Read obolo Urọk 29 Bible Online

Urọk 29 - obolo bible

Urọk 29

¹Ogwu ekan̄be inu inyi owuwa mgbọ òjijit inwenwene, ene ya ìbonin̄ me ichep mgbọ ikakpọge chieen̄, kpebekọt igwa itet.

²Unye isikup me ubọk ebi ata irọrọ, ebi ene mîra ikaan̄ unwọọn̄, ire, mkpulu isinin̄ ubọk ebi ikpak, ebi ene mîra ikito mfi.

³Ogwu òmama iriọọn̄-inu ìkirọ ejit ogwu ute ibele, ire, ogwu òkinin̄ ogbo me lek ebi òje oyet ìkijijaka inu ubọọn̄ îkaan̄be.

⁴Ogwu ubọọn̄ òkisibi unen oyerebet okirọ ido ikeke inye, ire, ogwu òkimin chieen̄ me lek ngan okichep ido.

⁵Ogwu òkitumu ikọ unin̄i otu ibak ene, ìkitip ufe isun̄ iban lek kan̄.

⁶Ijo inu ogwu ikpak ìre ufe inyi ọmọ, ire, ogwu ata irọrọ môkikọt okwa, mè ikibele ejit.

⁷Ogwu ata irọrọ ìkiweek unen inyi ebi ijo irek, ire, ogwu ikpak ìkakaan̄ ngobo-ntet me lek ojelek ifuk-ibot keya.

⁸Ebi ochak ekitap wọlọwọlọ igak ama, ire, ebi ìriọọn̄ inu ekirọ mè unaan̄-ejit ifo.

⁹Ogwu òriọọn̄ inu isigọọk ogwu mbubut irọ ikọ, ogwu mbubut mônaan̄ ejit, mè irọ ọmọ ochak, ire, esuuk ìkpokup.

¹⁰Ebi eje ene onin̄be chieen̄ ekichacha ogwu ìkalọ, ire, ebi ìkirọ inu òtatat ekiweek nnwọn inyi ọmọ.

¹¹Ogwu mbubut ìkinaan̄ ejit akọn̄ akọn̄, ire, ogwu òriọọn̄ inu ìkikekeme unaan̄-ejit kan̄ ikaan̄.

¹²Ogwu mkpulu isikima ikọ ataak, otutuuk ebi ikwaan̄ kan̄ ebekana ebi ikpak.

¹³Inu ge ogwu una mè ogwu òtutuku ene egbaan̄be ikaan̄ ìre ikeyi: îre Okumugwem obochili ema ene iba chieen̄, inyi emọọn̄ inu.

¹⁴Ogwu ubọọn̄ òkisibi oyerebet atikọ inyi ebi ugbọọn̄, ogboon̄ ubọọn̄ kan̄ ìbokekeke ikam mgbọ geelek.

¹⁵Njijan̄ mè ikan̄-inu ìkirọ ibe ene iriọọn̄ inu, ire, gwun̄ etelebe ibe ikup me lek kan̄, ìkisa esip itet ogwu uga.

¹⁶Mgbọ ebi ikpak isikiwa, nlilọ inu îra ikimumana, ire, ebi ata irọrọ mêkup imun̄ ema ekirurọn̄ọ igwook.

¹⁷Kisulu gwun̄ kwun̄, ke môrọ ibe owu òsiki efuuk, mè inyi owu ubelejit.

¹⁸Ere Awaji ikachilige inu ìbook, ebi ene echechieen̄ ita, ire, uga ubelejit òwa inyi ogwu òkisun̄ Ikan Awaji.

¹⁹Kpekikọt isa otu otu ikan̄-inu inyi ogwu usun̄, mije, môgobo inu ekitumu itet, ire, ìkpochieek irọrọ.

²⁰Ogwu òkitumu ikọ kpuak, ìkakiteten̄ ibot ikọ kan̄, ònu-me-isi ogwu mbubut înwọn igak eyi ene ya.

²¹Ogwu òririreek ogwu usun̄ kan̄ bene me mgbọ îrebe nsabọn, me òta kan̄, ogwu usun̄ ya obonikana ogwukaan̄ uwu ene ya.

²²Ogwu unaan̄-ejit ìkitap yalayala, ogwu uyok-ejit ìkirọ nlilọ inu owuwa mgbọ.

²³Ugumulek ìkisiki ene, ire, isiki-lek okinyi ene umin.

²⁴Ogwu ògọgọọk ogwu inọ ikeke, ìsọk ukan̄ iwọp lek kan̄; ubọk geelek mêtan̄abe awọ itoon̄ ọmọ me ibot, ìkpokọt ikama otu ikpa inu òrọrọ.

²⁵Ukpook ebilene ìkitap ene me ufe, ire, ogwu òtoon̄ Okumugwem ejit me lek, unan ìkpore lek.

²⁶Owuwa ene ekiweek nnwọn-isi me ubọk ogwu mkpulu, ire, unen oyerebet ìkinan̄a me ubọk Okumugwem.

²⁷Ogwu mfeen̄ ìre mbuban inu me lek ebi ata irọrọ; ebi ìkirọ inu òtatat ìre mbuban inu me lek ogwu ikpak.