unaan̄-ejit.

²Ikọ ogwu òriọọn̄ inu ìkirọ ifuk-ibot itop, ire, ogwu mbubut ìkitumu ikọ mbubut mbubut.

³Chieen̄ Okumugwem ìsoso otutuuk ere, ikikpọ ebi ijo mè ebi ata.

⁴Ata otu ikọ ìkitap ene ugwem me emen, ire, ijo otu ikọ ìkiwọ ekwukwu ene.

⁵Ogwu mbubut okikpọ ikan̄-inu ogwu ute isiki chieen̄, ire, ogwu ògbagban̄ utọn̄ me lek ikan̄-inu, ọmọ oriọọn̄ lek.

⁶Inu ubọọn̄ ìkijojot uwu ogwu ata ene, ire, mkpukpe ogwu ikpak ìkije melek ufialek.

⁷Ifuk-ibot ìkinan̄a me otu ogwu òriọọn̄ inu isibi, ire, ejit ogwu mbubut ìkakup ikeya.

⁸Ngwugwa ebi ikpak ìre mbuban inu me lek Okumugwem, ire, uriaak ebi ìkirọ inu òtatat ìre inu ubelejit inyi ọmọ.

⁹Ugwem ebi ikpak ìre mbuban inu me lek Okumugwem, ire, ọmọ ìkima ogwu òkirọ ata irọrọ.

¹⁰Ikpele osusut ọmọ òwa inyi ogwu òtetele irọrọ inu òtatat; ogwu ìkakima ikan̄-inu, môkwu.

¹¹Ama ekwukwu mè inu geelek òkup me emen kan̄ ìkup obook me chieen̄ Okumugwem. Ire ikeya, emen ejit ogwu ebilene ìkpokọt ilet me chieen̄ kan̄ kubọk ge.

¹²Ogwu òkichak ene ochak ìkakima ibe ekan̄ inu enyi ọmọ, ìkposisi si lek ogwu òriọọn̄ inu isi iweek nteme.

¹³Ejit isibele ene, isi ene îra itọn̄ọ, ire, ejit isifieek ene, ekwukwu ene îra iwọ.

¹⁴Ogwu òkaan̄ ejit òkigobo inu itet okiweek ifuk-ibot, ire, otu ogwu mbubut ìkima ikọ burubut.

¹⁵Me lek ogwu òkup me tukutuku, usen geelek ìre ijo usen, ire, me lek ogwu ejit obelebe, usen geelek ìre usen ijọk.

¹⁶Ikakaan̄ sọntiik inu melek ukpook Okumugwem, înwọn igak ikakaan̄ owuwa inu ubọọn̄ melek ufialek.

¹⁷Usun̄ inwan̄ inwan̄ eriebe me imumechieen̄, înwọn igak usun̄ ufuk ufuk anam eriebe me ochicha ejit.

¹⁸Ogwu uyok-ejit ìkito ibaak, ire, ogwu m̀memem ejit ìkirọ gọlọgọlọ ifo.

¹⁹Oniin̄ ogwu ugbek, esa ukpak iwak igọm, ire, oniin̄ ogwu òtatat ìre uga oniin̄ òwowook.

²⁰Gwun̄ òriọọn̄ inu ìkirọ ejit ogwu ute ibele, ire, gwun̄ òrere mbubut ìkikpọ ogwu uga isiki chieen̄.

²¹Mbubut ìkitotop me lek ogwu una ngobo-ntet, ire, ogwu òkaan̄ ngobo-ntet ìkije me oniin̄ òtatat.

²²Ere kpunube nteme, otitọt ìkigbugbuku, ire, ebi nteme isiwa, otitọt îra ikeke inye ebon.

²³Ikọ ene ofọọkbe ijaan̄ ìkinyi ene ya unwọọn̄; itutumu ikọ me mgbọ îgbebe, ìnwọnwọn ijaan̄ lek.

²⁴Oniin̄ ugwem ìkisa ogwu òriọọn̄ lek ifo inyọn̄, ufuna ọmọ ikakwala ìsiki ifo ama ekwukwu.

²⁵Okumugwem môgbugbọ uwu ogwu ugumulek igwook, ire, môgwuun̄ okike ijọn̄ ogwu nwakpa inye.

²⁶Ekiket ebi ikpak ìre mbuban inu me lek Okumugwem, ire, ikọ ata ejit ìre ikọ òtatana me lek kan̄.

²⁷Ogwu òkima nlilọ oruru ìkisa ufialek itap me uwu kan̄, ire, ogwu òchacha irerie udun̄ môgat ugwem.

²⁸Ogwu ata irọrọ ìkigegen ibot sabum ònofọọk ikọ, ire, ogwu ikpak ìkigbọgbọ ijo ikọ me otu igwook.

²⁹Okumugwem îjọn̄ọ ere me lek ebi ikpak, ire, ìkinọ uriaak ebi ata irọrọ.

³⁰Isi imọm imọm ìkinyi ene ubelejit; ata etip ìkinye ene otu ukwuuk.

³¹Ogwu òbọbọkọ ikan̄-inu òkinyi ene ugwem, ene ya môkọt ikup me etete ebi ìriọọn̄ inu.

³²Ogwu òjijit ikan̄-inu, ìgwen lek kan̄ urieek, ire, ogwu ògbagban̄ utọn̄ me lek ikan̄-inu okaan̄ ngobo-ntet.

³³Itetet ukpook me lek Okumugwem okijeen̄ ene iriọọn̄-inu, isisiki lek okisa umin ijet ene.