Read obolo Urọk 17 Bible Online

Urọk 17 - obolo bible

Urọk 17

¹Itataka okpọkọ fituru òchachiaak iruk, me esuuk, înwọn igak ikukup me ere ekirie uga ijọk, me etim.

²Ogwu usun̄ òriọọn̄ inu môkpulu gwun̄ nte uwu kan̄ ogwu òkisa esip itet ogwu ute, mè igọọk ebi ngwan̄ gwun̄ ya ikaan̄ ìrot.

³Ekisa uchieen̄ mè unye ukan̄ itọ alata okuket mè alata araran̄ eyi atata; ire, Okumugwem okiroon̄ ejit ebilene ikpọ.

⁴Ijo ene ìkigban̄ ijo ikọ, ogwu ataak ìkigban̄ ikọ ikpak.

⁵Ogwu òchak ogwu ugbọọn̄ ochak, ìkido Òrom ene ya erieen̄; ogwu òbebele ejit me lek ùrioon̄ òtotoon̄ ene, môbọkọ osusut.

⁶Ikakan isoon̄ bọn bọn ene ìre okpibot ubọọn̄ eyi umin, umin eyi bọn ìre nte kiban̄ mè nga kiban̄.

⁷Ikọ òtotop, ogwu mbubut ìkakima, ikọ ataak, ìbojeje itat me lek ogwu mkpulu?

⁸Ikpoko udun̄ ìre ugwun̄ atisi me chieen̄ ogwu ònyinyi, ere geelek îtapbe isi, inu ìkijeje ijaan̄ me lek kan̄.

⁹Ogwu òtele nrọ-nlọ ene, ìkirọ imumechieen̄ ije inyi isi, ire, ogwu òkikpa ijo inu ya ikana, ìkigwak unene ibot ejit.

¹⁰Ikakan̄ inu inyi ogwu òriọọn̄ lek, îsi ikwaan̄ igak efit otu njijan̄ esulube ogwu mbubut.

¹¹Inyenye ibot inyi mkpulu ke ogwu ijo ene okiweek, mêria ogwu ikwaan̄ òkirọ ikpak ibe isi isulu ọmọ osusut.

¹²Ijeje ichichini ibo nriọk etetbe bọn kan̄ isan̄a me lek, înwọn igak ijeje ichichini ogwu mbubut me emen mbubut kan̄.

¹³Ogwu òsa ijo inu ikpe ewe ata inu ene orọbe ọmọ, uyọrọlek ìkpota me uwu ene ya.

¹⁴Ibebene gọlọgọlọ ìkup kubọk esan̄a usiik me chieen̄ uji òtitibi; sabum okana etim, yat ubọk san̄a me lek.

¹⁵Ogwu òsibi oyerebet inwọn ogwu ikpak, mè ogwu òtip ogwu ata irọrọ oyerebet, ema ene iba cha ìre mbuban inu me lek Okumugwem.

¹⁶Ikpoko isasa ilep iriọọn̄-inu ìkirọ keke me ubọk ogwu mbubut, me ere ikakaan̄ge nden̄ isasa itap iriọọn̄-inu?

¹⁷Unene ìkima ene mgbọ geelek, ire, ekiriọọn̄ ngwan̄ me mgbọ uyọrọlek.

¹⁸Ogwu una ngobo-ntet ìkibọkọ ene me ata-ikọ, mè ochieek use me ibot ogwu melek kan̄.

¹⁹Ogwu òma ijo inu, ìma uyọrọlek; ogwu òkitumu otu ile, ìkigwen unan inyi lek kan̄.

²⁰Ogwu mfufiọk ejit ìkakimun̄ nnwọn, ogwu ijo otu ikọ, ìborọn̄ inin̄ uyọrọlek.

²¹Ute òbon gwun̄ burubut, ìbon ufieejit inyi lek kan̄, nte ogwu mbubut ìkakikaan̄ ubelejit.

²²Ogwu òkaan̄ ubelejit me ejit, îkaan̄ ata igwagwa, ufieejit ìkiwọ ene otu ukwuuk.

²³Ogwu ikpak ìkibọkọ ikpoko udun̄ me nlelet, isa inwunween̄ unen oyerebet.

²⁴Ogwu òkaan̄ ngobo-ntet ìkigwuun̄ chieen̄ me lek iriọọn̄-inu, ire, ogwu mbubut ìkibubat chieen̄ isi igwook me okputut linyọn̄.

²⁵Gwun̄ burubut ìkisa unaan̄-ejit inyi ogwu ute, mè ikirọ ugwem ogwu uga ijat.

²⁶Ìkanwọn ibe etet ogwu ìkarọ ìlọ ibe ikpe mkpukpe, ìkanwọn si ibe esulu ebi ibot njijan̄, mije unen eru ema ekaan̄be.

²⁷Ogwu òkaan̄ ifuk-ibot ìkiteten̄ ikọ kan̄; ogwu òkaan̄ ngobo-ntet ìkakikaan̄ fukufuku ejit.

²⁸Ikerere ogwu mbubut, emọnọ ibe ke îriọọn̄ inu, me mgbọ îriaan̄be ere; ogwu òchichit otu kan̄, ìkasan̄a amọn, ene ya îkaan̄ ngobo-ntet.