Read obolo Urọk 23 Bible Online

Urọk 23 - obolo bible

Urọk 23

¹Ire ogọọk ogwu mkpulu ikweek me irek inorie, gbagbala chieen̄ me lek inorie òkup me isi kwun̄.

²Sa inu nwaan̄ ebek kwun̄ chit, ire owu ore ogwu ebek ile.

³Kachieek ibe utop utop inorie kan̄ ikọlọ owu ebek, mije, inorie ya ìre ufe.

⁴Kakpan̄ lek kwun̄ ìnyi iweweek ikpoko, riọọn̄ inu nyi lek kwun̄, mè kpebe lek me lek.

⁵Osirerieen̄ chieen̄ me lek ikpoko, îrọ nyên̄; ikpoko ìbotitibi uwop me lek, mè iwulu ichep kubọk igo owulu ifo akpabin inyọn̄.

⁶Karie inorie ogwu ìbuk, kachieek ibe utop utop inorie kan̄ ikọlọ owu ebek.

⁷Mije, òkikeek otu ifuk ikpoko òjeje me lek. Môkibe owu, “Rie ma! Nwọ ma!” Ire, ejit kan̄ ìkakup me lek kwun̄.

⁸Sọntiik inorie oriebe ya, owu môgbọ isibi, otutuuk itọtọn̄ cha otọn̄be ọmọ ìchechep.

⁹Katumu ikọ me utọn̄ ogwu mbubut, mije, môkpọ chieen̄ isiki me lek iriọọn̄-lek òkup me emen ikọ kwun̄.

¹⁰Kajujuk okike ijọn̄ etapbe karake akat, kachak ubọk me lek ijọn̄ ebi kpà-nte.

¹¹Mije, Okumugwem ogwu òkeke ema me udun̄ înye lek enenen, ọmọ môsibi oyerebet ibot kiban̄ melek kwun̄.

¹²Sa ejit kwun̄ nyi ikween̄-inu, mè sa utọn̄ kinọ ikọ òkaan̄ ifuk-ibot me emen.

¹³Katele ikekikan̄ inu inyi gwun̄, njijan̄ ìkakikpan̄ ene.

¹⁴Ire okisa njijan̄ isulu, owu môrọ ibe inwọnọ mkpa.

¹⁵Gwun̄ n̄a, ire iriọọn̄-inu ikup owu me emen, emi si, ejit n̄a môbele.

¹⁶Mâkaan̄ uga unwọọn̄ me emen n̄a, mgbọ ikọ ònenen isikisibi owu me otu.

¹⁷Kamin ejit me lek ebi ìkirọ ijo inu, ire, ejit kwun̄ iyok mgbọ geelek me lek itetet ukpook Okumugwem.

¹⁸Mije, me atikọ, ata inu òwa me isi inyi owu, ikpọchieen̄ okaan̄be ìkpochep.

¹⁹Gwun̄ n̄a, gban̄, mè kaan̄ iriọọn̄-inu, mè nen̄e ejit kwun̄ tat me oniin̄ ònenen.

²⁰Kakigbaan̄ ìje melek ebi uga miin̄, mè ìre ebi ìkibook ebek inyi itataka anam.

²¹Mije, ebi usa-miin̄ mè ebi ebek ile mênin̄ ugbọọn̄, ebi ilaak okideke chieen̄ mgbọ geelek, oka ekwut oka ekwut ke ema ebekikwun.

²²Gban̄ utọn̄ me ida nte kwun̄, îre ọmọ obon owu; kakpọ nga kwun̄ chieen̄ ìsiki mgbọ isikan.

²³Lep atikọ kaan̄, mè kanyam; week si iriọọn̄-inu, mè ikween̄-inu, mè ngobo-ntet.

²⁴Nte gwun̄ ata irọrọ îkaan̄ atalek ikpele unwọọn̄, ogwu òbon gwun̄ òriọọn̄ inu ìkibebele ejit me lek gwun̄ ya.

²⁵Kè nte kwun̄ mè nga kwun̄ ebele ejit! Kè ogwu òmaman owu inwọọn̄ unwọọn̄!

²⁶Gwun̄ n̄a, nyi emi ejit kwun̄, mè tele chieen̄ kwun̄ igwuun̄ me oniin̄ n̄a.

²⁷Mije, ogwu òje oyet ìre udọn̄ òdọdọk, irọn̄ inin̄, kpekisibi; barabat nwa ìre udọn̄ mun̄ òkup ǹchichit ǹchichit, irọn̄ inin̄, ènwaan̄ èkam.

²⁸Ìkilileek kubọk ogwu inọ afa ikikpọ ogwu ìbokwaan̄ me lek, mè òkorọ ibe ebirieen̄ ebi barabat ekewa.

²⁹Ekene okaan̄ ufialek? Ekene okaan̄ ufieejit? Ekene okitim etim? Ekene okikpa ibot ikọ? Ekene oben unan me kpunu ibot? Ekene ke esulu chieen̄ ibak ada?

³⁰Îre ebi ìkigba ikam me ere miin̄, ebi ìkikana ere inwọ esese chieen̄ aya miin̄ ewọlọbe.

³¹Kakikpọ isi miin̄ me mgbọ înin̄be irio, mgbọ îkiriak ifuuk me emen ekpen̄, mgbọ îkije iraka inin̄ ene ebek nèèn̄.

³²Me òta kan̄, ìkilom ene kubọk ijijinu, mè òkotap ene iwot me lek kubọk ijo ulu otọk ene.

³³Chieen̄ kwun̄ môkimun̄ inu òkup nke nke, ejit kwun̄ môkekikeek inu wọlọwọlọwọlọ.

³⁴Owu môkigbugbe kubọk ogwu òlaak me ejit okwaan̄, mè ikinyen̄e kubọk ogwu òyaka lek imaan̄ me lek ibot otu uti awala.

³⁵Owu môkekibe, “Mîgon emi akpọ, ire, ǹkasak unan! Mîsulu emi, ire, ǹkanọ me lek! Ìre mgbọ owa ke mbabolo chieen̄ me ilaak, mè ikpọk isi iweek ofifi miin̄ inwọ?”