Read obolo Urọk 22 Bible Online

Urọk 22 - obolo bible

Urọk 22

¹Ata erieen̄ înwọn igogobo igak owuwa inu ubọọn̄, nnwọn-isi înwọn igak alata okuket mè alata araran̄.

²Ogwu ubọọn̄ mè ogwu ugbọọn̄ ìre inu yaage, îre Okumugwem orom ema ene iba.

³Ogwu òriọọn̄ lek imun̄ ijo inu, olibi olet, ire, ogwu una ekiket okpọkpọ oje ònin̄, mè òben osusut.

⁴Isisiki lek mè itetet ukpook me lek Okumugwem, ìkisa ubọọn̄ mè umin mè ujọn̄ọ ugwem ijet ene.

⁵Ukpak mè ufe ojot me lek oniin̄ ebi mfufiọk ekije, ire, ogwu òsa ugwem kan̄ igwen inu ìkikukup ijọn̄ọ ere me lek kiban̄.

⁶Jeen̄ gwun̄ inu ònenen ibe ikirọ, mege òkan, ìkpotele.

⁷Ogwu ubọọn̄ okikpulu ogwu ugbọọn̄; ogwu urieek ìre usun̄ inyi ogwu ufọọk.

⁸Ogwu iwop mfeen̄, môrọkọ ufialek, ijo unaan̄-ejit kan̄ îkisa irọ ebi ofifi ife nnaan̄ môtata.

⁹Ugbana môkup inyi ogwu òkichili ubọk, mije îkinyi ebi ugbọọn̄ inorie.

¹⁰Rieen̄ ogwu òchak ene sibi, etim môfofo; ibaak mè esip môtata.

¹¹Ogwu òkirọ inu me ata ejit mè ikitumu ata ikọ, ene ya môre unene melek ogwu ubọọn̄.

¹²Chieen̄ Okumugwem ìgwọgwọk me lek ogwu òkaan̄ ifuk-ibot, ire, ìkida ikọ ogwu ofiaan̄ igbuku icho.

¹³Ogwu ugbek ìkibe, “Egbe àtat môtet emi me oyet!” mè ìre, “Mêkpan̄ emi me lek oniin̄!”

¹⁴Otu enenwaan̄ barabat ìre udọn̄ òdọdọk, ogwu Okumugwem ojọbe ejit me lek môrọn̄ inin̄ emen.

¹⁵Mbubut ìjojot me emen ejit nsabọn, ire, njijan̄ esabe isulu ema môlap mbubut ya ijọn̄ọ ema ere me lek.

¹⁶Ogwu òkituk ogwu ugbọọn̄, ufuna ọmọ ibọọn̄ ubọọn̄ enenen, mè ogwu òkiche inu inyi ogwu òbọbọọn̄ ubọọn̄, ema mêrọn̄ ugbọọri.

¹⁷Siki utọn̄ gban̄ ikọ ebi ìriọọn̄ inu, mè tap ikọ ifuk-ibot nkitumu me ejit kwun̄.

¹⁸Mije, înwọn ibe owu òtap inu chi me emen ejit kwun̄, mè otutuuk ikup mgbet mgbet me otu kwun̄,

¹⁹inyi utoon̄-ejit kwun̄ ikup me lek Okumugwem. Nra ijeen̄ owu me lek kwun̄ inu yi chereyi.

²⁰Nra ige akọp urọk ita inyi owu, urọk òkaan̄ nteme mè ifuk-ibot,

²¹isasa irọ mè owu òriọọn̄ atalek ikọ echi atikọ, ufuna owu môkọt inyi ebi ìraria owu ufọọk-otu ògbegbe.

²²Kabọkọ ogwu ugbọọn̄ inu me ubọk unye mije îrebe ogwu ugbọọn̄, mè kayaka si ubọk ogwu una me uwu oyerebet.

²³Mije, Okumugwem môtumu ikọ ibot kiban̄, mè ikwọkọ ijeek me ibot ebi ìkwọkwọkọ ema ijeek me ibot.

²⁴Katet unene melek ogwu uyok-ejit, kagọgọọk si ogwu ijo unaan̄-ejit ìgbaan̄ ìje,

²⁵inyi owu okakween̄ eru kan̄, mè ìtap lek kwun̄ me ufe.

²⁶Kare ogwu òkichieek ibọbọkọ urieek ibot ofifi ene ikpe, kabọkọ ene me ata-ikọ me lek urieek,

²⁷inyi, ire òkakaan̄ ìsa ìkpe, ekafum mkpilaak kwun̄ ìsan̄a owu me irak.

²⁸Kajujuk okike ijọn̄ òkukup karake akat, eyi ebi nte nte kwun̄ egwuun̄be.

²⁹Ìre omun̄ ogwu òrọriọọn̄ ikwaan̄ ichat ubọk? Ogwu òkup ikeya ìbokirọ ikwaan̄ inyi ogwu ubọọn̄, ìkpokirọ ikwaan̄ inyi fọkọfọkọ ife ebi kperiọọn̄ isi.