Read obolo Urọk 18 Bible Online

Urọk 18 - obolo bible

Urọk 18

¹Ogwu òkije ọmọ gaalek ìkiweek nnwọn eyi lek kan̄ gaalek, ìkinanaan̄ ejit ikeme ubọk ògbegbe ibe ekerọ inu.

²Igogobo inu ekitumu itet ìkakitop me lek ogwu mbubut, ire, inyinyi nket eyi kan̄, eya ke îkinwọọn̄.

³Ogwu ikpak isinu, ikpọkpọ ene chieen̄ isiki îra inu; esip isinu, ochak îra igọọk inu.

⁴Ikọ otu ene ìdọk kubọk mun̄ emen irem; ogbuuruk iriọọn̄-inu ìkup kubọk ògbugbuk mun̄ emen okolo.

⁵Ìkanwọn ibe efieek oyerebet enwọn ogwu òlọlọ ikan, ìkajaan̄ ibe ejit ogwu ìkalọ ikan unen oyerebet.

⁶Otu alọm ogwu mbubut okisa ibaak ijet ọmọ, otu usem kan̄ okirọ egoon̄ ọmọ akpọ.

⁷Otu usem ogwu mbubut okifiat ọmọ, otu alọm kan̄ okitap ọmọ me uyọrọlek.

⁸Ikọ ogwu òkpa ene ìkitop kubọk atalek inorie òtotop, ìkiraraka irọn̄ me irak irak owot ene.

⁹Ogwu ugbek me lek ikwaan̄ kan̄, mè ogwu òkifiat inu, ema ene iba ìre ngwan̄.

¹⁰Erieen̄ Okumugwem ìre ikput-lek ònyenye, ebi ata irọrọ ekitap ibot me ubọk kan̄, mè èkup me utelelek.

¹¹Ogwu ubọọn̄ ìkisa inu ubọọn̄ kan̄ irọ mgban ikwek lek, mè ikimọnọ ke îre ogọ ikput lek òbebene.

¹²Igugumu lek ìkida ene ito, isisiki lek okinyi ene umin.

¹³Idadasi ifọọk otu ikọ sabum eninọ ibot ikọ, eya ìre inu burubut mè inu esip.

¹⁴Ekwukwu ene obotet ene ikaan̄ me emen orukan̄, ire, ire ekwukwu ya ìkanye, ekene môkọt ibeme?

¹⁵Ejit ogwu òkaan̄ ngobo-ntet okikaan̄ ifuk-ibot, utọn̄ ogwu òriọọn̄ inu ìkiweek inọnọ ikọ òkaan̄ ifuk-ibot.

¹⁶Uche echebe inyi ene ìkichili oniin̄ inyi ogwu òcheche, mè orọ ene ya ikaan̄ isi me ere ebi ilile ekupbe.

¹⁷Oyerebet ìkikup kubọk înwọn ogwu òdadasi ikpa otu ikọ, mege ogwu agan̄ keyilọ isinido ọmọ idodo.

¹⁸Nriroon̄ ìkirọ inyi ifan̄a iwọ, mè ikiteek nteek me etete ebi unye.

¹⁹Itutumu ikọ ita melek ngwan̄ erọbe ilọ îyọt igak ibọbọkọ ama ònyenye; gọlọgọlọ ìkitap ukput me etete ngwan̄ kubọk otunchit ama mgban akọn̄.

²⁰Ata ikọ ònan̄a me otu ene ìkijot ogwukaan̄ lek owot; inu òsibi ọmọ me otu alọm môjot ọmọ owot.

²¹Ugwem mè mkpa ìkup ene me otu alọm, ebi ìmama ikọ otu alọm kiban̄ mêbọkọ mfut ònan̄a me lek.

²²Ogwu òweweek nwa imun̄, îweek ata inu imun̄; ọmọ îbọkọ nnwọn-isi me ubọk Okumugwem.

²³Ogwu ugbọọn̄ ìkibebeek nsan, ire, ogwu ubọọn̄ ìkifọọk ikọ otu unye unye.

²⁴Owuwa unene ìkitap ene me ichep, ire, îkaan̄ unene òkigba iriaak ene me lek igak ngwan̄.