Read obolo Urọk 28 Bible Online

Urọk 28 - obolo bible

Urọk 28

¹Ogwu ikpak ìkilibi ekot mgbọ kpegọọk ọmọ, ire, ogwu ata irọrọ ìkinyenye ejit ikeke kubọk egbe àtat.

²Ido ijo irọrọ ominbe me emen ìkikaan̄ owuwa mkpulu, ge me udun̄ ge; ire, ogwu òkaan̄ ngobo-ntet mè ifuk-ibot isikup, mkpulu ido îra ikeke ijọn̄ọ mgbọ.

³Ogwu ugbọọn̄ òkifeen̄ ogwu ugbọọn̄ ogbo kan̄, ìbet lek unye otu ibot òkigwọk ijọn̄ ifiat uko, mè orọ ibe inorie inan.

⁴Ebi ìtetele isusun̄ ikan ekitọn̄ ebi ikpak, ire, ebi ìkisun̄ ikan ekije ikeme ebi ikpak.

⁵Ebi ijo ife kpekigobo unen oyerebet itet, ire, ebi ìkiweek Okumugwem ekigobo otutuuk itet.

⁶Ogwu ugbọọn̄ òkiluk ugwem ikakaan̄ge nrọ-nlọ, înwọn igak ogwu òbọọn̄ ubọọn̄ òkiluk ugwem mfufiọk.

⁷Gwun̄ òkisun̄ Ikan ìre gwun̄ òriọọn̄ inu, ire, ogwu òkigọọk ebi ebek ile igbaan̄ ije, ìkisa esip itet ogwu ute.

⁸Ogwu òkisa uga urot inyọn̄ ikpoko ufọọk inin̄ ubọọn̄, ìkititiin̄ inu ubọọn̄ iban ofifi ene ogwu òbokaan̄ ejit nsan me lek ebi ugbọọn̄.

⁹Ogwu ida utọn̄ isan̄a me lek Ikan Awaji, uriaak kan̄ si ìbore mbuban inu me isi Awaji.

¹⁰Ogwu òsa ogwu òtatat ije inin̄ ijo oniin̄, ìborọn̄ inin̄ emen udọn̄ ọmọ orọkọbe; ire, ogwu ìkalọ ìbokaan̄ ata inu me ìrot.

¹¹Ogwu ubọọn̄ ìkimun̄ lek kan̄ kubọk ogwu òriọọn̄ inu, ire, ogwu ugbọọn̄ òkakaan̄ ngobo-ntet okimun̄ mbum kan̄.

¹²Inu isije ijaan̄ me lek ebi ata irọrọ, ubelejit ìkisoso ere, ire, ebi ikpak isinan̄a ikeke ikup me irek, ebi ene mîra ikilileek.

¹³Ogwu òlet ijo inu îrọbe, inu ìkpoje ijaan̄ me lek, ire, ogwu òtutumu ijo kan̄ isibi, mè itele, mêrọ ọmọ nsan.

¹⁴Uga ubelejit okup inyi ogwu òkitet ukpook mgbọ geelek me irọrọ ijo inu, ire, ogwu òkitet ejit kan̄ inye, uyọrọlek okup inyi.

¹⁵Ogwu ikpak òkikpulu ebi kpekaan̄ unye, ìbet lek egbe àtat òkigọgọt, mè ìre ibo nriọk òkinin̄ etim.

¹⁶Ogwu mkpulu ogwu una ngobo-ntet ìkitutuku ebi kan̄ enenen, ire, ogwu òchacha oruru ngan môluk ugwem ijọn̄ọ mgbọ.

¹⁷Ogwu eje ene okisisaak mômun̄ ukwook mege isi inin̄ me udọn̄, ene geege ikatap ubọk ìnyi ọmọ.

¹⁸Ogwu ìkarọ ìlọ, mênyan̄a isibi, ire, ogwu mfufiọk ugwem ìbonan̄a irọn̄ me uwuuk-lek.

¹⁹Ogwu òsi ikwaan̄ me uko kan̄ môkaan̄ inorie irie ijot owot, ire, ogwu òkinyinya ikana môrie ugbọọri ijot owot.

²⁰Ogwu ògbegbe utoon̄-ejit môbọkọ ugbana enenen, ire, ogwu òkison lek iweek ibọbọọn̄ ubọọn̄ ìkponwọnọ osusut.

²¹Oyerebet ulibi-chieen̄ ìkanwọn, ire, ene ìkekibak me lek okpọkọ fituru ge irọ ijo inu.

²²Ogwu ìbuk ìkiweek ibe ọmọ igwat lek inin̄ ubọọn̄, ire, ìkariọọn̄ ibe ke ugbọọri ìkikukup iban ọmọ.

²³Ogwu òkakan̄ inu inyi ene mômun̄ nnwọn me mgburudun̄, igak ogwu òkifiaan̄ isa otu alọm itọn̄ ene.

²⁴Ogwu òkichiin̄ inu ogwu ute mè ìre inu ogwu uga, mè ibe, “Eya ìkare inu òlọlọ ma,” ene ya melek ogwu iwot ìre unene.

²⁵Ogwu ejit ile ìkitap yalayala, ire, ogwu òtotoon̄ ejit me lek Okumugwem, inu ìbojeje ijaan̄ me lek.

²⁶Ogwu òtoon̄ ejit me lek kan̄ ìre mbubut, ire, ogwu òkije me iriọọn̄-inu ìkponin̄ me ichep.

²⁷Ogwu òkichili ubọk inyi ebi ugbọọn̄ inu, ìkpokup me una, ire, ogwu òkimun̄ ebi ugbọọn̄, mè ifiik chieen̄, ogbogbo ufieek-otu okup inyi.

²⁸Ebi ikpak isikup me irek, ebi ene mîra ikilileek, ire, ema isikwaan̄, ebi ata irọrọ mîra ikiwa.