Read obolo Urọk 19 Bible Online

Urọk 19 - obolo bible

Urọk 19

¹Ogwu ugbọọn̄ òkakaan̄ ulibi inyi lek kan̄, înwọn igak ogwu mbubut òkitumu ikọ bukubukubuku.

²Ikeya si, ene ikukup ìkakaan̄ ifuk-ibot, ìkanwọn; mfufet ukot ije ìkisa ene itap me ijo inu.

³Ene isisa burubut ijijaka ugwem kan̄ isan̄a, ìyaka inikinaan̄ ejit inyi Okumugwem.

⁴Inu ubọọn̄ ìkitaba owuwa unene inu, ire, ugbọọri ìkilililaba unene isan̄a.

⁵Ogwu ata-ikọ ataak ìkponwọnọ osusut, ogwu òkigwook ataak ìkpoje ikike ifo.

⁶Owuwa ene ekisi iweek nnwọn me ubọk ogwu ilile; ene geelek ìre unene ogwu òkiche uche inyi ene.

⁷Otutuuk bọn ulọk ogwu ugbọọn̄ ekigwegwen ọmọ urieek; keke ke ebi unene kan̄ eberọ igak ijeje agba agba me lek kan̄? Ọmọ ikelilibi igọọk ema ikiriaak, ema ekichechieen̄ ita kpai.

⁸Ogwu òkakaan̄ iriọọn̄-inu, ìma lek kan̄; ogwu òkakaan̄ ngobo-ntet, inu môje ijaan̄ me lek.

⁹Ogwu ata-ikọ ataak ìkponwọnọ osusut; ogwu òkigwook ataak ìbokwukwu.

¹⁰Ìkagbe ibe ogwu mbubut ikirie utop otu, ikeya si, ìkatat ibe ogwu usun̄ ikikpulu bọn ebi ubọọn̄.

¹¹Iriọọn̄-inu ìkakichieek ibe ene inaan̄ ejit gbei, ene isasan̄a chieen̄ me lek ijo inu erọbe ọmọ, ìre umin inyi ene ya.

¹²Unaan̄-ejit ogwu ubọọn̄ ìkup kubọk egbe àtat okigbin, ire, nnwọn kan̄ ìkiso ere kubọk mbat ògwook me lek mbubet.

¹³Gwun̄ burubut ìkijijaka ogwu ute, nwa òkibaak ibaak ìkikup ene me lek ifi ifi, kubọk ibot òkirọn̄ọ sọi sọi sọi.

¹⁴Uwu mè inu ubọọn̄ ìre ìrot ònan̄a me ubọk ute mè uga, ire, nwa òkaan̄ iriọọn̄-lek, Okumugwem okinyi ene.

¹⁵Uga ilaak ìkikeme ogwu una efuuk; uraafiọọn̄ ìkitaka ogwu ugbek.

¹⁶Ogwu òsusun̄ ikan ìkisun̄ ugwem kan̄, ire, ogwu òkpọkpọ ugwem kan̄ ilọ chieen̄ môkwu.

¹⁷Ogwu òkaan̄ ata ejit me lek ogwu ugbọọn̄, ìfọọk inu inyi Okumugwem, Okumugwem môkpe ene ya mkpukpe ubọk ikwaan̄ kan̄.

¹⁸Sulu gwun̄ kwun̄, mgbọ mgbọ ìkalọlọ-nu, kakpọkpọ ìmọnọ me ejit kwun̄ ibe, ibokwu, ikwu ma!

¹⁹Ogwu uga uyok-ejit môbọkọ osusut uyok-ejit kan̄, ire onyan̄a ọmọ isibi, owu òbokpọkpọ ikinyan̄a ọmọ ikeya.

²⁰Gban̄ nteme, mè bọkọ ikween̄-inu, inyi owu môre ogwu òriọọn̄ inu me mgburudun̄.

²¹Ene môkọt itọt owuwa inu ìborọ me emen ejit kan̄, ire, nkeek Okumugwem, eya oborọ.

²²Inu ekiweek me emen ene ìre ikakaan̄ ata ejit, ogwu ugbọọn̄ înwọn igak ogwu ataak.

²³Ogwu òkakaan̄ ukpook Okumugwem me emen kan̄ môkaan̄ ugwem, môrie ijot owot, mè itap efuuk, ufialek ìkpore ọmọ lek.

²⁴Ubọk ogwu ugbek ìkibia me emen alala inorie, imọmọnọ inorie ya itap me otu ìre ugak me lek kan̄.

²⁵Sulu ogwu òkirọ ene ochak osusut, ogwu una ekiket môkween̄ iriọọn̄-lek; kan̄ inu nyi ogwu òkaan̄ ngobo-ntet, môgobo ifuk-ibot itet.

²⁶Gwun̄ òrọ ogwu ute nnaan̄, mè ilap ogwu uga isibi, ọmọ ìre gwun̄ òkisa esip mè ochak inu.

²⁷Gwun̄ n̄a, ire òkayaka ìgban̄ utọn̄ me lek ikween̄-inu, owu môje itele ikọ òkinyi ene ifuk-ibot.

²⁸Bukubuku ata-ikọ ìre ichachak unen oyerebet ochak; otu ogwu ikpak ìkimeen̄ ijo inu.

²⁹Itip-oyerebet ìkup inyi ebi ìkirọ ene ochak, sà njijan̄ okup inyi udun̄ ebi mbubut.