Read obolo Urọk 20 Bible Online

Urọk 20 - obolo bible

Urọk 20

¹Miin̄ ìkirọ ene ochak, miin̄ ukan̄ ìkirọ ene itap okput, otutuuk ebi geelek miin̄ osabe kpekaan̄ iriọọn̄-inu.

²Unaan̄-ejit ogwu ubọọn̄ ìkup kubọk egbe àtat okigbin, Ogwu òsi ìribi ọmọ unaan̄-ejit ìbosa ugwem kan̄ inwene.

³Ililibi etim ìre umin inyi ene, îre ogwu mbubut okichieek mkpa me lek ibaak.

⁴Ogwu ugbek ikawopge uko me mgbọ iwop-uko, me mgbọ irọkọ-uko, môbubeek chieen̄ igak, ìkpomun̄ inorie.

⁵Ata nteme ìkup kubọk mun̄ òdọdọk me ejit ene, ire, ogwu òkaan̄ ngobo-ntet obokọt ichibi isibi.

⁶Owuwa ebi ene ebe ema ìre ebi ata ejit; ire, ìre ekene obokọt iweek ene ge ògbegbe utoon̄-ejit imun̄?

⁷Ogwu òkiluk ugwem kan̄ me ikarọge ìlọ ìre ogwu ata irọrọ, uga ubelejit môkup inyi bọn kan̄ mgbọ chieen̄ kan̄ isinan̄a.

⁸Ogwu ubọọn̄ isikweek me inyọn̄ ogboon̄ oyerebet, ìkisa chieen̄ chieen̄ igop otutuuk ijo inu geelek isibi.

⁹Ekene môkọt itumu ibe, “Nra igwọk ejit n̄a itana, ǹtatana inan ijo me lek”?

¹⁰Ijo ubọk itọ-inu mè ijo ubọk iroon̄-inu, inu iba chi ìre mbuban inu me lek Okumugwem.

¹¹Ikerere gwun̄, ekisa irọrọ kan̄ iriọọn̄ ọmọ, mè ìre inu îkirọ îtana mè ìre înen.

¹²Utọn̄ òkinọ ikọ mè chieen̄ òkimọọn̄ inu, îre Okumugwem orom ema iba cha.

¹³Kama ilaak, inyi okakana ugbọọn̄, top chieen̄, owu môrie inorie ijot owot mè isik.

¹⁴Ewe ìkakinin̄ me chieen̄ ogwu òbolelep, ire, isilep isa ije inan̄a, îra ikigugo lek ibe înwọn ọmọ.

¹⁵Alata araran̄ mè ewuuk unye otu ewe rubi ọmọ òwa ogbogbo, ire, ogwu òkitumu ikọ òkaan̄ ifuk-ibot ìre inu unye otu ewe ònanan enenen.

¹⁶Bọkọ ofọnti ogwu òbọkọ ogwu kperiọọn̄ isi me ata-ikọ tet kaan̄, ire, tet ọmọ me lek kan̄ me nsọọn̄ ire ke îre nwa òsi ugan ke îbọkọ me ata-ikọ.

¹⁷Inu ekaan̄be me ngan ìkitotop igo irerie, ire, me òta kan̄, ìkikup kubọk bọn ewuuk ojot ene akpa otu.

¹⁸Ekisa nteme itọt otitọt, mè ikisa ata mbia akọn̄ itim akọn̄.

¹⁹Ogwu mbia ìkikpọk mbum ikọ nlelet; kanin̄ unene melek ogwu ìkakichit otu.

²⁰Gwun̄ òfefieek otu inyi ogwu ute mè ogwu uga, mêwut mkpukan̄ ugwem kan̄ iniin̄ me emen ekpuk udun.

²¹Ìrot ebọkọbe me ejit ile me ibebene, ìkabore ugbana me mgburudun̄.

²²Kabe, “Marọ ene useen̄ ijo inu îrọbe emi.” Kup kpọ Okumugwem, ke mônyan̄a owu isibi.

²³Itọtọ inu ifeen̄ ene ìre mbuban inu me lek Okumugwem, iroroon̄ inu ngan ngan inyi ene ìre ijo inu me lek kan̄.

²⁴Okumugwem okineen̄ ukot ije ogwu ebilene, kpa ubọk ke ene obokọt iriọọn̄ oniin̄ ọmọ okije?

²⁵Isasa me uran-lek ichieek Awaji use, mè iyaka inikibọnọ lek me mgburudun̄, ìre ufe.

²⁶Ogwu ubọọn̄ òriọọn̄ inu ìkigop ebi ikpak isibi, mè ochimi ema mun̄ osibi me lek.

²⁷Ekwukwu ene ìre mkpukan̄ Okumugwem, ìkiwọlọ emen emen ejit ene ikifuku nlelet inu geelek isibi.

²⁸Ata ejit mè igbegbe utoon̄-ejit, ọmọ ore ikput-lek inyi ogwu ubọọn̄, sa me ata ejit ke ogboon̄ kan̄ obokeke inye.

²⁹Umin nsabọn irieen̄ ìre unye ema ekaan̄be, òrirọ ebi ugane ìre isọọn̄ ibot kiban̄.

³⁰Osusut òtap ene unan me lek, ìkisan̄a ijo inu isibi me emen ene, ikeya si ke njijan̄ okirọ me emen udọk udọk ejit ene.