Read obolo Urọk 2 Bible Online

Urọk 2 - obolo bible

Urọk 2

¹Gwun̄ n̄a, ire obọkọ ikọ n̄a itap, mè isun̄ ikan n̄a me emen kwun̄,

²mè isa utọn̄ kwun̄ inyi iriọọn̄-inu, mè isa ejit kwun̄ inyi ngobo-ntet;

³ire otaan̄ ukpo iweek ikakaan̄ ngobo-ntet, mè ibene ida ikibọn̄ọ ngobo-ntet;

⁴ire oweek ọmọ kubọk ekiweek alata okuket, mè iweek ọmọ kubọk inu ubọọn̄ òlelet;

⁵mgbọ ya ke obogobo itet inu ikakaan̄ ukpook Okumugwem orebe, mè iweek si irọriọọn̄ Awaji imun̄.

⁶Mije, Okumugwem okinyi ene iriọọn̄-inu. Otu kan̄ ke ifuk-ibot mè ngobo-ntet okinan̄a isibi.

⁷Ọmọ ìsusun̄ ntim-mkpan̄ iban ebi ìkirọ inu òtatat, mè ire agbọ òkikput lek ebi kpekirọ nlilọ inu.

⁸Ọmọ okibem oniin̄ ebi ìkirọ unen, mè ikikpọ chieen̄ me lek oniin̄ ebi ìkigọọk ọmọ me udun̄.

⁹Mgbọ ya ke owu môgobo inu òtatat, mè eyi ònenen, mè eyi ònwọnwọn, mè oniin̄ geelek òjajaan̄ itet.

¹⁰Iriọọn̄-inu mônin̄ me ejit kwun̄, ngobo-ntet mônenitop owu me lek.

¹¹Ata nkeek môre ikput-lek inyi owu, ngobo-ntet môre inu môkibem owu,

¹²mè inyan̄a owu isibi me ijo otu oniin̄, mè ubọk ebi ìkigen ibak itumu ikọ ofiaan̄;

¹³ebi ìkitele ijeje me oniin̄ ònenen, mè isi ikije me oniin̄ òdudun;

¹⁴ebi irọrọ ijo inu okitop me lek, ìkinwọọn̄ igegen ibak itumu ijo ikọ ofiaan̄;

¹⁵ebi oniin̄ kiban̄ ìkatat, ebi kpebekọt itoon̄ ejit me lek me oniin̄ kiban̄ geelek.

¹⁶Ata nkeek mè ngobo-ntet mônyan̄a owu isibi me ubọk enenwaan̄ barabat, mè irọ inyi owu ònwọnọ unin̄i otu ikọ ogwu enenwaan̄ ikarege nwa kwun̄;

¹⁷ogwu òtetele olom òfefieek ọmọ asi me ebon, mè iwuuk ibot înyan̄abe inyi Awaji kan̄.

¹⁸Mije uwu kan̄ ìbosa ene ijet mkpa, oniin̄ kan̄ ìbosa ene isi ama ekwukwu.

¹⁹Kpunu ogwu òsisi lek kan̄, mè igwu ikom ika, mè ìyaka ire, ikọt ije inire oniin̄ eyi ugwem.

²⁰Sa me ikeyi, owu môkije me oniin̄ ebi ata ife, mè ikigọọk oniin̄ ebi ata irọrọ.

²¹Mije, ebi ìkirọ inu òtatat ebeluk me linyọn̄, ebi kperọ inu geege ilọ ebekup me emen kan̄.

²²Ire, ebi ikpak mêkwaan̄ ita me linyọn̄, mêjim ebi ofiaan̄ isan̄a me emen kan̄.