Read obolo Urọk 21 Bible Online

Urọk 21 - obolo bible

Urọk 21

¹Ejit ogwu ubọọn̄ ìkup me akajit ubọk Okumugwem kubọk mun̄ emen okolo, ìkida ejit ya ikana inin̄ agan̄ geelek òneneme ọmọ.

²Inu geelek ene okirọ ìkitatat me chieen̄ ogwukaan̄, ire, îre Okumugwem okiwọlọ inu òkup ene me ejit ikpọ.

³Ata irọrọ mè inu ònenen, înwọn me lek Okumugwem igak ngwugwa.

⁴Ikpọkpọ ene chieen̄ isiki mè ugumulek, òrere inu ebi ikpak ekisa iluk ugwem kiban̄, ìre ijo inu.

⁵Otitọt ebi ìkisiki lek irọ ikwaan̄ okisibi oruru, ire, eyi ebi gbamgbam ìkisa ugbọọn̄ inu.

⁶Inu ubọọn̄ esabe ngan ikaan̄, ìre oruk òboniniin̄ ichep, mè ire ufe môsabe mkpa ijet ene.

⁷Inu afa ebi ikpak ekirọ môtet ema kubọk ufe, mije, ema ekijit irọrọ inu ònenen.

⁸Ogwu oyerebet otipbe, ìkirọ inu kan̄ kọnọkọnọkọnọ, ire, ogwu ubọk otanabe, eru kan̄ ìkinenen.

⁹Ene iluluk ọmọ gaalek me otu utọn̄ inyọn̄ otoon̄-uwu ikimeen̄ urọt ataak, înwọn igak iluluk me emen uwu melek enenwaan̄ òkinwọọn̄ ibaak.

¹⁰Ene ikpak ìkakitele inu ikpak, ìkakikaan̄ nsan me lek ogwu melek kan̄.

¹¹Ogwu òchak ene isibọkọ osusut, ogwu una ekiket îra iriọọn̄ inu, ire, ogwu òriọọn̄ inu isibọkọ ikween̄-inu, îra ikaan̄ ifuk-ibot.

¹²Ogwu Ata Irọrọ ìkigwuun̄ chieen̄ me emen uwu ebi ikpak, môtọp ema ikana ikook me emen inu ikpak kiban̄.

¹³Ogwu òchit utọn̄ mgbọ ogwu ugbọọn̄ okitaan̄ ukpo iweek ntap-ubọk, ọmọ isiyaka itaan̄ ukpo eyi kan̄, kpunu si ogwu òbofọọk ọmọ otu.

¹⁴Uche enyibe me nlelet ìkisiki unaan̄-ejit, ikpoko udun̄ echitbe me ekwut inyi, ìkisuuk uyok unaan̄-ejit.

¹⁵Irọrọ inu ònenen, ìkinyi ebi ata irọrọ ubelejit, ire, ìkitap ebi ijo irọrọ uga ufieejit me emen.

¹⁶Ogwu òtetele oniin̄ ebi ìriọọn̄ lek, ìbosi isiki efuuk melek ebi ìkwakwaan̄.

¹⁷Ogwu òkinwọọn̄ utop otu, môkana ugbọọn̄, ogwu òkinwọọn̄ miin̄ mè aran̄, ìkponin̄ ubọọn̄.

¹⁸Mêsa ebi ikpak inwene ibot ebi ata irọrọ, mè isa ebi mfufiọk inwene ibot ebi ìkirọ inu òtatat.

¹⁹Iluluk me emen èwê, înwọn igak iluluk melek enenwaan̄ òkinwọọn̄ ibaak mè unaan̄-ejit.

²⁰Aran̄ mè inu utop otu geelek ìkakinan me uwu ogwu òriọọn̄ inu, ire, ogwu mbubut ìkirerie inu geelek îkaan̄be isan̄a kpai.

²¹Ogwu òkilibi igọọk ata irọrọ mè ata ejit, môkaan̄ ugwem mè ata irọrọ mè ulibi.

²²Ogwu òriọọn̄ inu okikọt itim ikpan̄ ama ebi usọ akọn̄, mè igbugbọ okwukwek akọn̄ cha ema esabe ikitoon̄ ejit, igwook.

²³Ogwu òtetet otu kan̄ mè alọm kan̄ ikaan̄, ìsan̄a lek kan̄ me emen ogbogbo ufialek.

²⁴Ogwu ugumulek òkikpọ ene chieen̄ isiki, ìre ogwu òchak ene, ìkirọ inu kan̄ ugumu ugumu mè ubene ubene.

²⁵Ijo ebek okikpan̄ ogwu ugbek, mije, ubọk kan̄ ìkakire lek ikwaan̄.

²⁶Usen geelek ìkikakaan̄ ebek ile, ire, ogwu ata irọrọ ìkinyinyi, ìkakitele ubọk.

²⁷Ngwugwa ebi ikpak ìre mbuban inu, ògak ge, ire isa ijo ekiket me ejit iben inu.

²⁸Ogwu ata-ikọ ataak mônin̄ me ichep, ire, ogwu ata-ikọ òkigban̄ utọn̄ ijaan̄, mêtele ibe ikpọkpọ ikitumu ikọ.

²⁹Ogwu ikpak ìkinwenwe chieen̄, ire, ogwu òtatat me ugwem ìkigbagbala chieen̄ me inu geelek îkirọ.

³⁰Kpunu iriọọn̄-inu, mè ìre ngobo-ntet, mè ìre nteme, òbokọt ikeke ida Okumugwem.

³¹Ekibala inyinya isun̄ iban usen akọn̄, ire, ntim-mkpan̄ ìkup me ubọk Okumugwem.