Read obolo Urọk 26 Bible Online

Urọk 26 - obolo bible

Urọk 26

¹Ike ibot awo irọrọn̄ọ me mgbọ ura mè ibot irerep mgbọ irọrọkọ uko olọbe, ikeya si, inyinyi ogwu mbubut umin, îlọ.

²Ike ùyọrọ okiwulu, isi ìkakikeke, mè agagawaji okiwulu iraka nyên̄, ikeya si, ufieek-otu efieekbe me kpunu inu ene orọbe ilọ, ìkakitet ene.

³Uti ke ekisa ineen̄ inyinya itat me oniin̄, ọgbọn ke ekisa idut inyinya akpan, inyi ije itat, njijan̄ ke ekisa ibak udun̄ ogwu mbubut, inyi iriọọn̄ inu.

⁴Kafọọk ogwu mbubut ikọ ìkpọ me lek mbubut kan̄, inyi owu okakana mbubut ogbo kan̄.

⁵Fọọk ogwu mbubut ikọ ike mbubut kan̄ odobe, inyi ikamọnọ ibe ọmọ îriọọn̄ inu.

⁶Ogwu òtap etip me ubọk ogwu mbubut ibe isi ilook, ìkup kubọk ene ya ìfefieek ukot kan̄ isan̄a, mè inwọ afa itap me owot.

⁷Urọk ogwu mbubut otobe ìkakaan̄ oruru, ìbet lek ukot ogwu akọọk òkidididen̄.

⁸Ogwu ònyi ogwu mbubut umin ìre mbubut, kubọk ogwu òbọbọp mgbọlọ ikam me lek olik mgbọlọ.

⁹Urọk òkup me otu ogwu mbubut ìkikup unan unan, ìbet lek ukpak ònwanwaan̄ me ubọk ogwu usa-miin̄.

¹⁰Ogwu ògwen ogwu mbubut mè ìre ogwu nyanya me ọkọ ikwaan̄, ìbet lek ogwu òsook oraan̄ òkpọkpọ isook oraan̄ itaak ene unan, ìkadọdọ.

¹¹Ubọk ibo okigbọ igbọ isan̄a mè òben òlaka, ikeya si ke ogwu mbubut okpọkpọ mbubut inu kan̄ ikirọ.

¹²Ogwu geelek òkimọnọ lek kan̄ kubọk ọmọ miriọọn̄ inu, ònu-me-isi ogwu mbubut înwọn igak eyi ene ya.

¹³Ogwu ugbek ìkibe, “Egbe àtat ọmọ òwa me lek oniin̄, egbe àtat òkaan̄ urimi me lek òkinya ikana lek oniin̄ me emen ama.”

¹⁴Ike afọn̄ okiyak inyi isi, òyak onyi udun̄ me lek mgba kan̄, ikeya ke ogwu ugbek okigwu lek ikana me inyọn̄ mkpilaak kan̄.

¹⁵Ogwu ugbek ìkinwaan̄ ubọk ibia me emen okwa inorie, una efuuk ìkakichieek ibe ikọt ibene ubọk itap inorie me otu.

¹⁶Me chieen̄ ogwu ugbek, ọmọ oriọọn̄ inu, igak ene jaaba ebi ìkifọọk ikọ me iriọọn̄-inu.

¹⁷Ogwu nyanya òsi ìtap lek me ikọ ikagbaan̄ge ọmọ me lek, ìbet lek ogwu òsi ìtaba utọn̄ ibo, môben unan.

¹⁸Ike ogwu iraak òkisook oraan̄ mè ìre inu òkiseseme ikpan̄ ene okupbe,

¹⁹ikeya si ke ogwu òfafiaan̄ ogwu melek kan̄ isan̄a, mè ibe, “Ǹsa ìrọ mbele ma,” okup.

²⁰Ukan̄ môniin̄ ita, ire kpunu iye, ikeya si, ibaak môta, ire kpunu mbia.

²¹Ike mbubuuk ukan̄ okirọ mfifit ukan̄ ibeen̄, mè ike iye okirọ ukan̄ ibumu, ikeya ke ogwu ibaak okito etim.

²²Ikọ ogwu mbia ìkinin̄i kubọk uchọk, mè oraka òre irak irak owot ene.

²³Ogwu ijo ejit òkaan̄ unin̄i otu, ìbet lek otin̄ ibat esabe ifin alata okuket ichọkọ ichit lek.

²⁴Ogwu òcha ene ìkitumu ikọ utop utop, isa ikilet ofiaan̄ òkup me emen kan̄.

²⁵Isikitumu ikọ me unin̄i ida, kagban̄, mije, òchichaka inu jaaba okup me emen ejit kan̄.

²⁶Môkọt isa ofiaan̄ ilet ochicha îkaan̄be, ire, ijo ejit kan̄ ìbokpọk mbum me ere ogbogbo ene etitiin̄be.

²⁷Ogwu òrọkọ udọn̄ iban ene, môrọn̄ inin̄ emen udọn̄ kan̄; ogwu òkpukpọt ewuuk ibosa ikeme ene, ewuuk ya môgwu ikom ikpukpọt ikeme ọmọ.

²⁸Otu alọm òtutumu ikọ itoon̄ ene, ìchacha ene ya; ikeya si, otu òkifiaan̄ itọn̄ ene, ìkitap jakajaka.