Read obolo Urọk 27 Bible Online

Urọk 27 - obolo bible

Urọk 27

¹Kasa egwe iyakwut òbowele ìgugo lek, mije, òkariọọn̄ inu egwe usen obosa inu.

²Tele ofifi ene itọn̄ owu, owu katọn̄ lek kwun̄, tele ibe inan̄a me otu ogwu ichen, ikare otu kwun̄.

³Ewuuk îlobo, achiaan̄ îkaan̄ ìbit me lek, ire, unaan̄-ejit ogwu mbubut okirọ ibe ene inaan̄, îlobo igak inu iba cha.

⁴Unaan̄-ejit ìre inu afa, uyok-ejit ìre mun̄ ile, ire, ekene obokọt ikeke ida mfufiat eyi chieen̄ ile okisa inu?

⁵Ikakan̄ inu inyi ene isi mè isi, ọmọ onwọn igak nlelet imumechieen̄.

⁶Unan unene osakbe me lek ogwu unene, ọmọ onwọn igak òma ogwu ochicha okaan̄be me lek ene.

⁷Ogwu owot ojotbe, atalek aran̄ akwọọk ònan̄a me lek akpa akwọọk ìkijọjọ ejit; ire, me lek ogwu uraafiọọn̄, otutuuk inu geelek òjajat ìkitotop me otu.

⁸Ogwu ònanan̄a itele uwu kan̄ isi ikinyinya ikana, ìbet lek unọn òtetele uwu kan̄ ikiwulu ikana ere.

⁹Aran̄ utop olu mè nsensi òkibubaan̄ olu ìkibele ene ejit, ire, utop eyi unene iba înin̄i igak nteme geelek ònan̄a me ejit ene gaalek.

¹⁰Katele unene kwun̄ mè ìre unene nte kwun̄; kabe ọmọ isi uwu ngwan̄ kwun̄ me usen ufialek isikeme owu; ogwu òluk igbet owu ere me lek, înwọn igak ngwan̄ kwun̄ òkup me ujọn̄ọ ere.

¹¹Gwun̄ n̄a, riọọn̄ inu, inyi ejit ibele emi, ufuna ǹkọt m̀fọọk ikọ ogwu òkisọ otu inyi emi.

¹²Ogwu òriọọn̄ lek imun̄ ijo inu, olibi olet, ire, ogwu una ekiket okpọkpọ oje ònin̄, mè òben osusut.

¹³Bọkọ ofọnti ogwu òbọkọ ogwu kperiọọn̄ isi me ata-ikọ tet kaan̄, ire, tet ọmọ me lek kan̄ me nsọọn̄ ire ke îre nwa òsi ugan ke îbọkọ me ata-ikọ.

¹⁴Amọn ene otaan̄be ukpo itọp ogwu melek kan̄ me otu ewelegwe, ebi ene ebemọnọ ibe ke îre ogbo.

¹⁵Nwa òkibaak ibaak ìkikup me lek ene ifi ifi, kubọk ibot òkpọkpọ ikirọn̄ọ sọi sọi sọi me usen ibot;

¹⁶ogwu òkisa igbagban ọmọ me lek ibaak, ìbet lek ogwu òkisa itetet efet, mè ìre ogwu òkisa itetet aran̄ me ubọk ulom kan̄.

¹⁷Ewuuk irie uba, uba òrie ewuuk; ubọk ge igwọk ge, ubọk ge ògwọk ge.

¹⁸Ogwu ògbala chieen̄ ikpọ uti figi, oborie mfut kan̄; ikeya si, ogwu òrọriọọn̄ ubọk ikpọ ogwu ute-uwu, ogwa obokaan̄ umin.

¹⁹Ubọk isi ene me emen mun̄ okibọkọ isi ene, ikeya ke ejit ene okijeen̄ inu ene orebe.

²⁰Ike owot ìkakijot udọn̄ mkpa mè ama ekwukwu, ikeya si, inu òkilọk ene ìkakijot ene chieen̄.

²¹Ike ekisa uchieen̄ mè unye ukan̄ itọ alata okuket mè alata araran̄ iriọọn̄ eyi atata, ikeya si, ekisa ubọk ekitọn̄ ene iriọọn̄ mbet ogwu ene ya orebe.

²²Tap ogwu mbubut me otik, mè sa otitim gbaan̄ ọmọ melek akpa tun̄ riọk, mbubut kan̄ ìkabota ọmọ me lek.

²³Riọọn̄ ubọk kikpọ chieen̄ me lek urum arọọn̄ mè ebot kwun̄, gwuun̄ chieen̄ me lek urum eriembuuk kwun̄;

²⁴mije, inu ubọọn̄ ìkakikup ìre mgbọ geelek, okpibot ubọọn̄ si ìkakikeke ìre ukot geelek.

²⁵Isikpulu nchiaak mbubet isan̄a, mè echi nsek otu isigwook, mè isisọp mbubet me inyọn̄ ogoon̄ igbaan̄ inigwook,

²⁶arọọn̄ kwun̄ îra itaka, mè itibi inwọọn̄ owu môsabe irom ekwut, orie ebot kwun̄ îra imiin̄, mè isibi ikpoko owu môsabe ilep ijọn̄ uko.

²⁷Owu môkaan̄ mun̄ ebe ebot eyi môsobe owu mè otutuuk ototun̄ ukan̄ kwun̄, mè iso si ire lek ebi ikwaan̄ kwun̄ ebibaan̄.