Read obolo Urọk 16 Bible Online

Urọk 16 - obolo bible

Urọk 16

¹Ogwu ebilene môkọt itọt otitọt geelek me ejit kan̄, ire, òta ufọọk-otu ìbonan̄a me ubọk Okumugwem.

²Otutuuk inu geelek ene okirọ ìkitatat me chieen̄ kan̄, ire, Okumugwem okiwọlọ inu òkup me emen ekwukwu ene ikpọ.

³Yaka ikwaan̄ kwun̄ geelek tap me ubọk Okumugwem, ke inu geelek otọtbe môkaan̄ ibot.

⁴Inu geelek Okumugwem orọbe, ìrọ inyi nkeek kan̄; ikerere ebi ikpak, ìrom ema isun̄ ikpọ usen mfufiat.

⁵Ogwu ugumulek geelek ìre mbuban inu me lek Okumugwem; sulu emi ata kpọ, ema kpebenwọnọ osusut.

⁶Sa me atata nnwọn mè igbegbe utoon̄-ejit ke ekichit ijo inu; sa me itetet ukpook me lek Okumugwem ke ekitele ijo inu.

⁷Ene isikirọ inu itop Okumugwem me lek, îra irọ ikerere ebi ochicha ene ya ekup me esuuk melek ene ya.

⁸Irere ugbọọn̄ mè ikaan̄ ata irọrọ, înwọn igak ininin̄ ubọọn̄ me ngan.

⁹Ene ìkisa ejit kan̄ itọt inu ọmọ oborọ, ire, îre Okumugwem okidọmọ ubọk îborọ.

¹⁰Ikọ ogwu ubọọn̄ ìre ikọ òkup mbuban, ọmọ ikalọ otu ìfieek ijo oyerebet.

¹¹Okumugwem ìkima ibe eketọ inu mè ekeroon̄ inu me kpunube mfeen̄; otutuuk inu ekisa itọ inu ìre ubọk ikwaan̄ kan̄.

¹²Ebi ubọọn̄ echacha ijo irọrọ, mije, ata irọrọ okirọ mkpulu ikeke inye.

¹³Ebi ubọọn̄ ekinwọọn̄ otu òkitumu atikọ; ema ekima ogwu òkitumu inu òtatat.

¹⁴Mkpa okup inyi ogwu òrọ ogwu ubọọn̄ inu unaan̄-ejit, ire, ogwu òriọọn̄ inu môkọt isiki ọmọ ejit.

¹⁵Isi ogwu ubọọn̄ isitọn̄ọ, ugwem ire eya; nnwọn kan̄ ìkisiki ene lek kubọk ibot aya otu ibot.

¹⁶Ikakaan̄ iriọọn̄-inu înwọn igak ikakaan̄ alata araran̄; ikakaan̄ ngobo-ntet înwọn igak ikakaan̄ alata okuket.

¹⁷Ogwu òtatat ìkije agba agba me lek ijo inu; ogwu òkibem oniin̄ kan̄ ìkibem ebek ugwem kan̄.

¹⁸Ugumulek ìkijijaka ene; ubenelek ìkida ene ito.

¹⁹Isisiki lek mè ire ugbọọn̄, înwọn igak igọgọọk ebi ugumulek isi iche inu efumbe.

²⁰Ogwu òkibọkọ nteme, inu môje ijaan̄ me lek; ogwu òtoon̄ ejit me lek Okumugwem, uga ubelejit okup inyi.

²¹Ogwu òriọọn̄ inu ke egwen ibe ìre ogwu òkaan̄ ngobo-ntet; ata otu ikọ ìkinyi ene ikween̄-inu isọkọ.

²²Iriọọn̄-inu ìre ugwem inyi ogwu òkakaan̄, ire, ikakan̄ inu inyi ebi mbubut ìre inu burubut.

²³Ejit ogwu òriọọn̄ inu ke ikọ iriọọn̄-inu okinan̄a isibi, mè ikitap ikween̄-inu isọkọ me otu ikọ kan̄.

²⁴Ikọ ata ejit ìbet lek aran̄ akwọọk, ìkininin̄i me ibot ejit ene, mè ikirọ otu ukwuuk ene inye.

²⁵Îkaan̄ oniin̄ ene okimọnọ ibe ke îtat me lek kan̄, ire, okputut oniin̄ ya ìre mkpa.

²⁶Ogwu òsi ikwaan̄, ìsi inyi ebek kan̄, uraafiọọn̄ kan̄ okibieen̄ ọmọ ije.

²⁷Ogwu ene ikike òkifuku ijo inu isibi, ikọ kan̄ ìre ukan̄ ekirika.

²⁸Ogwu mfufiọk ìkitap yalayala, ogwu mbia ìkigwak unene ibot ejit.

²⁹Ogwu afa ìkileke ogwu melek kan̄, mè ikisa itap me ijo oniin̄.

³⁰Ogwu òsa chieen̄ ifiik ene, ìkitọt ijo otitọt; ogwu òban̄a otu, ìben ijo inu me ejit.

³¹Isọọn̄ ìre okpibot ubọọn̄ eyi umin; îre ebi ìluluk ugwem ata irọrọ ekikaan̄.

³²Ikakaan̄ ukarajit înwọn igak irere ogwu usọ akọn̄; itetet lek ikaan̄ înwọn igak ititim akọn̄ ibọkọ ama.

³³Mêkọt itọp inu ekisa iroon̄ nriroon̄, ire, îre Okumugwem okitumu ifieek agan̄ ìbonwọn.